Mark15
1နောက်လောင်ဝမ်းနိမ် ကန်းနော်ဝ်စောင့်ဝ်စောင့်ဝ်လော့် ပုရောဟိတ်အောင်းရောင်ဝ်လေ၊ ဆရာကျမ်းစန်လေ၊ ကွန်းဂျူးအောင်းရောင်ဝ်လေတောင်း မွတ်တလားလွှတ်တော်လေန အောင်းစောင့်ယေရှု တနယ့်ဟေနောင်နူးဝါလ တိုင်ပန်ဟင်းကော်ဝိုက်။ မနော်လေန အောင်းစောင့်ယေရှု မောက်ဆီ ဟောင့်ကွာရာပိလတ်ကော်ဝိုက်။2ပိလတ်န အောင်းစောင့်ယေရှု “မောန စောင့်ခွန်ဟော်ခမ်းကွန်းဂျူးလေဝါလ စော်လေး” ဆီ ထန်မ်ကော်လော့် စောင့်ယေရှုန “နောင်မောဝါကျဉ်းနော့်” ဆီ ဖြေပေါက်ကော်ဝိုက်။3ပုရောဟိတ်အောင်းရောင်ဝ်လေန အောင်းစောင့်ယေရှု တောင်းအကြောင်းမကျေးမလေတောင်း တန်အပြစ်ဆီ စွပ်စွဲဟင်းကော်ဝိုက်။4ကောပ့်နယ့်ညော့ ပိလတ်န အောင်းမွန်းစောင့် နောက်လောင်ဟာနိမ် “မောန တူးနိမ်ကော့်မဖြေဆီ တအူလေး။ အောင်းစမော အောင်းစွပ်စွဲလေ တွဲနူ” ဆီ ဝါကော်ဝိုက်။5တော်နယ်ကော့် မွန်းစောင့်န အဟောင်းကော့်မဖြေပေါက်ညော့ ပိလတ်ကော့် အမ်းကော်ဝိုက်။6အချီန်ပွဲပသခါထီန်တိုင်း အောင်းကွန်းဖွန်လေရောန်း အောင်းကွန်းအပြစ်ရောင်းကော်နိမ် ပိလတ်တ နယ့်ပွယ်ဟောင့်ဝ်ဝိုက်။7မေအချီန်ဟောန့် အောင်းအစိုးရရောမ ရာအောင်းပုန်ကန်န ကောပ့်အောင်းဝ်သိုင်းကွန်းလေညော့ အောင်းချားထောင်နယ့်ခမ်လေ ရောင်းဝိုက်။ ရာခနောဝ်ကွန်းဟောန့်လေန ကွန်းအောင်းစေဗာရဗ္ဗကော့် ပါဝိုက်။8ကွန်းဖွန်လေန ရာပိလတ် မားဆီ နောင်ဟေကောင့်ဝ်ဟေကောင့်ဝ်ညော့ အောင်းကွန်းချားထောင်နယ့်ခမ် ဟပေါနယ့်ပွယ်ဟောင့်ဝ် ရောန်းဟင်းဝိုက်။9မေနယ့်လော့် ပိလတ်န “မဆူလေန စောင့်ခွန်ဟော်ခမ်းကွန်းဂျူးလေဆီအောင်းဝါ အောင်းကွန်းဟိုက် ခဟပွယ်လေး” ဆီ ထန်မ်ကော်ဝိုက်။10နောင်နယ့်ဆီနယ့်ထန်မ်န ပုရောဟိတ်အောင်းရောင်ဝ်လေန အောင်းမွန်းစောင့် မနာလိုဆီ ရာမွန်း အကြောင်းမားအပ်န ဟုရောင့်ဝ်ကော်ဝိုက်။11တော်နယ်ကော့် ပုရောဟိတ်အောင်းရောင်ဝ်လေန အစားစောင့်ယေရှုန အောင်းဗာရဗ္ဗနဲဟော် ပွယ်ဟောင့်ဝ်ဆီ ဟပေါနယ့်ရောန်း