Mark2
1ဝမ်းစောင်နိန်အင်ဟူကော်လော့် စောင့်ယေရှုလ ကြွပေါက်မှိန်းကပေရနောင်ကော်ဝိုက်။ သတင်းအောင်းမွန်းစောင့်ထီန်ပေါက်မားရာဟုန်းလ ကွန်းလေ နယ့်ဟဉ်းနယ့်ဟုဟင်းကော်ဝိုက်။2ကောပ့်နယ့်ညော့ ကွန်းမကျေးမလေန ဟီးဟင်းဖွတ်ဟင်းဆီ ထီန့်စူးမားရာစောင့်ယေရှုဆီ တော်ခနောက်နာ့ဆိုတူးဟုန်းပွန့် ကွန်းလေတေးမ်ကော်ဝိုက်။ မွန်းစောင့်ကော့် အောင်းကွန်းဟောန့်လေ နှုတ်ကပတ်တော်စောင့်ဖလားလေ ဟောပြားဆောန်ပြားကော်ဝိုက်။3မေနယ့်လော့် ကွန်းဆီကော့်လ အောင်းစကွန်းဆိုင်လုမ်းခတ်ကော်နိမ် ဟပ်ဆီ မားစူးရာမွန်းစောင့်ဟင်းဝိုက်။4တော်နယ်ကော့် ကွန်းဖွန်လေရောင်းညော့ မနော်လေန အောင်းကွန်းဟောန့် ရာမွန်းစောင့် မဟောင့်ကွာဟင်းပဲ့ဝိုက်။ ကောပ့်နယ့်ညော့ ရာမွန်းစောင့်ရောင်း ဆီမေခနေလ အောင်းခေါင်ခွာဆီ အောင်းကွန်းဆိုင်လုမ်းခတ်တောင်း အောင်းဖုပါ ရာခနာ့မွန်းစောင့် ဆွတ်တိုကော်ဝိုက်။5စောင့်ယေရှုန အောင်းကွန်းဟောန့်လေယွန်မ်ခနေမွန်းစောင့် နယ့်ဟောန်ကော်လော့် အောင်းကွန်းဆိုင်လုမ်းခတ် “လုစိုင်း၊ အောင်းအပြစ်မောလေ ကောခွင့်လွှတ်ဟောင့်ဝ်ကော်” ဆီ ဝါကော်ဝိုက်။6တော်နယ်ကော့် ရာတီဟောန့် အောင်းနှောင်ဆီအူ ဆရာကျမ်းစန်မောင်းဖောင်န7“ကွန်းဟိုက်လ ဟေဟောင်းဆီ နယ့်တန့်နောင်နယ့်လ။ မွန်းန အောင်းစောင့်ဖလား တန့်ခွမ်းအောင်းစော်ကားကော်။ စောင့်ဖလားနဲဟော် အောင်းအပြစ်လေ အောင်းခွင့်လွှတ်ပဲ့ အခွင့်အာဏာလေရောင်းလ” ဆီ ခနောဝ်စောဝ်မနော် စဉ်းစားဟင်းကော်ဝိုက်။8ချရှ်ချန်း စောင့်ယေရှုန ခနောဝ်စောဝ်မနော် တွေးနောင်နူးဝါလ ဟုကော်ညော့ အောင်းစမနော် “ခနောဝ်စောဝ်မဆူ ဟေဟောင်းဆီ နယ့်တွေးနောင်နယ့်ဟင်းန။9အောင်းကွန်းဆိုင်လုမ်းခတ် ‘အောင်းအပြစ်မော ခွင့်လွှတ်ကော်’ ဆီ အောင်းဝါတောင်း ‘လုကော်။ အောင်းဖုမောကျေပ်ဆီပိုင်းကော်’ ဆီ အောင်းဝါတောင်း အောင်းထောချဉ်းတလွယ်။10တော်နယ်ကော့် ခနေကမ္ဘာဟိုက် အောင်းအပြစ်လေ အခွင့်အာဏာအောင်းခွင့်လွှတ်ပဲ့လ ရာလူ့သားတော် ရောင်းဝါလ အောင်းမဆူကောတပြား” ဆီ ဝါကော်ဝိုက်။ နောက်လောင်နော့် စောင့်ယေရှုလ အောင်းကွန်းဆိုင်လုမ်းခတ်11“အောင်းမောကောတဝါ။ လုကော်၊ အောင်းဖုမော ကျေပ်ဆီ ပေါက်ဟုန်းကော်” ဆီ ဝါကော်ဝိုက်။12ကွန်းဟောန့်ကော့် ချရှ်ချန်း လုဆီ အောင်းဖုကျေပ်ဆီ ခနာ့ကွန်းလေတောင်းလုန် အောက်ကွာကော်ညော့ ကွန်းနယ့်ဟောန်လေတောင်းလုန်ကော့် အိုက်အမ်းဟင်းကော်ဆီ “ဟော အောင်းအမျိုးနောင်နယ့် ဟာနိမ်ကော့် မဟောန်ကောင်ဝ်” ဆီ ဝါဟင်းဆီ အောင်းစောင့်ဖလား