Mark14
1အစောင် တောင်းဝမ်းပွဲပသခါ တောင်း တောင်းဝမ်းခေါင့်ဝ်မွန်းတဆေးမပါ ဟပေါနယ့်ဟေ ဆောင်န်ဝမ်းဟော် လိုဟောဝိုက်။ ပုရောဟိတ်အောင်းရောင်ဝ်လေတောင်း ဆရာကျမ်းစန်လေန အောင်းစောင့်ယေရှု ရိန်းစမ့်စမ့် ဝမ့်ဆီ ဟပေါနယ့်အောင်းဝ်သိုင်း ခါတန်းဟင်းဝိုက်။2တော်နယ်ကော့် မနော်လေန “ဝမ်းပွဲလေန ကွန်းလေနီးကိုးယွန့်ညော့ ပီဝမ့်ဟင်း” ဆီ ဝါကော်ဝိုက်။3နောက်လောင်နော့် စောင့်ယေရှုန ရာမန့်ဗေသနိ အောင်းရောဂါဆမန် အောင်းဟဟိုင်မားကောင်ဝ် ရာဟုန်းရှိမုန် ရောင်းဆီအူဝိုက်။ စောင့်ယေရှုန ရာစပွဲ နှောင်ဆီ တကြားကျဉ်းန ကော့်ယဉ်းကော်နိမ်န အောင်းခေါန်ရောင်ဝ် နမ့်ဟောမ်နာဒုအစစ် အောင်းဆောင်ဝ်ဝိုက် တောင်းကောင့်ယဉ်တောင်း အောင်းဟေဝိုက် အောင်းတောင့်ဝ်ဟွေနိမ် ကမ်းဆီ ထီန်မားဝိုက်။ နောက်လောင်နော့် မွန်းန အောင်းတောင့်ဝ်အောင်းတောင်းကောင့်ဟဉ်ခေါင်ဝ်တောင်းဟေဝိုက်န ပူဆီ အောင်းနမ့်ဟောမ်ဟောန့် ခနေဟိုစောင့်ယေရှု လော်တိုကော်ဝိုက်။4မေနယ့်လော့် အောင်းရောင်းရာတီဟောန့် ကွန်းကန့်ဖောင်န သောဆားအောက်ဆီ “ဟေဟောင်းဆီ အောင်းနမ့်ဟောမ်ဟိုက် နောင်နယ့်ဆီ နယ့်ဟေဆွတ်ဆပ်န။5အောင်းနမ့်ဟောမ်ဟိုက် တောင်းဒေနာရီဒင်္ဂါးဆမ်ပတ် ပိုင်းတောင်း ခိုင်ဆီ အောင်းကွန်းဖန်လေ လှူသင့်” ဆီ အချန်းချန်း ဝါဆီ အောင်းကော့်ယဉ်းဟောန့် တန့်အပြစ်ဟင်းဝိုက်။6တော်နယ်ကော့် စောင့်ယေရှုန “အောင်းကော့်ယဉ်းဟောန့် အပြစ်ပီတန်ဟင်း။ အောင်းစမွန်း ဟေဟောင်းဆီ နှောင့်ယှက်ဟင်းန။ မွန်းန အောင်းစကော ဟေအောင်းနီးလေ။7ကွန်းဖန်လေန တောင်းမဆူတောင်း ကူမေ့ ရောင်းဟင်း။ မဆူလေန မေမဆူအလိုရောင်းတိုင်း အောင်းစမနော် စွယ်ပဲ့။ တော်နယ်ကော့် ကောန တောင်းမဆူတောင်း ကူမေ့ တရောင်းပဲ့မစော်။8ကော့်ယဉ်းဟိုက်န အောင်းစကော အောင်းမွန်းတတ်နိုင်ပဲ့လေ ဟေ။ ရာကိစ္စအောင်းသဖောင်အောင်းစကော ခနေတိုးကော တောင်းနမ့်ဟောမ်တောင်း အောင်းလော်ထ။9အောင်းမဆူ ကောတဝါအောင်းစော်။ ရာကမ္ဘာတောင်းဟွေဟွေ ရာတီဟောသတင်းနီးတိုင်း အောင်းလောင်ကော့်ယဉ်းဟိုက်ဟေမားလေ ကွန်းလေန အနေအမှတ်တရတောင်း တတန့်ဟင်း” ဆီ ဝါကော်ဝိုက်။10နောက်လောင်နော့် စောင့်ယေရှုန ဆီမေခနောဝ်သာဝကဆစ်ဆောင်န်ကော့်န အောင်းပေးကော်နိမ် ယုဒရှကာရုတ်န ဟပေါနယ့်ဝမ့်အောင်းစောင့်ယေရှု ဟပေါနယ့်စွယ်ဟောင့်ဝ် ရာပုရောဟိတ်အောင်းရောင်ဝ်လေ ကွာကော်ဝိုက်။11ပုရောဟိတ်အောင်းရောင်ဝ်လေန အောင်းစောင့်ယေရှု ဟပေါနယ့်သစ္စာဖောက် အောင်းယုဒဝါ နယ့်ဟဉ်းဟင်းကော်လော့် စွုမ်းဆီ အောင်းယုဒရှကာရုတ် ဟပေါနယ့်ဟောင့်ဝ်ငွန်း သဘောတူဟင်းကော်ဝိုက်။ ကောပ့်နယ့်ညော့ ယုဒန အောင်းစောင့်ယေရှု ခနောဝ်မေးမနော် ဟပေါနယ့်အပ် ခါအခွင့်နီးဝိုက်။12ဝမ်းခေါင့်ဝ်မွန်းတဆေးမပါ အောင်းပေးဝမ်းပထမ အောင်းစပွဲပသခါ ဝမ်းအောင်းနယ့်ကပ်အောင်းတိုးအင်လော့် တပဲ့စောင့်ယေရှုလေန အောင်းစောင့်ယေရှု “အောင်းစစောင့် ဟပေါနယ့်ကျဉ်းပွဲပသခါ ဟောတနယ့်ကွာမဲရာတီထော” ဆီ ထန်မ်ဟင်းကော်ဝိုက်။13နောက်လောင်နော့် စောင့်ယေရှုန အောင်းတပဲ့ဆောင်န်ကော့် ပွယ်ဆီ “ရာခနောဝ်မှိန်းဂျေရုဆလင် ခေါင့်ဝ်ဟင်းကော်။ အောင်းကွန်းကော်နိမ်ဟပ်မော့်နမ့်မား မဆူတခေါက်ပ်ဟင်း။ မေနယ့်လော့် ခလောင်မွန်း စောင်းမ်ဟင်းကော်။14ရာဟုန်းမွန်းခေါင့်ဝ်န ခေါင့်ဝ်ဟင်းကော်ဆီ အောင်းစောင့်ဟုန်း ‘ဆရာန တောင်းတပဲ့မွန်းလေတောင်း ဟောင့်အောင်းတနယ့်ကျဉ်းပွဲပသခါန ရာတီထောရောင်းဝါလ ထန်မ်မားအောင်းစမော’ ဆီ ဝါဟင်းကော်။15မေနယ့်လော့် စောင့်ဟုန်းန အောင်းစမဆူ အောင်းစဟော အဆင်သင့်အောင်းမဲဝိုက် ရာထပ်ခနေဟောင့်ခြိုက်အောင်းကွမ့် တပြား။ ရာတီဟောန့် အောင်းစဟော အောင်းပွဲပသခါ မဲဟင်း” ဆီ ဝါကော်ဝိုက်။16တပဲ့ဆောင်န်ကော့်ကော့် အောက်ဟင်းကော်ဆီ ရာခနောဝ်မှိန်း ခေါင့်ဝ်ကော်လော့် အောင်းစမနော် နောင်စောင့်ယေရှုဝါမားညော့ တောင်းလုန် ခေါက်ပ်ဟင်းကော်ဝိုက်။ ကောပ့်နယ့်ညော့ မနော်လေန အောင်းစပွဲပသခါ မဲဟင်းကော်ဝိုက်။17အချီန်ဝမ်းစိုင့်ထီန်မားကော်လော့် တောင်းသာဝကမွန်းစောင့်ဆစ်ပ်ဆောင်န်ကော့်တောင်း ရာတီဟောန့် ကြွကွာဟင်းကော်ဝိုက်။18မနော်လေန ရာစပွဲ နှောင်ဆီ အချီန်ကျဉ်းဟင်းနော့် မွန်းစောင့်န “အောင်းမဆူ ကောတဝါအောင်းစော်။ ဆီမေခနောဝ်မဆူ တောင်းကောတောင်းအောင်းကျဉ်းနွေ့ဟင်း အောင်းကော်နိမ်န အောင်းစကော ခနောဝ်မေးကွန်းစောင့်ခအောင်းဝ်သိုင်းအောင်းကော တအပ်” ဆီ ဝါကော်ဝိုက်။19တပဲ့လေန စောဝ်မနီးပေးဆီ အောင်းမွန်းစောင့် “ကွန်းဟောန့်န ကောလေး” ဆီ ကော်နိမ်ရောင့်ဝ်ကော်နိမ် ထန်မ်ဟင်းကော်ဝိုက်။20မွန်းစောင့်ကော့် “မွန်းန တောင်းကောတောင်း ရာပကန်တူးနိမ်န အောင်းခေါင့်ဝ်မွန်း စိုဆီ အောင်းကျဉ်းနွေ့ဟင်း ဆီမေခနောဝ်မဆူဆစ်ပ်ဆောင်န်ကော့်န ပေးအောင်းကော်နိမ်။21လူ့သားတော်န အောင်းအကြောင်းမွန်း ရာလိကျမ်း နောင်တင့်မ်ဝိုက်ညော့ တနယ့်သိုင်း ။ တော်နယ်ကော့် အောင်းလူ့သားတော် ကွန်းစောင့်သစ္စာဖောက်န ကွန်းတနယ့်ခမ်ဒုက္ခဆင်းရဲလေ။ ကွန်းဟောန့်န ဟောင်ပေါမလိမ့်မားကိုးသကော့် ဆာဆီနီး” ဆီ ဝါကော်ဝိုက်။22စောင့်ယေရှုတောင်းတပဲ့လေန တကြားကျဉ်းခေါင့်ဝ်မားခမ်လော့် မွန်းစောင့်န အောင်းခေါင့်ဝ်မွန်း အောင်းဝ်ဆီ အောင်းကျေးဇူးတော်စောင့်ဖလား ချီးမွမ်းဆီ အောင်းခေါင့်ဝ်မွန်း ရာဆီ အောင်းတပဲ့မွန်းလေ ဟောင့်ဝ်ကော်ဝိုက်။ မွန်းစောင့်န “အောင်းဝ်ဆီ ကျဉ်းဟင်း။ ခေါင့်ဝ်မွန်းဟိုက်န ပေးတိုးကော” ဆီ ဝါကော်ဝိုက်။23နောက်လောင်နော့် မွန်းစောင့်န အောင်းကလောက်နမ့်အစ်ကော့် အောင်းဝ်ဆီ အောင်းကျေးဇူးတော်စောင့်ဖလား ချီးမွမ်းဆီ အောင်းကလောက်နမ့်အစ်ဟောန့် အောင်းတပဲ့မွန်းလေ ဟောင့်ဝ်ကော်ဝိုက်။ တပဲ့လေတောင်းလုန်ကော့် အောင်းကလောက်နမ့်အစ်ဟောန့် ဆို့ဟင်းကော်ဝိုက်။24စောင့်ယေရှုန အောင်းစမနော် “ကလောက်နမ့်အစ်ဟိုက်န အောင်းစကွန်းလေ အောင်းလော်တို တောင်းလေ့ကောတောင်း တကြားစောင့်ဖလားတောင်းတကြားကွန်းလေ အောင်းဟေဝိုက် ပေးသဘောတူညီမှုအောင်းမော်ဝ်။25အောင်းမဆူ ကောတဝါအောင်းစော်။ ရာသာသနာတော်စောင့်ဖလား တောင်းမဆူတောင်း အောင်းဝိုင်အစ်ဟိုက် တော်ဝမ်းကောတနယ့်ဆို့မော်ဝ်ဟွန်းမထီန်ခွေတ် ကောတဆို့ကော့်မစော်” ဆီ ဝါကော်ဝိုက်။26နောက်လောင်နော့် မနော်လေန အောင်းစောင့်ဖလား ချီးမွမ်းတေးချမ်း မော်ဟင်းဆီ အောက်ကွာရာနွဲသံလွင်ဟင်းကော်ဝိုက်။27မေကွာနောင်နယ့်လ စောင့်ယေရှုန “ရာလိကျမ်း ‘ကောန အောင်းကွန်းစောင့်လိမ့်တိုး မောင်းသိုင်းကော်ညော့ တိုးလေန တပေးလိုင်ပေးလောင်းဝ်ဟင်း’ ဆီ နောင်တင့်မ်ဝိုက်ညော့ မဆူလေန အောင်းစကော ဝေဆီ တပိုင်အောက်ဟင်း။28တော်နယ်ကော့် ကောန ဆီမေအောင်းသိုင်းန အဆတ်ခွန်းပေါက်မားရောင့်ဝ် ရာမှိန်းဂါလိလဲ ဆီမေခနာ့မဆူ တကွာအောင်းတိုင်း” ဆီ ဝါကော်ဝိုက်။29မေနယ့်လော့် ပေတရုန အောင်းမွန်းစောင့် “ကွန်းတန်းတီလေ အောင်းစမောစောင့် ဟောင်ပေါဝေကော်ကိုးသကော့် ကောန အောင်းစမောစောင့် တဝေမစော်” ဆီ တန်ပြားကော်ဝိုက်။30မေနယ့်လော့် စောင့်ယေရှုန “အောင်းမော ကောတဝါအောင်းစော်။ ဝမ်းနယ့်ကန်းခမ် ကိုင်ဆောင်န်ဟာမခေါန်ခွေတ် မောန အောင်းစကော မဟုဆီ ဆမ်ဟာပွန့် တနယ့်ဝါ” ဆီ ဝါကော်ဝိုက်။31တော်နယ်ကော့် ပေတရုန “ကောန တောင်းမောစောင့်တောင်း တနယ့်သိုင်းပေါဝါကိုးသကော့် အောင်းမောစောင့် မဟုဆီ လုံးဝ တဝါမစော်” ဆီ နီးနီးငမ်းငမ်း ဝါကော်ဝိုက်။ တပဲ့အောင်းတန်းတီလေကော့် နောင်နောင့်ကျဉ်းနော့် ဝါဟင်းကော်ဝိုက်။32နောက်လောင်နော့် စောင့်ယေရှုတောင်းတပဲ့မွန်းစောင့်လေန ရာတီဆုန်ဂေသရှေမန် ဆီအောင်းစေ ထီန်ဟင်းမားကော်ဝိုက်။ မွန်းစောင့်န အောင်းတပဲ့မွန်းလေ “တကြားကောရောန်းဆုန ရာတီဟိုက် နှောင်ဆီ အူဟင်း” ဆီ ဝါကော်ဝိုက်။33မွန်းစောင့်န အောင်းပေတရု၊ အောင်းယာကုပ်၊ အောင်းယောဟန်ဟော် တောင်းမွန်းစောင့်တောင်း