Mark1
1လုစိုင်းစောင့်ဖလား အောင်းပေးမေရှိယ အကြောင်းစောင့်ယေရှု သတင်းနီး အောင်းကော်မော်ဝ်လ ပေးနောင်နယ့်ဝိုက်။2ခနောဝ်ကျမ်းပရောဖက်ဟေရှာယ အောင်းတင့်မ်ဝိုက်လ“တွဲဟင်းနူ၊ အောင်းခွန်တန်းမော ဟပေါနယ့်မဲ အောင်းစေတမန်ကော ဆာဆီခနာ့မော ကောတပွယ်အောင်းတိုင်းကော်။3မွန်းန အောင်းကွန်းလေ တောင်းဆိန်ကြမ်းကြမ်းတောင်း ရာတီတောင်းကွန်းလေတောင်းကိုင်း စေဆီအူလ‘အောင်းခွန်တန်းစောင့် အဆင်သင့်ဟပေါပေး မဲဟင်း။အောင်းခွန်းတန်းစောင့် ဟနောန်ဟင်း’ ”ဆီ တင့်မ်ဝိုက်ဝိုက်။4ကောပ့်နယ့်ညော့ ရေနှစ်မင်္ဂလာဆရာယောဟန်န ရာတီတောင်းကွန်းလေတောင်းကိုင်း ပေါ်မားဆီ အောင်းအပြစ်လေ အောင်းစောင့်ဖလားခွင့်လွှတ် ဟပေါနယ့်ခမ် နောင်တနွိုက်ဆီ ဟပေါမားခမ်ရေနှစ်မင်္ဂလာ ဟောပြားကော်ဝိုက်။5ဆီမေမှိန်းဂျေရုဆလင်တောင်း ဆီမေမှိန်းယုဒလ ကွန်းတောင်းလုန်န ရာယောဟန် ထီန်ဟင်းမားဆီ အောင်းအပြစ်မနော်လေ ဝန်ခမ်ဟင်းဆီ ရာဟွေ့လုန်ဂျော်ဒန် ခမ်ရေနှစ်မင်္ဂလာဟင်းကော်ဝိုက်။6ယောဟန်န တောင်းခွန်ကုလားအုတ်လေတောင်း အောင်းဟေဝိုက် အောင်းဆေ့လုန် ဟုမ်ဆီ ရာလောန်အိုင့်ပေါဝါလော့် တောင်းနောန်တောင်း အောင်းဟေဝိုက် အောင်းခါးပတ်လ ပတ်ဝိုက်ဝိုက်။ မွန်းန အောင်းကျိုင်းကောင် တောင်း အောင်းနမ့်ဖွီန့်နဲဟော် ကျဉ်းဆီ အူဝိုက်။7ယောဟန်န အောင်းကွန်းလေ “ဆာဆီကော ကွန်းအောင်းချဉ်းမြတ်ကော်နိမ် တထီန်မား။ ကောလ အောင်းဆိုင်ချက်ပ်တဉ်းမွန်း ကိုမ့်ဆီ ဟပေါနယ့်ကျဲယ်ဟောင့်ဝ်ကိုးသကော့် မတန်။8ကောလ အောင်းစမဆူ တောင်းနမ့်တောင်းနဲဟော် ဟောင့်ဝ်ရေနှစ်မင်္ဂလာဟော။ တော်နယ်ကော့် မွန်းန အောင်းစမဆူ တောင်းဉာဏ်အလင်းတော်တောင်း တမားဟောင့်ဝ်ရေနှစ်မင်္ဂလာ” ဆီ ယောဟန်န ဝါကော်ဝိုက်။9မေဝမ်းဟောန့်လေန စောင့်ယေရှုလ အောင်းရောင်းရာစယ်ဂါလိလဲ ဆီမေမှိန်းနာဇရက် န ထီန်မားဆီ မွန်းစောင့်န ရာဟွေ့လုန်ဂျော်ဒန် ရာယောဟန် ခမ်ရေနှစ်မင်္ဂလာကော်ဝိုက်။10စောင့်ယေရှု ဆီမေခနောဝ်နမ့် အောက်မားနွေ့ဆပ် တောင့်ဖန ပူကော်ဆီ ဉာဏ်အလင်းတော်န နောင်ပွန်စံနုတ်တူ့ညော့ လုန်းမားရာမွန်းစောင့်လ နယ့်ဟောန်ကော်ဝိုက်။11နောက်လောင်နော့် ဆီမေတောင့်ဖ “မောလ ပေးလုစိုင်းအောင်းကောနယ့်ဟောက်၊ ကောလ အောင်းစမော အိုက်အားရ” ဆီ ဆိန်ဆိန်နိမ် အောက်မားကော်ဝိုက်။12နောက်လောင်နော့် ချရှ်ချန်းကော့် ဉာဏ်အလင်းတော်န အောင်းစစောင့်ယေရှု ရာတီတောင်းကွန်းလေတောင်းကိုင်း