ချီးမွမ်းဟင်းကော်ဝိုက်။13နောက်လောင်ဟာနိမ် စောင့်ယေရှုန ရာဟဉ်းမ်နမ့်နောင်ဂါလိလဲ ကြွပေါက်ကွာကော်ဝိုက်။ မွတ်ကွန်းမကျေးမလေန ရာမွန်းစောင့် ထီန်ဟင်းမားဆီ မွန်းစောင့်ကော့် အောင်းမနော် စဆီဟောပြားဆောန်ပြားကော်ဝိုက်။14တကြားမွန်းစောင့်ပိုင်းတန်းဆီကြွမားလ ရာထိန်ကျေပ်ကာ လုစိုင်းအာလဖ အောင်းလေဝိ နှောင်ဆီအူလ ဟောန်ကော်ဝိုက်။ စောင့်ယေရှုလ အောင်းစမွန်း “စောင်းမ်မားခလောင်ကော” ဆီ ဝါကော်ဝိုက်။ မေနယ့်လော့် လေဝိန ဆီမေနှောင်လ လုဆီ စောင်းမ်ကော်ခလောင်မွန်းစောင့်ကော်ဝိုက်။15နောက်လောင်နော့် စောင့်ယေရှုန ရာဟုန်းလေဝိ နှောင်ဆီ တကြားကျဉ်းဆီအူလ ကွန်းကျေပ်ကာလေတောင်း ကွန်းအပြစ်ရောင်းလေန တောင်းမွန်းစောင့်တောင်း တောင်းတပဲ့မွန်းစောင့်လေတောင်း ကျဉ်းနွေ့ဟင်းကော်ဝိုက်။ ဟေဟောင်းဆီပေါဝါလော့် ကွန်းစောင့်စောင်းမ်မားခလောင်စောင့်ယေရှုလေန ကွန်းအောင်းနောင်နောင့်လေ ပါညော့ဝိုက်။16နောင်နယ့်ဆီ စောင့်ယေရှုလ တောင်းကွန်းကျေပ်ကာလေ၊ တောင်းကွန်းအပြစ်ရောင်းလေတောင်း အောင်းကျဉ်းနွေ့ဟင်းန ဖာရိရှဲလေတောင်း ဆရာကျမ်းစန်လေ ဟောန်ဟင်းကော်လော့် အောင်းတပဲ့မွန်းစောင့်လေ “မွန်းန ဟေဟောင်းဆီ တောင်းကွန်းကျေပ်ကာလေ၊ တောင်းကွန်းအပြစ်ရောင်းလေတောင်း နယ့်ကျဉ်းနွေ့ဟင်းန” ဆီ ထန်မ်ကော်ဝိုက်။17မွန်းစောင့်လ အောင်းခွမ်းဟောန့် နယ့်ဟဉ်းကော်လော့် “ကွန်းအူနီးလ အောင်းစောင့်ထိုးရ သလိုမစော်။ ကွန်းမအူနီးနဲဟော် သလိုဟော။ နောင်နယ့်ကျဉ်းနော့် ကောလ အောင်းစောင့်ကောင်ဝ်တောင်းကောင်ဝ် ကွန်းနီးဆီ အောင်းကွန်းစောင့်ထန်လေ ဟပေါနယ့်ဟောင့်ဆီ ကောမားမစော်။ အစားအနယ့်လ အောင်းစောင့်ကောင်ဝ်တောင်းကောင်ဝ် ပေးကွန်းအပြစ်ရောင်းဆီ အောင်းကွန်းစောင့်ဟုလေနဲဟော် ဟပေါနယ့်ဟောင့် ကောမား” ဆီ ဝါကော်ဝိုက်။18ဝမ်းနိမ်လော့် တပဲ့ရေနှစ်မင်္ဂလာဆရာယောဟန်တောင်း တပဲ့ဖာရိရှဲလေန အောင်းကျဉ်းရှောင်ဆီ ပေါင့်ဝ်ဥပုဟင်း။ မေနယ့်လော့် ကွန်းမောင်ဖောင်န မားစူးရာစောင့်ယေရှုဆီ “တပဲ့ယောဟန်တောင်းတပဲ့ဖာရိရှဲလေန အောင်းကျဉ်းရှောင်ဟင်းမေကော့် တပဲ့မောစောင့်လေန ဟေဟောင်းဆီ အောင်းကျဉ်းမရှောင်ဟင်းန” ဆီ ထန်မ်ဟင်းကော်လော့်19မွန်းစောင့်န အောင်းစမနော် “ကွန်းစောင့်ထီန်မားရာပွဲခေါင်းချိုက်လ တောင်းမော်ဝ်ထောင့်ဝ်မော်ဝ်တောင်း မေရောင်းလော့် အောင်းကျဉ်းတရှောင်ဆီ မဆူထန်ဟင်းလေး။ ကွန်းအောင်းမော်ဝ်ထောင့်ဝ်မော်ဝ်တောင်းရောင်းလေကော့် မော်ဝ်ထောင့်ဝ်မော်ဝ်န တောင်းမနော်တောင်း