MAAKO13
1Jesu naalikuzwa mulabba lye Ngʼanda ya Leza, umwi wabasikwiiya bakwe wakamwaambila kuteeti, “Omwiiyi! Bona mabwe kukomena amaanda ateni kubota!”2Jesu wakataba kuteeti, “Ede mwaabona mayake mapati aaya? Taakwe bbwe naanga lyomwi litikasyaale polyeelede kuba, ayokolomonwa oonse.”3Jesu naalikukede acilundu ca Oliva, cilangeene Engʼanda ya Leza, Pita, Jemusi, Joni o Andulu bakamubuzisisya kumbali kuteeti,4“Twaambile, ino eezi zizoocitika lili? Ape citondezyo nzi citakacitike kubonesya kuteeti nako yasika yokuteeti zyoonse eezi zicitike?”5Jesu wakabaambila kuteeti, “Amucenjele, kuteeti kutabi muntu umweena,6kaambo mbanji batakaze muzina lyangu kabateeti, ‘Ndendime Mesiya’ okweena bantu banji.7Ape mutakakatazigwi mwaakumvwa nkondo empuwo zye nkondo. Eezi zintu zyeelede kuzocitika, kono tacaambi kuteeti mamanino asika.8Zisi ziyobukilana, bwami buyoolwana obwaminyina. Kuyooba kuzungaana kwenyika muzibaka zisiyene-siyene, ape kuyooba nzala. Aayo anooli ngematalikilo amapenzi, ayooba mbuli matalikilo aakumyongwa ko mwanakazi anolaafwi okutumbuka.9“Amucenjele! Muyaangwa okutolwa kunkuta okuumwa muzikombelo, kaambo kangu muyoima kunembo lyabeendelezi bamasena abami, kono ciyooba coolwe cokubaambila Makani Mabotu.10Cokusaanguna Makani Mabotu eelede kukambookwa kubantu boonse.11Mwaakwaangwa okutolwa kunkuta, mutakalibiliki azyemwandokataba kaitanasika nako. Yaakusika nako mukaambe kufumbwa majwi ngomuyoopegwa kaambo unooli Muuya Usalaala unaamboola kutaamba nywebo.12Mwananyina uyoaba mwananyina kuteeti ajaigwe ape abaisi bayocita mbweena namu kubana babo. Bana bayoobukila bazyali babo okubajazya.13Bantu boonse bayoomusula kaambo kangu. Kono kuteeti mwayuma kusikila kumamanino muyoofutulwa.14“Muyobona cisesemyo ciyoosya kaciimvwi mucibaka mociteelede kuba. Uubala amvwisisisye! Mpoonyina balimu Judiya bacijile mumalundu.15Ooyo uli aciluli cengʼanda atapilukili mungʼanda kuteegwa abweze zintu zyakwe.16Ooyo uli mumuunda atapilukili kuyoobweza jansi lyakwe kungʼanda.17Maawe kubanakazi bamisi abanyonsya mumazuba aayo!18Amukombe kuli Leza kuteeti ezi zitakacitikili mumpeyo,19kaambo mapenzi amazuba aayo anoli mapati kwiinda oonse akacitika kuzwa nako Leza naakalenga nyika kusikila sunu. Ape taakwe nekuyooba zilinamu.20Mwami wakaacesya mazuba ateni. Kambe natakaacesya, taakwe walikunokonzya kufutuka, kono wakaacesya kaambo kabasale bakwe.21“Muciindi eeco na umwi wakwaambila kuteeti, ‘Langa, Mesiya nguuno!’ Na ‘Langa, nguulya kuya!’ Utasyomi.22Ndaamba namu kaambo kuyoza bamamesiya abasinsimi babeji. Bayoocita zitondezyo zyamaleele ezikomosya kuteeti kwanokonzeka beene abantu mbakasala Leza.23Mucenjele! Ndamwaambilila cimo zintu zyoonse eezi kazitana citika.24“Akwiinda mazuba amapenzi aaya, zuba liyoosiya, mweezi uyooleka kubala,25nyenyeezi ziyooloka kuzwa kujulu enguzu zilimumulenga-lenga ziyoozungaanisigwa.26Mpoonyina aleeyo nako boonse bayoomubona Mwanoo Muntu keza mumayoba enguzu zipati obulemu.27Uzotuma bangelo kumabbazu enyika one kuteeti bakabunganye basale ba Leza kuzwa nyika yoonse.28“Amwiiye ciiyo kuzwa kumukuyu. Mitabi yateni yatalika kusyuuka okugwisya maani mapya, mulaziba kuteeti mainza alaafwiifwi.29Munzila iswana eeci, mwazoobona zintu eezi kazicitika, muzoozibe kuteeti nako yaswena loko.30Nconzyo ndamwaambila kuteeti zyoonse eezi ziyoocitika bamwi bantu besunu kabatana kufwa.31Julu enyika ziyoomana kono majwi aangu taayoomani.32“Taakwe uubuzi buzuba naanga nako Mwanoo Muntu nayoopiluka nebaba bangelo kujulu, naanga Mwana, aati Tata alike.33Mucenjele okulibambila, kaambo tamuzi nako niiyooza.34Buzuba oobo bunooli mbuli cikozyanyo comwaalumi wakalibambila kwiinka mumusinzo. Wakapa misebezi kubabelesi bakwe umwi oumwi okubasiila kuteeti beendelezye. Naakamana wakaambila mulangi kuteeti kalangilila, mpoonyina wakazwa angʼanda okwiinka mumusinzo.35Iino kamulibambilide, kaambo tamuzi na mukamwini ngʼanda uza lili. Inga kwaba kumazuba naanga akatikamasiku, na kubucedo naanga lyanooandula zuba.36Kuteeti weza pomutamuyeeyeli, teelede kumujana kamulede.37Eeci cendimwaambila, ndaambila boonse kuteeti: Kamulibambilide lyoonse!”
The Seed Company