အောင်းကွန်းဖွန် ဆော်ဝိုက်ဟင်းဝိုက်။12တော်နယ်ကော့် ပိလတ်န အောင်ကွန်းဖွန် “စောင့်ခွန်ဟော်ခမ်းကွန်းဂျူးဆီ အောင်းမဆူစေ အောင်းကွန်းဟိုက် ကောတနယ့်ဟေနောင်နူး” ဆီ ထန်မ်ကော်ဝိုက်။13နောက်လောင်နော့် မနော်လေန “အောင်းမွန်း ခနေလက်ဝါးကပ်တိုင် တန်ဆီ အောင်းဝ်သိုင်းကော်” ဆီ စေဟင်းကော်ဝိုက်။14ပိလတ်ကော့် “ကောပ့်အဟောင်း။ မွန်းန အပြစ်အဟောင်းဟေဝိုက်” ဆီ ထန်မ်ပေါက်ကော်ဝိုက်။ တော်နယ်ကော့် ကွန်းလေန “အောင်းစမွန်း ခနေလက်ဝါးကပ်တိုင် အောင်းဝ်သိုင်းကော်” ဆီ ဆာဆီ ကျမ်းကျမ်း စေဟင်းကော်ဝိုက်။15ပိလတ်ကော့် ကွန်းလေဟပေါစောဝ်ကျေနပ် အောင်းစမနော် အောင်းဗာရဗ္ဗ ပွယ်ဟောင့်ဝ်ကော်ဝိုက်။ အောင်းစောင့်ယေရှုပေါဝါလော့် တောင်းခေါင့်ဝိုင်တောင်း ဟတင်ဆီ ခနေလက်ဝါးကပ်တိုင် ဟပေါနယ့်အောင်းဝ်သိုင်း ခနောဝ်မေးစစ်သားလေ အပ်ကော်ဝိုက်။16စစ်သားလေန အောင်းစောင့်ယေရှု ဟောင့်ကွာရာဟုန်းစောင့်ခွန်ဟော်ငွန်းဟင်းကော်ဝိုက်။ နောက်လောင်နော့် မနော်လေန အောင်းစစ်တပ်တောင်းမွတ်မွတ် ရာတီဟောန့် ဟပေါနယ့်စူး ဟောင့်ဟင်းကော်ဝိုက်။17မနော်လေန အောင်းမွန်းစောင့် အနေစောင့်ခွန်ဟော်ခမ်းတောင်း ဟပေါနယ့်အောင်းဝ်မောဝ် ဆေအရောင်အောင်းကမ် နွန်ဟောင့်ဝ်ဆီ တောင်းနမ်လေတောင်း အောင်းဟေဝိုက် အောင်းသရဖူ ခနေဟိုမွန်းစောင့် ဆွတ်ပ်ဟောင့်ဝ်ဟင်းကော်ဝိုက်။18နောက်လောင်နော့် မနော်လေန အောင်းမွန်းစောင့် “စောင့်ခွန်ဟော်ခမ်းကွန်းဂျူးလေ အဆတ်ဟရောင်းဝ်အီ့အွန်” ဆီ စဆီအောင်းဝ်မောဝ်ဆီ စေဟင်းကော်ဝိုက်။19မနော်လေန အောင်းဟိုမွန်းစောင့် တောင်းမိုက်အော့တောင်း ပေးဟာပေးဟာ တင်ဟင်းဆီ တောင်းနမ့်လိုင်းတောင်း ထွီဟင်းကော်ဝိုက်။ မနော်လေန တောင့်ဝ်ခေါင်ဝ်ဆီ ဟေလောက်ဝိုင်ယ်ဟင်းကော်ဝိုက်။20မနော်လေန နောင်နယ့်ဆီ အောင်းစောင့်ယေရှု အောင်းဝ်မောဝ်ဟင်းရောင့်ဝ်ကော်လော့် အောင်းဆေလုန်အရောင်ကမ်န လောင့်ဝေဆီ အောင်းဆေမွန်းစောင့် နွန်ပေါက်ဟောင့်ဝ်ကော်ဝိုက်။ နောက်လောင်နော့် မနော်လေန အောင်းမွန်းစောင့် ခနေလက်ဝါးကပ်တိုင် ဟပေါနယ့်အောင်းဝ်သိုင်း ဟောင့်ကွာဟင်းကော်ဝိုက်။21နောင်နယ့်ဆီ မေကွာလ စစ်သားလေန ဆီမေမန့်န အောင်းပေါက်မားရာမှိန်း အောင်းပေးပေါ်အလက်ဇန္ဒြားတောင်းရုဖုဟော် ကွန်းမှိန်းကုရေနေ အောင်းရှိမုန် ခေါက်ပ်ဟင်းကော်ဝိုက်။ စစ်သားလေန အောင်းစမွန်း လက်ဝါးကပ်တိုင်စောင့်ယေရှု ဟပ်ဆီ အတင်းစောင့်ဝ်ကော်ဝိုက်။22နောက်လောင်နော့် စစ်သားလေန အောင်းစောင့်ယေရှု ရာတီဂေါလဂေါသ ဟောင့်ကွာကော်ဝိုက်။ အဓိပ္ပါယ်ဂေါလဂေါသန ပေးခလောက်ဟိုဝိုက်။23နောက်လောင်နော့် စစ်သားလေန အောင်းစောင့်ယေရှု အောင်းစေ့ပ်လေဟပေါဆတ်ဆာ မုရန်ဆီအောင်းစေ တောင်းရာ့မျိုးနိမ်တောင်း အောင်းဝိုင်အောင်းစပ်ဝိုက် တူဟင်းကော်ဝိုက်။ တော်နယ်ကော့် စောင့်ယေရှုန မဆို့မားဝိုက်။24နောက်လောင်နော့် မနော်လေန အောင်းမွန်းစောင့် ခနေလက်ဝါးကပ်တိုင် တောင်းလိတ်တောင်း တင်ဆီ အောင်းဆေ့လုန်စောင့်ယေရှုလေ ဖောလ တနွိုက်အောင်ထောဝါလ စိုမဲဆီ ခွဲဟင်းကော်ဝိုက်။25အောင်းမွန်းစောင့် အချီန်တန်ခနေလက်ဝါးကပ်တိုင်န ကန်းနော်ဝ်ကောင့်ဝ်မောင်း ဝိုက်။26စစ်သားလေန ခနေလက်ဝါးကပ်တိုင် ခနေဟိုစောင့်ယေရှု အောင်းဆိုင်းဘုတ်တူးနိမ် တန်ဟင်းကော်ဝိုက်။ လိအောင်းတင့်မ်ဝိုက် ရာဆိုင်းဘုတ်န “စောင့်ခွန်ဟော်ခမ်းကွန်းဂျူး” ဆီ ပေးဝိုက်။27စစ်သားလေန တောင်းစောင့်ယရှုတောင်း အောင်းဓားမြဆောင်န်ကော့်ကော့် တောင်းပါ့ကန့်ခွာမွန်းစောင့်ကော်နိမ်၊ တောင်းပါ့ကန့်ဆိုင့်မွန်းစောင့်ကော်နိမ် ရာခနေလက်ဝါးကပ်တိုင် တန်ဟင်းကော်ဝိုက်။28(နောင်နယ့်ဆီ “မွန်းန ရာခနောဝ်စရန်းကွန်းဟေအပြစ် အောင်းဆောင်ဝ်ခေါင့်ဝ်နယ့်ခမ်” ဝါလ လိကျမ်းန တေးမ်မားကော်ဝိုက်) 29ကွန်းခမ့်ဆီကွာလေကော့် ဆောန်ဟိုဆီ “ဟေ့၊ အောင်းဗိမာန်တော် ဖြိုဆီ ဆမ်ဝမ်းအင်တောင်း ကွန်းတတောင့်ပေါက်30ဆီမေလက်ဝါးကပ်တိုင် လုန်းမားဆီ အောင်းမောတောင်းမော ကယ်နူ” ဆီ အောင်းစောင့်ယေရှု