ကာရောင်းန အောင်းကျဉ်းတရှောင်ဟင်းမစော်။20တော်နယ်ကော့် ဆီမေမနော် အောင်းမော်ဝ်ထောင့်မော်ဝ် အချီန်အောင်းဟောင့်ကွာ တထီန်မား။ မေနောင့်ဟောင်ဝါမ ကွန်းဟောန့်လေန အောင်းကျဉ်းတရှောင်ဟင်း” ဆီ ဝါကော်ဝိုက်။21နောက်လောင်နော့် မွန်းစောင့်လ အောင်းစမနော် ပွန်ဥပမာတောင်း လောင်ဝ်ပြားကော်လ “ဖောကော့် ပဉ်ဖအောင်းမော်ဝ်စိုက်ဆီ ရာဖအောင်းကောင်ဝ် ရာအောင်းစိုက် အောင်းတစပ်ဟင်းမစော်။ နောင်နယ့်ဆီပေါစပ်ကော်ကော့် ပဉ်ဖအောင်းမော်ဝ်လ ရွန်းညော့ ပဉ်ဖအောင်းကောင်ဝ်ကော့် ဆာဆီတစိုက်ဝိုက်။22နောင်နယ့်ကျဉ်းနော့် ဖောကော့် အောင်းဝိုင်အစ်အောင်းမော်ဝ် အောင်းတောင်းနောင်တောင်းဟေဝိုက် ခနောဝ်အိအောင်းကောင်ဝ် တဆောင်ဝ်ဟင်းမစော်။ ဟောင်ပေါဆောင်ဝ်နောင်နယ့်လော့် ဝိုင်အစ်အောင်းမော်ဝ်လ အောင်းတောင်းနောင်တောင်းဟေဝိုက် အောင်းအိကောင်ဝ်ဟိုက် ဟပေါင်ဆီ ဝိုင်အစ်ကော့် မာဆီ အောင်းတောင်းနောင်တောင်းဟေဝိုက် အိကောင်ဝ်ကော့် တပျတ်စီးဝိုက်။ ကောပ့်နောင်နယ့်ညော့ အောင်းဝိုင်အစ်အောင်းမော်ဝ် အောင်းတောင်းနောင်တောင်းဟေဝိုက် ခနောဝ်အိအောင်းမော်ဝ်နဲဟော် ဆောင်ဝ်ဟင်း” ဆီ ဝါကော်ဝိုက်။23ဝမ်းဥပုဝမ်းနိမ်လော့် စောင့်ယေရှုန အောင်းဆွုန်ခေါင့်ဝ် ခမ့်ဆီ ကြွကွာကော်လော့် တပဲ့မွန်းစောင့်လေန ပိုင်းတန်းဆီ အောင်းမက်ခေါင့်ဝ်လေ ပွင့်န်ဟင်းကော်ဝိုက်။24မေနယ့်လော့် ဖာရိရှဲလေန အောင်းမွန်းစောင့် “တွဲနူ။ ဝမ်းဥပုလ မနော်လေန ဟေဟောင်းဆီ အောင်းအခွင့်မနယ့်ဟေလေ ဟေဟင်းန” ဆီ ထန်မ်ဟင်းဝိုက်။25မေနယ့်လော့် စောင့်ယေရှုန အောင်းဖာရိရှဲလေ “ခနောဝ်လိကျမ်းန အချီန်တောင့်မိုက်လ စောင့်ခွန်ဟော်ခမ်းဒါဝိဒ်တောင်း ကွန်းစောင်းမ်ခလောင်မွန်းလေန ဟေဟင်းမားနောင်နူးဝါလ မဆူမဖတ်ကောင်ဝ်ဟင်းလေး။26ပုရောဟိတ်အောင်းချဉ်းရောင်ဝ် မေလိုက်ထတ် ‘အဗျာသာ’ န စောင့်ခွန်ဟော်ခမ်းဒါဝိဒ်န ရာခနောဝ်ဟုန်းစောင့်ဖလား ခေါင့်ဝ်ဆီ ပုရောဟိတ်လေနဲဟော် ကျဉ်းဆီနွိုက်ဆီ အောင်းကျန်ဖောကော့် ကျဉ်းဆီအောင်းမနွိုက် အောင်းစောင့်ဖလားနဲဟော် သီးသန့် အောင်းကပ်ဝိုက် အောင်းခေါင့်ဝ်မွန်းလေ ကျဉ်းဆီမကား အောင်းကွန်းစောင်းမ်မားခလောင်မွန်းပါ လိမ့်ဟောင့်ဝ်မားအွန်” ဆီ ဝါပေါက်ကော်ဝိုက်။27နောက်လောင်နော့် မွန်းစောင့်လ အောင်းစမနော် “ဝမ်းဥပုန ပေးအောင်းစကွန်းလေ။ ကွန်းလေန အောင်းစဝမ်းဥပုမစော်။28ကောပ့်နယ့်ညော့ ကော လူ့သားတော်န ပေးစောင့်ဝမ်းဥပု” ဆီ ဝါကော်ဝိုက်။
Empower Asia Bible Translation Movement