ဟကွာကော်ဝိုက်။13မွန်းစောင့်န ရာတီတောင်းကွန်းလေတောင်းကိုင်း ဟူဝမ်းဆီဆစ်ပ်ပွန့် တော်ပေါဟူ နယ့်ခမ်အောင်းမာရ်နတ်လိဉ်ဝိုက်။ ရာတီဟောန့် တိုးထိန်တိရိစ္ဆာန်အောင်းရိုင်းလေရောင်းမေကော့် ဖီဒေဝါလေန အောန်းအူအောင်းမွန်းစောင့်ဟင်းဝိုက်။14ယောဟန်န အောင်းဝမ့်နယ့်ခမ်ကော်ရောင့်ဝ် စောင့်ယေရှုန ရာမှိန်းဂါလိလဲ ကွာဆီ သတင်းစောင့်ဖလားအောင်းနီးလေ ဟောပြားကော်ဝိုက်။15မွန်းစောင့်န “အချီန်ကောင့်ဝ်မားကော်။ သာသနာတော်စောင့်ဖလားကော့် ကောင့်ဝ်မားကော်ညော့ နောင်တနွိုက်ဟင်းဆီ အောင်းသတင်းနီးလေ ယွန်မ်ဟင်း” ဆီ ဝါကော်ဝိုက်။16မေဝမ်းနိမ်လော့် မွန်းစောင့်န ထီန်ကော်ရာဟဉ်းနမ့်နောင်ဂါလိလဲကော်လော့် အောင်းပေးကွန်းခါပါးလေ အောင်းရှိမုန်တောင်းအောင်းနောင့်စိုင်းမွန်းအန္ဒြေဟော် လာဝမ့်ပါးဆီ ချားအောင်းပိုက်မနော်ဟင်းန ဟောန်ကော်ဝိုက်။17မေနယ့်လော့် စောင့်ယေရှုန အောင်းစမနော် “မားဟင်း၊ စောင်းမ်ဟင်းမားခလောင်ကော၊ မဆူလေန ဆီတဝမ့်ပါးလ အောင်းကွန်းလေ စူးဟင်းဆီ ဟပေါပေးတပဲ့အောင်းစောင်းမ်ခလောင်ကော တနယ့်ဟေနောင်နူးဝါလ ကောတဆောန်ဟောင့်ဝ်” ဆီ ဝါကော်ဝိုက်။18နောက်လောင်နော့် ချရှ်ချန်းကော့် မနော်လေန အောင်းပိုက်မနော်လေ ဝေဝိုက်ကော်ဆီ စောင်းမ်ကော် ခလောင်မွန်းစောင့်ဟင်းကော်ဝိုက်။19မွန်းစောင့်န ဆီမေတီဟောန့် စောင်နိန်အင်ကြွကွာကော်လော့် အောင်းပေးလုစိုင်းဇေဗေဒဲလေ အောင်းယာကုပ်တောင်းအောင်းနောင့်စိုင်းမွန်း ယောဟန်ဟော် ခနေဟေး စပ်အောင်းပိုက်မနော်ဟင်းန ဟောန်ကော်ဝိုက်။20မွန်းစောင့်န ချရှ်ချန်း အောင်းစမနော်လေ ဟပေါစောင်းမ်မားခလောင် ဟောင့်ကော်လော့် မနော်လေန အောင်းပေါ်မနော်ဇေဗေဒဲတောင်း အောင်းကွန်းကျဉ်းငှာလောင်လေ၊ အောင်းဟေးမနော်လေပါ ဝေဝိုက်ဆီ ခလောင်စောင့်ယေရှု စောင်းမ်ဟင်းကော်ဝိုက်။21နောက်လောင်နော့် စောင့်ယေရှုန တောင်းတပဲ့မွန်းလေတောင်း ကွာမှိန်းကပေရနောင်ဟင်းကော်ဝိုက်။ နောက်လောင်ဝမ်းနိမ် ဝမ်းဥပု လော့် မွန်းစောင့်န ရာတလားစလပ် စဆီဟောပြားဆောန်ပြားကော်ဝိုက်။22ကွန်းလေန အောင်းမွန်းစောင့်ဟောပြားဆောန်ပြားလေ အမ်းဟင်းကော်ဝိုက်။ ဟေဟောင်းဆီပေါဝါလော့် မွန်းစောင့်န နောင်ဆရာကျမ်းစန်လေမစော်ဆီ နောင်ကွန်းအာဏာရောင်းကော်နိမ်ဆီ ဟောပြားဆောန်ပြားညော့ဝိုက်။23မေအချီန်ဟောန့် ကွန်းအောင်းဖီမနီးပူးနယ့်ခမ်ကော်နိမ်န ခနောဝ်တလားစလပ်ဟောန့် ရောင်းဝိုက်။ ကွန်းဟောန့်န24“ကွန်းမှိန်းနာဇရက်ယေရှု၊ မောလာဟေဟောင်း အောင်းစဟော။ အောင်းစဟော ခဖျတ်စီးဆီ မောမားလေး။ မောလ ဖောဝါလ ကောဟု။ မောလ ဆီမေစောင့်ဖလား အောင်းကြွမား ပေးကွန်းအောင်းမြတ်ကော်နိမ်” ဆီ စေဟင်းကော်ဝိုက်။25မွန်းစောင့်ကော့် အောင်းဖီမနီးဟောန့် “ရိန်းနူ၊ ဆီမေမွန်းအောက်ကွာနူ” ဆီ ဟောင့်ဝ်အမိန့်ကော်ဝိုက်။26မေနယ့်လော့် ဖီမနီးလ အောင်းကွန်းဟောန့် အိုင့်ဆိုင့်ဟဆောန်ဆီ ဆိန်ကြမ်းကြမ်းစေဆီ ဆီမေကွန်းဟောန့် အောက်ကွာကော်ဝိုက်။27ကွန်းဖွန်လေကော့် အိုက်အမ်းဟင်းကော်ဆီ “အောင်းဟိုက်လေန နောင်းနူး။ အောင်းဆောန်တောင်းအခွင့်အာဏာနောင့်နယ့်လ ဟော ဟာနိမ်ကော့် မနယ့်ဟဉ်းကောင်ဝ်။ အောင်းဆောန်နောင်နူးန။ မွန်းန အောင်းဖီမနီး တောင်းအခွင့်အာဏာတောင်း ဟောင့်ဝ်အမိန့်ကော်လော့် ဖီမနီးလေန အောင်းအမိန့်မွန်း နာခမ်ဆီ နယ့်ဟေစောင်းမ်ဟင်းဝုန်န” ဆီ အချန်းချန်း တန့်ဟင်းဝါဟင်းကော်ဝိုက်။28နောက်လောင်နော့် ချရှ်ချန်းကော့် သတင်းဟောန့်န ရာမှိန်းဂါလိလဲတောင်းလုန် ပျံ့ကော်ဝိုက်။29နောက်လောင်နော့် စောင့်ယေရှုတောင်းတပဲ့မွန်းစောင့်လေန ဆီမေတလားစလပ် အောက်ကွာကော်ဆီ တောင်းယာကုပ်တောင်းယောဟန်ဟော်တောင်း ကြွကွာရာဟုန်းရှိမုန်တောင်းအန္ဒြေဟော်ကော်ဝိုက်။30ထီန်ကော်ဟုန်းဟောန့်ကော်လော့် မယ်စောင့်ရှိမုန်န ခိုင့်နော်ဝ်ညော့ အကြောင်းပင်ခနောဝ်စနွမ်း မနော်လေန အောင်းစောင့်ယေရှု ချရှ်ချန်း တန်ပြားဟင်းကော်ဝိုက်။31ကောပ့်နယ့်ညော့ မွန်းစောင့်လ ကွာရာခန့်မွန်းဆီ အောင်းမေးမွန်းကမ်းဆီ အွမ့်စိန်ကော်ဝိုက်။ မေနယ့်လော့် ရောဂါအောင်းမွန်းခိုင့်နော်ဝ်လ ဟိုင်ကော်ညော့ မွန်းကိုယ်တိုင်ကော့် အောင်းစမနော်လေ တောင်းခေါင်ကျဉ်းလေတောင်း လိမ့်ပဲ့ကော်ဝိုက်။32မေဝမ်းဟောန့် ထီန်အချီန်ဝမ်းတို မားကော်လော့် ကွန်းလေန အောင်းကွန်းပေးရောဂါလေ၊ အောင်းစကွန်းဖီမနီးပူးနယ့်ခမ်လေ ဟောင့်စူးမားရာစောင့်ယေရှုကော်ဝိုက်။33ကွန်းရောင်းရာမှိန်းဟောန့်လေတောင်းလုန်ကော့် ရာခနာ့နာ့ဆိုတူးဟုန်းဟောန့် ထီန်စူးဟင်းမားကော်ဝိုက်။34မေနယ့်လော့် စောင့်ယေရှုန အောင်းကွန်းပေးရောဂါအမျိုးအမျိုးလေတောင်း အောင်းကွန်းမအူနီးလေတောင်းလုန် ရားဟောင့်ဝ်ကော်ဆီ အောင်းစဖီမနီးအောင်းပူးရာကွန်းလေတောင်းလုန်ကော့် ဟော့်အောက်ကော်ဝိုက်။ ဖီမနီးလေန အောင်းလုစိုင်းစောင့်ဖလား အောင်းစောင့်ယေရှု ဟုဟင်းညော့ မွန်းစောင့်ကော့် အောင်းဖီမနီးလေ ခွမ်းမဟာ့တန့်ဝိုက်။35နောက်လောင်ဝမ်းနိမ် ဖမလိန်းခွေတ် စောင့်ယေရှုန လုဆီ ရာတီတောင်းကွန်းလေတောင်းကိုင်းလ ကွာဆီ ရောန်းဆုကော်ဝိုက်။36မေနယ့်လော့် ရှိမုန်တောင်းကွန်းတန်းတီလေန အောင်းမွန်းစောင့် မဟောန်ဟင်းညော့ စောင်းမ်ခါဟင်းဝိုက်။37ခါအောင်းမွန်းစောင့်ဆီ ခေါက်ပ်ကော်လော့် “ကွန်းတောင်းလုန်န စောင်းမ်ခါအောင်းမောစောင့်ဟင်း” ဆီ တန်ပြားဟင်းကော်ဝိုက်။38မေနယ့်လော့် မွန်းစောင့်န အောင်းစမနော် “ဟောလေ ရာမှိန်းမန့်အောင်းခန့်ဟိုက်လေ ကွာဟင်းစို့။ အောင်းစကွန်းအောင်းရာဟောန့်လေကော့် ဟပေါနယ့်ဟော သတင်းစောင့်ဖလားအောင်းနီးလေ ကောမား” ဆီ ဝါကော်ဝိုက်။39နောက်လောင်နော့် စောင့်ယေရှုတောင်းတပဲ့လေန ရာမှိန်းဂါလိလဲ ရာတီတောင်းလုန် ကွာခွန့်ကွာလောင်ဆီ ရာတလားစလပ်လေ အောင်းကွန်းတောင်းလုန် ဟောပြားဆောန်ပြားရောင့်ဝ် အောင်းဖီမနီးလေကော့် ဟော့်အောက်ကော်ဝိုက်။40နောက်လောင်နော့် ကွန်းပေးဆမန်ကော်နိမ်န ရာခန့်စောင့်ယေရှု ထီန်စူးမားရောင့်ဝ် တောင့်ဝ်ခေါင်ဝ်ဆီ “မောစောင့်အလိုပေါရောင်းလော့် အောင်းရောဂါကော ဟဟိုင်ပေါက်ပဲ့စောင့်” ဆီ တောင်းပန်ကော်ဝိုက်။41မေနယ့်လော့် မွန်းစောင့်န အောင်းစမွန်း အီနူကော်ညော့ အောင်းမေးမွန်း ရောန်းအောက်ဆီ အောင်းကွန်းဟောန့် ထိဆီ “ကောအလိုရောင်း။ ရောဂါမော ဟိုင်ကော်” ဆီ ဝါကော်ဝိုက်။42ချရှ်ချန်းကော့် အောင်းကွန်းဟောန့်ပေးဆမန်ကော့် ဟိုင်ကော်ဝိုက်။ ကွန်းဟောန့်ကော့် သန့်ရှင်းကော်ဝိုက်။43စောင့်ယေရှုန အောင်းကွန်းဟောန့် တင်းတင်းကြပ်ကြပ် ဟောင့်ဝ်ဆတိဆီ ချရှ်ချန်းပွယ်ကွာကော်ဆီ44“အောင်းအကြောင်းဟိုက် အောင်းဖောကော့် ပီကွာလောင်ဝ်။ ဆီတဝါနောင်နယ့်လ ရာပုရောဟိတ် လေ ကွာဆီ ပြားကော်။ အကြောင်းရောဂါမောဟိုင်ကော်လ ခနာ့ကွန်းလေ ဟပေါနယ့်ပြားသက်သေ နောင်ပညတ်ကျမ်းမောရှေ အတိုင်း အောင်းခနီးခကပ်လေ ကပ်ကော်” ဆီ ဝါကော်ဝိုက်။45တော်နယ်ကော့် ကွန်းဟောန့်န အောက်ကွာကော်ဆီ အောင်းသတင်းဟောန့် ရာတီတောင်းလုန် တန့်ဆီ ဟပျံ့ကော်ဝိုက်။ ကောပ့်နယ့်ညော့ စောင့်ယေရှုန ခနောဝ်မှိန်း တော်ပေါစိုင် မခေါင့်ဝ်ကော့်ဆီ ရာခနောက်မှိန်း ရာတီတောင်းကွန်းလေတောင်းကိုင်းနဲဟော် နယ့်အူညော့ ကွန်းအောင်းရောင်းရာတီတောင်းလုန်ကော့် ရာမွန်းစောင့်ရောင်း ထီန်စူးဟင်းမားကော်ဝိုက်။
Empower Asia Bible Translation Movement