Misebezi ya Baapositola7
1Mpoonyina Mupaizi Mupati wakabuzya Sitivini kuteeti, “Zyanconzyo zyebalimukukutamizya na?”2Mpoonyina Sitivini wakataba kuteeti, “Nobazyalwama amatata, amundimvwe! Leza wesu wobulemu wakalibonya kuli sikale wesu Abbulahamu. Muciindi eeco Abbulahamu wacilikukala mucilalaanda ca Mesopotamiya katana kulongela kutaindi lya Halani.3Mpoonyina Leza wakamwaambila kuteeti, ‘Siya babbululu bako enyika yokulinywe, wiinke kunyika eeyo njendiyookutondezya.’4Mpoonyina Abbulahamu wakazwa kucisi cabana Kaludiya okuyokala mu Halani. Kuzwaawo baisi nibakafwa, Leza wakamugwisya okumutola munyika eeyi njemukede mwateni.5Kono aleeyo nako Leza taakwe naakamupa cibaka muleeyi nyika neciceya. Kono wakamusyomezye kuteeti inyika eeyi iyooba yakwe abolunyungu lwakwe bayooza kuzwa nguwe, nekuba kuteeti taakwe naajesi omwana.6Ape Leza wakamwaambila kuteeti, ‘Bolunyungu lwako bayookala mucisi cabamwi oomo mobayoodyamininwa mubuzike kwemyaaka iili myaanda yone.7Kono ndiyoopa cisubulo kucisi eeco cebayoobelekela mbuli bazike, mpoonyina kumamanino bayoozwa mwateni okuzoondikomba omuno mucibaka.’8Amane Leza wakapa Abbulahamu cizuminano cali ecitondezyo cokupalulwa. Kumane, Abbulahamu wakazyala Isaka okumupalula kajesi mazuba aali lusele. Awe Isaka wakacita mboonyina namu kumwanaakwe Jakobo. Awe Jakobo wakacita mboonyina namu kubana bakwe bali kumi abobile, matata besu.9“Iino bana ba Jakobo bakauzya Josefa muzyalwanyina mubuzike kaambo komunyono mpoonyina wakatolwa ku Ijipiti. Kono Leza wakali anguwe.10Wakamuvuna kumugwisya mumapenzaakwe oonse okumupa busongo cokuteeti naakainka kunembo lya Falawo, mwami woku Ijipiti, mwami wakabotelwa awe. Mpoonyina mwami wakamusala kuba mweendelezi we Ijipiti owengʼanda yo mwami yoonse.11Imwi nako kwakanjila nzala mucisi ca Ijipiti coonse eca Kenani, eeyi nzala yakeeta mapenzi loko cokuteeti basikale besu bakakubula kokujana cilyo.12Iino Jakobo naakamvwa kuteeti kuli cilyo ku Ijipiti, wakatuma bana bakwe basikale besu muciindi cokusaanguna kuteeti bakaakuule kwateni cilyo.13Bazyalwanyina ba Josefa nibakainka ku Ijipiti nako yabili, Josefa wakalizibya kulimbabo mpoonyina mukwasyi wa Josefa wakazibwa kuli Falawo.14Mpoonyina Josefa wakalaizya kuteeti Jakobo, isi aze ku Ijipiti omukwasyi wakwe woonse. Antoomwi balikusika kumakumi aali ciloba a osanwe.15Mpoonyina Jakobo wakainka ku Ijipiti, kwaakakufwida antoomwi abasikale besu.16Mpoonyina mafuwa aabo akapilusigwa kubali kukala ku Shekemu okuzikwa mucuumbwe cakaulide Abbulahamu amali kubana ba Hamo mu Shekemu.17“Iino nako niyakaswena yokuteeti Leza azuzikizye zyaakasyomezyezye Abbulahamu, bantu besu bakavula loko mu Ijipiti.18Nikwakainda nako kwakazoolela mwami umwi watakezi zya Josefa.19Ooyu mwami waloolunya kubantu besu okubadyaaminina loko kubasungilizya kuteeti