စော်ကားဆီ တန့်ကော်ဝိုက်။31နောင်နယ့်ကျဉ်းနော့် ပုရောဟိတ်အောင်းရောင်ဝ်လေတောင်း ဆရာကျမ်းစန်လေကော့် “မွန်းန အောင်းပွန်လေ ကယ်မားမေကော့် အောင်းမွန်းတောင်းမွန်း မကယ်ပဲ့။32အောင်းပေးစောင့်ခွန်ဟော်ခမ်းကွန်းအမျိုးအစ္စရေး မေရှိယန အစောင် ဆီမေခနေလက်ဝါးကပ်တိုင် အောင်းလုန်းမား ကောဟောင်ပေါနယ့်ဟောန် ကောတယွန်မ်” ဆီ မနော်အချန်းချန်း တန့်ဟင်းဆီ အောင်းစောင့်ယေရှု အောင်းဝ်မောဝ်ဟင်းဝိုက်။ တောင်းစောင့်ယေရှုတောင်း ရာခနေလက်ဝါးကပ်တိုင် တောင်လေမိုင်နားတောင်း အောင်းတင်စပ်ဝိုက်နယ့်ခမ်လေကော့် အောင်းမွန်းစောင့် အောင်းဝ်မောဝ်ဟင်းကော်ဝိုက်။33ဆီမေအချီန်ဝမ်းတိန်န တော်ဝမ်းစိုင့်ဆမ်မောင်း ပွန့် နောင်နဉ်းတောင်းလုန်န နပ်ဆိဉ်ကော်ဝိုက်။34အချီန်ဝမ်းစိုင့်ဆမ်မောင်းလော့် မွန်းစောင့်န “ဧလိ၊ ဧလိ၊ လာမရှာဗာခသနိ” ဆီ ကျမ်းကျမ်း စေကော်ဝိုက်။ အဓိပ္ပါယ်ခွမ်းဟောန့်န “စောင့်ဖလားကော၊ စောင့်ဖလားကော၊ အောင်းကော ဟေဟောင်းဆီ ဝေဝိုက်လ” ဆီ ပေးဝိုက်။35ကွန်းအောင်းရောင်းခန့်ဟောန့်လေန အောင်းခွမ်းဟောန့် နယ့်ဟဉ်းဟင်းကော်လော့် “ထောင်မ်ဟင်း။ မွန်းန ဟောင့်အောင်းပရောဖက်ဧလိယ ” ဆီ ဝါဟင်းကော်ဝိုက်။36ဆီမေခနောဝ်မနော်န ကွန်းကော်နိမ်န ပိုင်မားဆီ ဖော့အောင်းစူနမ့်ပဲ့န အောင်းဝ်ဆီ ခနောဝ်ဝိုင်ဆိုမ့် နေ့ဆီ ရာမိုက်အော့မောက်ဆီ စောင့်ယေရှုဟပေါနယ့်ဆို့ ဟောင့်ဝ်ကော်ဝိုက်။ နောက်လောင်နော့် မွန်းန “ဟအူကျဉ်းရာ။ ဧလိယန အောင်းစမွန်း ဟပေါနယ့်ချားတို တမားလေး၊ မမားလေးဝါလ ပေါနယ့်တွဲ” ဆီ ဝါကော်ဝိုက်။37နောက်လောင်နော့် စောင့်ယေရှုန တောင်းဆိန်ကျမ်းကျမ်းတောင်း စေရောင့်ဝ် သိုင်းကော်ဝိုက်။38မေအချီန်ဟောန့် အောင်းရောင်းရာခနောဝ်ဗိမာန်တော် မောန့်ကောန့်ဖာန ဆီမေခနေန တော်ခတောင့်ပွန့် ဆောင်န်ပဉ်စိုက်ကော်ဝိုက်။39ရာခနာ့စောင့်ယေရှု အောင်းစိန်ဆီအူ ဖုကောန်းဆစ် န အောင်းမွန်းစောင့်သိုင်းကော်လေ နယ့်ဟောန်ကော်လော့် “ကွန်းဟိုက်န အောင်းတဲ့တဲ့ကော့် ပေးလုစိုင်းစောင့်ဖလား” ဆီ ဝါကော်ဝိုက်။40ဆီမေအောင်းကိုင်း အောင်းတွဲဆီအူ ကော့်ယဉ်းလေကော့် ရောင်းဝိုက်။ ဆီမေခနောဝ်မနော်န ကွန်းမှိန်းမာဂဒလ မာရိ၊ ယောသေတောင်း အောင်းပေးမယ်ယာကုပ် မာရိတောင်း ရှာလုံဆီအောင်းစေ ကော့်ယဉ်းကော်နိမ်ကော့် ပါဝိုက်။41မနော်လေန ရာမှိန်းဂါလိလဲ မေစောင့်ယေရှုရောင်းန ခလောင်စောင့်ယေရှု စောင်းမ်ဆီ ကာအောင်းလိုလေတောင်းလုန် ကွန်းစောင့်ဟေလိမ့်ဟောင့်ဝ်မားလေဝိုက်။ တောင်းစောင့်ယေရှုတောင်း ရာမှိန်းဂျေရုဆလင် အောင်းစောင်းမ်မား ကော့်ယဉ်းမကျေးမလေကော့် ရာတီဟောန့် ရောင်းဟင်းဝိုက်။42ဝမ်းဟောန့်န ဝမ်းအောင်းနယ့်မဲ ပေးဝမ်းအဖိတ်ဝိုက်။ ဝမ်းစိုင့်မားကော်လော့်43မွတ်အောင်းပါရာတလားလွတ်တော် အောင်းအရေးပါကော်နိမ်ကော့်ပေးဆီ အောင်းသာသနာတော်စောင့်ဖလား ကွန်းစောင့်ထဆီအူ ကွန်းမှိန်းအရိမသဲ ယောသပ်န ရာပိလတ် မကိုးမဟယ် ကွာဆီ အောင်းအလောင်းစောင့်ယေရှု ရောန်းကော်ဝိုက်။44ပိလတ်န အောင်းစောင့်ယေရှု အကြောင်းသိုင်းကော်လ နယ့်ဟဉ်းကော်လော့် အမ်းဆီ အောင်းဖုကောန်းဆစ် ဟောင့်ဆီ အကြောင်းစောင့်ယေရှုသိုင်း စော်မစော် ထန်မ်ကော်ဝိုက်။45ဆီမေဖုကောန်းဆစ်န အကြောင်းစောင့်ယေရှုသိုင်း နယ့်ဟဉ်းကော်လော့် အောင်းယောသပ် အောင်းအလောင်းစောင့်ယေရှု ဟအောင်းဝ်ကော်ဝိုက်။46ကောပ့်နယ့်ညော့ ယောသပ်န အောင်းဖခေါင်ဝ်ဆေ့ဆီ အောင်းအလောင်းစောင့်ယေရှု ဆီမေခနေလက်ဝါးကပ်တိုင် ချားတိုဆီ တောင်းဖာ့ခေါင်ဝ်တောင်း ပတ်ဆီ အောင်းကောင့်ဟဉ်လုန်အောင်းဖောက်ဝိုက် ရာခနောဝ်ချန်းချိန်းဂူ ဝိုက်ဝိုက်ကော်ဝိုက်။ နောက်လောင်နော့် အောင်းကောင့်ဟဉ်လုန်ဟွေနိမ် အိဉ်ဆီ ရာနာ့ဆိုတူးချန်းချိန်းဂူ ပိဝိုက်ကော်ဝိုက်။47ကွန်းမှိန်းမာဂဒလ မာရိတောင်း အောင်းပေးမယ်ယာကုပ်တောင်း မယ်ယောသေ မာရိဟော်န ရာတီအောင်းဝိုက်အောင်းအလောင်းစောင့်ယေရှု ဟောန်ဟင်းဝိုက်။
Empower Asia Bible Translation Movement