Mark3
1နောက်လောင်ဝမ်းဥပုဝမ်းနိမ်လော့် စောင့်ယေရှုန ရာတလားစလပ် နောက်လောင်ဟာနိမ် ကြွပေါက်မားဟွန်းဝိုက်။ ရာတီဟောန့် ကွန်းမေးပါ့နိမ်သိုင်းကော်နိမ်ကော့် ရောင်းဝိုက်။2ဖာရိရှဲအောင်းရောင်းရာတီဟောန့်မောင်းဖောင်န အောင်းစောင့်ယေရှု တန်အပြစ်ဆီ ဟပေါနယ့်စွပ်စွဲ ဝမ်းဥပုန အောင်းကွန်းဟောန့် တရားလေး၊ မရားလေးဝါလ တွဲနွေ့အောင်းကောင့်ဝ်ဟင်းဝိုက်။3မွန်းစောင့်ကော့် အောင်းစကွန်းမေးပါ့နိမ်သိုင်းဟောန့် “ရာခနာ့ကွန်းလေ စိန်ကော်” ဆီ ဝါကော်ဝိုက်။4နောက်လောင်နော့် စောင့်ယေရှုလ အောင်းစမနော် “ဝမ်းဥပုနောင်နယ့်လ အောင်းနီးလေ ဟေသင့်လေး နယ့်ပေါမစော် တနယ့်ဟေအောင်းမနီးလေး။ အောင်းအဆတ်ကွန်းကော်နိမ် တနယ့်ကယ်လေး နယ့်ပေါမစော် တနယ့်ဖျတ်စီးလေး” ဆီ ထန်မ်ကော်ဝိုက်။ တော်နယ်ကော့် မနော်လေန မဖြေပေါက်ဟင်းကော့်ဝိုက်။5မေနယ့်လော့် စောင့်ယေရှုန သောဆားအောက်ဆီ အောင်းကွန်းအူရာခန့်မွန်းလေတောင်းလုန် တွဲဆီ ကောပ့်အောင်းမနော်ဟိုချိုင်ညော့ စောဝ်ဆွေ့ကော်ဝိုက်။ နောက်လောင်နော့် မွန်စောင့်န အောင်းကွန်းမေးပါနိမ်သိုင်းဟောန့် “မေးမော ရောန်းအောက်ကော်” ဆီ ဝါကော်ဝိုက်။ ကွန်းဟောန့်ကော့် အောင်းမေးမွန်း ရောန်းအောက်ကော်လော့် မေးမွန်းန နောင်မေစောင့်ကျဉ်းနော့် နီးပေါက်ကော်ဝိုက်။6နောက်လောင်နော့် ဖာရိရှဲလေန အောက်ကွာဟင်းကော်ဆီ အောင်းစောင့်ယေရှု တနယ့်အောင်းဝ်သိုင်းနောင်နူးဝါလ တောင်းကွန်းဟေရုဒ်တောင်း ချရှ်ချန်း ကြမ်ဟင်းကော်ဝိုက်။7စောင့်ယေရှုန တောင်းတပဲ့မွန်းစောင့်လေတောင်း ရာနောင်ဂါလိလဲ ကြွကွာကော်လော့် ကွန်းဖွန်လေကော့် ခလောင်စောင့်ယေရှု စောင်းမ်ကွာဟင်းကော်ဝိုက်။ ကွန်းဟောန့်လေန ဆီမေမှိန်းဂါလိလဲ စဆီ မှိန်းယုဒ၊8မှိန်းဂျေရုဆလင်၊ မှိန်းဣဒုမဲ၊ မှိန်းအောင်းရောင်းတောင်းဖတ်ဟွေ့လုန်ဂျော်ဒန် မှိန်းတုရုတောင်း မှိန်းဇိဒုန် ဆီမေစယ်ခန့်ဟဉ်းမှိန်းဟောန့်လေန ပေးကွန်းစောင့်မားလေဝိုက်။ မနော်လေတောင်းလုန်န ကာအောင်းမွန်းစောင့်ဟေလေ နယ့်ဟဉ်းဟင်းညော့ ရာစောင့်ယေရှု မားဟင်းဝိုက်။9ဖွန်ကွန်းလေန နမ်အားကြီးကော်ညော့ စောင့်ယေရှုန အောင်းစမွန်း ဟပေါမဟီးစပ်တော်ဟင်း အောင်းတပဲ့မွန်းလေ အောင်းစမွန်းစောင့် ဟေးအင်စင်းနိမ် အဆင်သင့် ဟပေါနယ့်မဲဝိုက် ဝါကော်ဝိုက်။10ဟေဟောင်းဆီပေါဝါလော့် စောင့်ယေရှုန အောင်းကွန်းလေမကျေးမလေ အနာရောဂါလေ ဟဟိုင်ညော့ ကွန်းနယ့်ခမ်အနာရောဂါလေန အောင်းစောင့်ယေရှု ဟပေါနယ့်ထိ ဟီးတော်ဟင်းညော့ဝိုက်။11ဖီမနီးအောင်းပူးအောင်းကွန်းလေကော့် ဟောန်အောင်းမွန်းစောင့်ဟင်းကော်လော့် ရာခနာ့စောင့်ယေရှု တောင့်ဝ်ခေါင်ဝ်ဆီ “မောန ပေးလုစိုင်းစောင့်ဖလား” ဆီ စေဟင်းကော်ဝိုက်။12တော်နယ်ကော့် မွန်းစောင့်န အောင်းဖီမနီးဟောန့်လေ မွန်းန ဖောဝါလ အောင်းကွန်းတန်းတီလေ ဟပေါမဝါ ပြင်းပြင်းထန်ထန် ဟောင့်ဝ်ဆတိကော်ဝိုက်။13နောက်လောင်နော့် စောင့်ယေရှုန ခွန့်ခနေနွဲဆီ အနေတပဲ့မွန်းစောင့်တောင်း အောင်းကွန်းမွန်းစောင့်လိုလေ ဟောင့်ကွာကော်ဝိုက်။ မနော်လေကော့် ရာစောင့်ယေရှု မားစူးဟင်းကော်ဝိုက်။14နောက်လောင်နော့် မွန်းစောင့်န ဆီမေခနောဝ်မနော်လ အောင်းဆစ်ပ်ဆောင်န်ကော့် လိတ်ဆီ အောင်းစမနော် အနေသာဝက သတ်မှတ်ကော်ဝိုက်။ နောက်လောင်နော့် အောင်းစမနော် “ခန့်ကော ဟပေါနယ့်ရောင်းဆီ အောင်းမဆူ ကောလိတ်ဝိုက်။ အောင်းကွန်းလေ ဟပေါနယ့်ဟော အောင်းစမဆူ ကောတပွယ်။ အောင်းဖီမနီးလေ အောင်းဟော့်အောက်ပဲ့ အခွင့်အာဏာကော့် ကောဟောင့်ဝ်ရောင့်ဝ်ကော်” ဆီ ဝါကော်ဝိုက်။16နာမယ်သာဝကဆစ်ပ်ဆောင်န်ကော့်ဟောန့်လေန ပေတရုဆီ အောင်းမွန်းစောင့်ဟောင့်ဝ်နာမယ်ဝိုက် ရှိမုန်၊17လုစိုင်းမိုးကြိုးလေဆီ အောင်းအဓိပ္ပါယ်နွိုက် ဗောနေရဂက်ဆီ အောင်းမွန်းစောင့်ဟောင့်ဝ်နာမယ်ဝိုက် လုစိုင်းဇေဗေဒဲ အောင်းယောဟန်တောင်းအောင်းယာကုပ်၊18အန္ဒြေ၊ ဖိလိပ္ပု၊ ဗာသောလမဲ၊ မဿဲ၊ သောမ၊ လုစိုင်းအာလဖဲ ယာကုပ်၊ သဒ္ဒဲ၊ အောင်းဟောက်အမျိုးစောင့်ကောင်ဝ် ရှိမုန်တောင်း19နောက်လောင်နော့် ကွန်းသစ္စာသဖောက်အောင်းစောင့်ယေရှု ယုဒရှကာရုတ်ဟော်ဝိုက်။20နောက်လောင်နော့် စောင့်ယေရှုတောင်းတပဲ့မွန်းစောင့်လေန ရာဟုန်းဟုန်းနိမ် ကြွကွာကော်ဝိုက်။ ဖွန်ကွန်းလေကော့် နောက်လောင်ဟာနိမ် ထီန်ဟင်းမားဟွန်းကော်ညော့ အချီန်ကျဉ်းခေါင်ကျဉ်းလေကိုးသကော့် မနွိုက်ဟင်းကော့်ဝိုက်။21စောင့်ဟုန်းစောင့်ယေရှုလေန အောင်းအကြောင်းဟောန့် နယ့်ဟဉ်းဟင်းကော်လော့် ကွန်းဟောန့်လေန အောင်းမွန်းစောင့် “မွန်းန ဆောပ်ကော်” ဆီ ကွန်းလေဝါဟင်းညော့ မနော်လေန အောင်းမွန်းစောင့် ဟပေါနယ့်ထီန်း ထီန်ဟင်းမားဝိုက်။22ဆီမေမှိန်းဂျေရုဆလင်န အောင်းမား ဆရာကျမ်းစန်လေကော့် “မွန်းန ပေးကွန်းစောင့်ခွန်ဟော်ခမ်းဖီမနီး ဗေလဇေဗုလပူး။ စောင့်ခွန်ဟော်ခမ်းဖီမနီး တောင်းအစွမ်းဗေလဇေဗုလတောင်း အောင်းဖီမနီးလေ ဟော့်အောက်ဆီအူ” ဆီ ဝါဟင်းကော်ဝိုက်။23ကောပ့်နယ့်ညော့ မွန်းစောင့်န အောင်းကွန်းဟောန့်လေ ဟောင့်ဆီ တောင်းပွန်ဥပမာတောင်း ဝါကော်လ “မာရ်နတ်တ အောင်းမွန်းတာင်းမွန်း တဟော့်အောက်ပဲ့နောင်နူး။24ခနောဝ်မှိန်းမှိန်းနိမ်လ ကွန်းလေ စောဝ်မတူဆီ အချန်းချန်း ပေါဆန့်ကျင်ဟင်းလော့် မှိန်းဟောန့်လ မဟူခွေတ် တနယ့်ပျတ်စီး။25နောင်နယ့်ကျဉ်းနော့် ရာဟုန်းဟုန်းနိမ် ကွန်းစောင့်အူနွေ့ဟင်းလေကော့် စောဝ်မတူဆီ အချန်းချန်း ပေါဆန့်ကျင်ဟင်းလော့် စောင့်ဟုန်းဟောန့်လေန တနယ့်ပျတ်စီး။26နောင်နယ့်ကျဉ်းနော့် မာရ်နတ်တ အောင်းမွန်းတောင်းမွန်း ဆန့်ကျင်ဆီ ပေါကွဲပြားလော့် မွန်းန မတည်မြဲပဲ့ဆီ တနယ့်ပျတ်စီး။27ရာဟုန်းကွန်းအားရောင်ဝ်ကော်နိမ် ဖောကော့် အောင်းပစ္စည်းမွန်း ဟဉ်မ်ဆီဟပေါနယ့်အောင်းဝ် လွယ်လွယ်အင်တောင်း အောင်းတခေါင့်ဝ်ပဲ့မစော်။ အောင်းစမွန်း ဟောင်မောက်ဝိုက်အောင်းတိုင်းနဲဟော် အောင်းပစ္စည်းမွန်းလေ ဟဉ်မ်ဆီအောင်းဝ်ဆီအစောင်တနွိုက်ဝိုက်။28အောင်းမဆူ ကောဟောင်တနယ့်ဝါအောင်းစော်ပေါဝါလော့် ကွန်းလေန အောင်းအပြစ်မနော်တောင်းလုန်တောင်း အောင်းစခွမ်းအောင်းစော်ကားအောင်းစောင့်ဖလားပေါဝါလော့် အောင်းခွင့်လွှတ်နယ့်ခမ်ပဲ့။29တော်နယ်ကော့် အောင်းဉာဏ်အလင်းတော် ကွန်းစောင့်စော်ကားဆီတန့်ပေါဝါလော့် အောင်းခွင့်လွှတ်တနယ့်ခမ်မစော်။ မွန်းန ပေးကွန်းနယ့်ခမ်ထာဝရအပြစ်ကော်” ဆီ ဝါကော်ဝိုက်။30စောင့်ယေရှုနယ့်ဝါနောင်နယ့်လ မနော်လေန အောင်းမွန်းစောင့် “မွန်းန ဖီမနီးပူးကော်” ဆီ ဝါဟင်းညော့ဝိုက်။31နောက်လောင်နော့် မယ်စောင့်ယေရှုတောင်း ပီအိုက်နောင့်စိုင်းမွန်းစောင့်လေန ထီန်ဟင်းမားဆီ တောင်းပါ့ခနောက် စိန်ဆီအူဟင်းဝိုက်။ အောင်းကွန်းကော်နိမ်ပွယ်ဆီ အောင်းစောင့်ယေရှု ဟကွာဟောင့်ကော်ဝိုက်။32ဖွန်ကွန်းအောင်းနှောင်ခန့်ဟဉ်းမ်မွန်းစောင့်လေန အောင်းမွန်းစောင့် “ထောင်မ်ဟင်း။ မယ်မောစောင့်တောင်း ပီစိုင်းနောင့်စိုင်း ပီဆောင်ဝ်နောင့်ဆောင်ဝ်မောလေန တောင်းပါ့ခနောက်ဟောန့် ခါအောင်းစောင့်ယေရှုဟင်း” ဆီ တန်ပြားကော်ဝိုက်။33မေနယ့်လော့် မွန်းစောင့်န အောင်းစမနော် “မယ်ကောစောင့်တောင်း နောင့်စိုင်းကောစောင့်လေန ဖော” ဆီ ထန်မ်ပေါက်ကော်ဝိုက်။34နောက်လောင်နော့် မွန်းစောင့်န တွဲအောင်းဖွန်ကွန်းနှောင်ဝိုက်ခန့်မွန်းစောင့်လေဆီ “ကွန်းဟိုက်လေန မယ်ကောစောင့်တောင်း နောင့်ဆောင်ဝ်ကောစောင့်လေဆဲ။35နောင်အလိုစောင့်ဖလားဆီ ကွန်းစောင့်စောင်းမ်ဟေလေန ပေးမယ်ကောစောင့်၊ ပေးပီအိုက်နောင့်စိုင်းကောစောင့်လေ၊ ပေးပီဆောင်ဝ်နောင့်ဆောင်ဝ်ကောစောင့်လေဆဲ” ဆီ ဝါကော်ဝိုက်။
Empower Asia Bible Translation Movement