kabasowa twana tuvwanda kuteegwa tufwe.20Muuciindi eeci Mozesi naakazyalwa, walimwana mubotu mumeensaa Leza. Mozesi wakalelwa mungʼanda yabaisi kwa myeezi yotatwe.21Mpoonyina nibakamusowa, mwanaa Falawo musimbi wakamubweza okumupanga kuba mwana wakwe okumukomezya mbuli mwana wakwe.22Mpoonyina Mozesi wakaisigwa mubusongo boonse bwabana Ijipiti, ape wakaba mupati muzyaambo omuzicito.23“Bumwi buzuba Mozesi naalaa myaaka iili makumi one, wakayeeya kuyoopotela babbululu bakwe bana Izilaili.24Naakabona muna Ijipiti kapenzya muna Izilaili, Mozesi wakainka kuyookwabilila muna Izilaili okupilusizya muna Ijipiti mukumujaya.25Mozesi walikuyeeya kuteeti bantu bakwe balaziba kuteeti Leza wakamutuma kweeta lwaanguluko kulimbabo, kono taakwe nibakaziba.26Buzuba bwakacilila, Mozesi wakabona baalumi bobile bana Izilaili kabalwana, mpoonyina wakasoleka kubavuna kabaambila kuteeti, ‘Nobaalumi, niinzi nemulwana kakuli muzyalwaamwi?’27Mpoonyina sikucisa mweenzinyina wakatonta Mozesi okumubuzya kuteeti, ‘Ngwani wakakubika kuba mweendelezi omwaatuzi akati kesu?28Ino uyanda kundijaya mboonyina mbuwakajaya uulya muna Ijipiti jilo na?’29Mpoonyina Mozesi naakamvwa namu, wakacija okuyookala mucisi ca Midiya, mwaakali muzwakule. Ooko wakaakuzyala bana basyimani bobile.30“Iino nikwakainda myaaka iili makumi one, mungelo wa Leza wakalibonya kuli Mozesi muciteyo calikuyaka mulilo munkanda ambali ecilundu ca Sinayi.31Iino Mozesi naakacibona eeci, wakakomokwa okuswena afwiifwi kuteegwa abonesesye. Mpoonyina wakamvwa jwi lya Mwami kaliteeti,32‘Ndime Leza wabasikale benu, Leza wa Abbulahamu, Isaka o Jakobo.’ Mpoonyina Mozesi wakatuntuma okuyoowa loko ape taakwe naakasola kulanga kwateni.33Kuzwaawo, Mwami wakaambila Mozesi kuteeti, ‘Tubula manyantela aako kaambo aawo anyika poimwvi kulasalala.34Nconzyo ndakubona kupenzegwa kwabantu bangu balimu Ijipiti okutongela kwabo ndakumvwa. Ceciceeco cindaselukila kuteeti ndibanunune. Iino koza! Ndikutume ku Ijipiti.’35“Ngweenya ooyu Mozesi ngonguwe ngubakakakide bana Izilaili kabateeti, ‘Ngwani wakakubika kuba mweendelezi omwaatuzi akati kesu?’ Ngonguwe ngweenyina Leza ngwaakatuma kuteeti abe musololi o mufutuli wabo kwiindila mujanza lyo Mungelo ooyo wakalibonya muciteyo ciyaka.36Wakabagwisya mu Ijipiti kacita zikomosya ezitondezyo zyamaleele mu Ijipiti Aalwizi Lusalala omunkanda kwe myaaka iili makumi one.37Ngonguwe ngoonyinooyu Mozesi wakaambila bana Izilaili kuteeti, ‘Leza uyoosala akati kenu musinsimi mboonyina mbwaakandisala mebo.’38Mozesi ooyu ngonguwaape walaakati ke mbungano yabana ba Izilaili antoomwi abasikale besu munkanda aalya mungelo nakaamboolaawe Acilundu ca Sinayi. Aalya wakatambula majwi apa buumi kuteegwa azootupe ngawo.39“Kono basikale besu taakwe nibalikuyanda kumumvwida Mozesi, mane bakamukaka ape mumyoyo yabo batokomene kupiluka ku Ijipiti.40Bakateeti kuli Aloni, ‘Tupangile ba leza batitusolwedele kaambo tatuzi zilimukucitika kuli uulya mwaalumi Mozesi, wakatugwisya munyika yoku Ijipiti.’41Momuciindeeci nibakapanga cibumbwa comunamani okupa zituuzyo kulicico okucita mukiti mukukuteka misebezi yamaanzaabo.42Mpoonyina Leza wakabafutatila okubaleka kuteeti kabakomba nyenyeezi zyokujulu mboonyina mbokulemdedwe mu bbuku lya basinsimi kuteeti,‘Nobana Izilaili! Nconzyo tainsi ndime ngumwalikupa zituuzyo ezipaizyo nimwali munkandakwe myaaka iili makumi one.43Ede nditeente ndimwalikukombela Moloki leza wenu ndimwayumwideape mwayumwine ecibumbwa ca Lefani leza wenu we nyenyeezi.Eezi zyali zibumbwa zimwakalibumbila kuteeti kamuzikomba.Iino ndiyandoomutandila kule kwiindilila Bbabbiloni.’44“Basikale besu bakajesi teente lyecizuminano munkanda. Eeli teente lyakapangwa obupange Leza mbwaakatondezya Mozesi.45Kuzwaawo basikale besu bakalitambula teente kuzwa kumaisi. Mpoonyina Joshuwa naakasololela basikale besu kuyoolwanisya zisi Leza zyakatanda muleeci cibaka, bakaliyumunizya kucibaka cipya eeco. Bakaakukala alyo kusikila nako ya Deveti.46Iino Deveti wakajana luzyalo mumeensaa Leza okukumbila kuteeti ayakile Leza wa Jakobo ngʼanda.47Kono Solomoni nguwakamuyakila.48“Nekuba kuteeti Leza Sijulu Wamajulu takali mumaanda akayakwa amaanza aabantu, mboonyina mbuli mbwaamba musinsimi kuteeti,49‘Mwami waamba kuteeti, Julu cibbula cangu cobwami,Nyika cilyatilo cangu.Ino inga mwandiyakila ngʼanda yomusyobo nzi?Ino cili cibaka cangu cokupumwida?50Ino talili janza lyangu lyakalenga zyoonseneni eezi na?’”51Sitivini wakaindilizya okuteeti, “Nobasimitwe miyumu, bajesi myoyo itasyomi amatwi aatamvwi! Mucita zibalikucita basikale benu, nako yoonse mukazya Muuya Uusalala.52Nguuli musinsimi ngubatakapenzya basikale benu? Mane basikale benu bakajayaabo bakaambilizya ciindi loko kuza kwa Uululeme, Mesiya, ngumwakaaba okujaya.53Mwakatambula Mulawo ooyo wakeetwa kulindinwe abangelo kono mwakakacilwa kuucililizya.”54Benkuta Mpati ya Majuda nibakamvwa namu, bakanyema loko okuluma ntwino kulinguwe.55Kono Sitivini kazwide Muuya Uusalala wakadongomwena kujulu okubona bulemu bwa Leza o Jesu kaimvwi kubbazu lyolulyo lwa Leza.56Mpoonyina wakateeti, “Amulange! Ndabona julu kalijukide Omwanoo Muntu kaimvwi kubbazu lyolulyo lwa Leza!”57Kono bakalisinka matwi okoongolola loko okuvwalookela antoomwi kulinguwe.58Mpoonyina bakamukuluntilaanze etaindi okutalika kumupotoola mabwe. Balikumutamizya bakatubula majansaabo okwaabika amaulu omusyimani walikwiitwa kuteeti Saulu.59Nibalikumupotoola mabwe Sitivini, wakakomba kateeti, “Mwami Jesu tambula muuya wangu!”60Mpoonyina wakafugama okoongolola kateeti, “Mwami utabapi mulandu acibi eeci!” Naakamana kwaamba namu, wakafwa.
The Seed Company