ဟောင့်ကွာကော်ဝိုက်။ စောင့်ယေရှုန အိုက်စောဝ်ဆွေ့ဆီ နယ့်ခမ်ဒုက္ခဝေဒနာဆီ34မွန်းစောင့်န အောင်းစမနော် “ကောန နောင်တသိုင်းကော် စောဝ်ဒုက္ခနယ့်ထီန်။ ရာတီဟိုက် တောင်းဆတိတောင်း ထထဟင်း” ဆီ ဝါကော်ဝိုက်။35နောက်လောင်နော့် စောင့်ယေရှုန ရာခနာ့ စောင်နိန်အင် ကြွကွာကော်ဆီ ခနေနောင်နဉ်း အိုပို့ဆီ ဟောင်ပေါပေးပဲ့ ဒုက္ခဆင်းရဲအောင်းတမားန ဆီမေမွန်း ဟပေါမို ရောန်းဆုကော်ဝိုက်။36မွန်းစောင့်န “စောင့်ဖလား၊ အောင်းစမောစောင့်န တောင်းလုန် ပေးပဲ့။ ဆီမေအောင်းကောတနယ့်ကြုံဒုက္ခဆင်းရဲန အောင်းစကော ကယ်ဟောင့်ဝ်အီ့။ တော်နယ်ကော့် နောင်အလိုကောမစော်ဆီ နောင်အလိုမောစောင့်နဲဟော် ဟပေးအီ့အွန်” ဆီ ရောန်းဆုကော်ဝိုက်။37နောက်လောင်နော့် မွန်းစောင့်န ရာတပဲ့ဆမ်ကော့် ပေါက်မားကော်လော့် အောင်းတပဲ့လေနွမ်းနောက်လ နယ့်ဟောန်ကော်ဝိုက်။ မေနယ့်လော့် မွန်းစောင့်န အောင်းပေတရု “ရှိမုန်၊ မော နောင်းနောက်ကော်လေး။ မောင်းနိမ်အင်ကိုးသကော့် တောင်းဆတိတောင်း မထဟင်းပဲ့လေး။”38နောက်လောင်နော့် မွန်းစောင့်န အောင်းစမနော် “ရာအောင်းလိဉ်လေ ဟပေါမနယ့်စောင်းမ်ကော် တောင်းဆတိတောင်း ထဆီ ရောန်းဆုဟင်း။ စောဝ်မဆူလေန အောင်းစော်လေ ခဟေမေကော့် တိုးမဆူလေန အားဆေး” ဆီ ဝါကော်ဝိုက်။39မွန်းစောင့်န နောက်လောင်ဟာနိမ် ကြွကွာဟွန်းကော်ဆီ နောင်မေစောင့်ကျဉ်းနော့် ရောန်းဆုဟွန်းကော်ဝိုက်။40နောက်လောင်နော့် မွန်းစောင့်န ရာတပဲ့မွန်းလေ နောက်လောင်ဟာနိမ် ထီန်ပေါက်ဟွန်းမားကော်လော့် တပဲ့မွန်းစောင့်လေန ဟွေတားလေ မပွတ်ပဲ့ကော့်ဆီ နွမ်းနောက်ဟင်းကော်ဝါလ ခေါက်ပ်ကော်ဝိုက်။ မွန်းစောင့်န အောင်းစမနော် ပိုကော်လော့် မနော်လေန အောင်းမွန်းစောင့် တနယ့်ဖြေပေါက်နောင်နူးဝါလ မဟုဟင်းကော့်ဝိုက်။41မွန်းစောင့်န ရာတပဲ့မွန်းလေ တတိယဟာနိမ် မေကြွပေါက်မားလော့် မွန်းစောင့်န အောင်းစမနော် “မဆူလေန တော်အစောင်ပွန့် နွမ်းနောက်ဆီ ဆောင်းဝ်ဟင်းတုန်းအွန်လေး။ ပေါပဲ့ကော့်။ အောင်းလူ့သားတော် အချီန်တအပ်ရာခနောဝ်မေးကွန်းအပြစ်ရောင်း ထီန်မားကော်။42လုဟင်း။ ကွာဟင်းစို့။ အောင်းစကော သစ္စာဖောက်ဆီ ကွန်းတအပ်လ ရာတီဟိုက် မားဆီအူကော့်” ဆီ ဝါကော်ဝိုက်။43နောင်နယ့်ဆီ တကြားစောင့်ယေရှုဝါလ ဆီမေခနောဝ်တပဲ့ဆစ်ပ်ဆောင်န်ကော့်န အောင်းပေးကော်နိမ် ယုဒန ထီန်မားကော်ဝိုက်။ တောင်းယုဒတောင်း အောင်းပုရောဟိတ်အောင်းရောင်ဝ်လေ၊ ဆရာကျမ်းစန်လေတောင်း ကွန်းဂျူးအောင်းရောင်ဝ်လေ အောင်းပွယ်မား ကွန်းဖွန်လုန်န မိုက်လေ၊ ဖလေကမ်းဆီ စောင်းမ်ဟင်းမားဝိုက်။44အောင်းစောင့်ယေရှု သစ္စာဖောက်ဆီ ကွန်းစောင့်အပ် ယုဒရှကာရုတ်န “ကွန်းအောင်းကောနွုမ်းန ကွန်းအောင်းမဆူတနယ့်ဝမ့်။ အောင်းမွန်း ဝမ့်ဆီ နီးနီးငမ်းငမ်း ဟောင့်ကွာဟင်းကော်” ဆီ အောင်းဟောင့်ဝ်အချက် ဟေဝိုက်ကော်ဝိုက်။45ယုဒန ထီန်မားကော်နွေ့ဆတ် ရာစောင့်ယေရှု မားဆီ “ဆရာ” ဆီ ဟောင့်ဆီ အောင်းမွန်းစောင့် နွုမ်းကော်ဝိုက်။46မေနယ့်လော့် ကွန်းလေကော့် အောင်းမွန်းစောင့် ဝမ့်ဟင်းကော်ဝိုက်။47နောက်လောင်နော့် ရာခန့်မွန်းစောင့် ဆီမေခေနာဝ်ကွန်းအောင်းစိန်ဝိုက်န ကော်နိမ်လ အောင်းဖဆွဲအောက်ဆီ အောင်းခပုရောဟိတ်အောင်းချဉ်းရောင်ဝ် မောက်ကော်လော့် ပဉ်ဟူခဟောန့်န ခတ်ကော်ဝိုက်။48နောက်လောင်နော့် စောင့်ယေရှုန အောင်းကွန်းဟောန့်လေ “မဆူလေန ဟပေါနယ့်ဝမ့်အောင်းကော အောင်းမိုက်၊ အောင်းဖလေ ကမ်းဆီ တော်ပေါနယ့်မားလ ကောလ တောင်းဓားမြလေတောင်း တူညော့လေး။49ကောန ကူဝမ်းကူဝမ်း ရာခနောဝ်ဝမ်းဗိမာန်တော် တောင်းမဆူတောင်းရောင်းဆီ မေဟောပြားဆောန်ပြားန မဆူလေန အောင်းစကော မဝမ့်ဟင်း။ တော်နယ်ကော့် နောင်နယ့်ဆီနယ့်ပေးန ရာလိကျမ်း အကြောင်းကော အောင်းတင့်မ်ဝိုက် အကြောင်းလေန ဟပေးမားညော့” ဆီ ဝါကော်ဝိုက်။50နောက်လောင်နော့် တပဲ့လေတောင်းလုန်န အောင်းမွန်းစောင့် ဝေဝိုက်ဆီ ပိုက်အောက်ဟင်းကော်ဝိုက်။51မေအချီန်ဟောန့် ခနေတိုးစောင့်ကောင်ဝ် အောင်းမောန့်ကွီးတိုးနိမ်နဲဟော် အောင်းနွန်ဝိုက် ကွန်းဆေးအင်ကော်နိမ်န ခလောင်စောင့်ယေရှု စောင်းမ်မားဝိုက်။ ကွန်းလေန အောင်းကွန်းဆေးအင်ဟောန့် ဝမ့်ဟင်းကော်ဝိုက်။52တော်နယ်ကော့် ကွန်းဆေးအင်ဟောန့်န အောင်းမောန့်ကွီး ဝေဝိုက်ဆီ ဆေဖမပါဆီ ပိုင်အောက်ကော်ဝိုက်။53နောက်လောင်နော့် ကွန်းလေန အောင်းစောင့်ယေရှု ရာဟုန်းပုရောဟိတ်အောင်းချဉ်းရောင်ဝ် ဟောင့်ကွာဟင်းကော်ဝိုက်။ ပုရောဟိတ်အောင်းရောင်ဝ်လေ၊ ဆရာကျမ်းစန်လေတောင်း ကွန်းရောင်ဝ်ဂျူးလေန စူးဆီ ထီန်ဟင်းမားဝိုက်။54ပေတရုကော့် တော်ခနောဝ်ဝမ်းဟုန်းပုရောဟိတ်အောင်းချဉ်းရောင်ဝ်ပွန့် ဆီမေမကောင့်ဝ်မကိုင်းန ခလောင်မွန်းစောင့် စောင်းမ်မားကော်ဝိုက်။ မွန်းန တောင်းစစ်သားအောင်းပေါင့်ဝ်လေတောင်း နှောင်ဆီ အောင်မ်ဖိုင်းဝိုက်။55ပုရောဟိတ်အောင်းရောင်ဝ်လေတောင်း မွတ်တလားလွှတ်တော်လေတောင်းလုန်န အောင်းစောင့်ယေရှု ဒဏ်အောင်းသိုင်းဟပေါနယ့်ချား ခါသက်သေဟင်းမေကော့် သက်သေအဟောင်းကော့် မနယ့်ခေါက်ပ်ဝိုက်။56ကွန်းလေန အကြောင်းမွန်းစောင့် မစော်မစီ အောက်တန့်သက်သေဟင်းမေကော့် အောင်းမနော်တန့်လေန တူးနိမ်တောင်းတူးနိမ် မညီဝိုက်။57နောက်လောင်နော့် ကွန်းကန့်ဖောင်န စိန်ဆီ တောင်းစောင့်ယေရှုတောင်းအောင်းဆိုင် သက်သေလေ မစော်မစီ နောင်နယ့်ဆီ အောက်တန့်ဟင်းဝိုက်။58ကွန်းဟောန့်လေန “ကွန်းဟိုက်န ‘ကောန အောင်းတောင်းမေးကွန်းလေတောင်းတောင့်ဝိုက် အောင်းဗိမာန်တော်ဟိုက် ဖျတ်စီးဆီ တောင်းမေးကွန်းလေတောင်း အောင်းမတောင့် အောင်းဗိမာန်တော်တန်းတီတူးနိမ် ဆမ်ဝမ်းတောင်း တတောင့်’ ဆီ အောင်းဝါမားလ ဟောနယ့်ဟဉ်းမား” ဆီ တန့်ဟင်းကော်ဝိုက်။59တော်နယ်ကော့် အောင်းမနော်တန့်လေကော့် မညီဝိုက်။60မေနယ့်လော့် ပုရောဟိတ်အောင်းချဉ်းရောင်ဝ်န ခနာ့ကွန်းလေတောင်းလုန် စိန်ဆီ အောင်းစောင့်ယေရှု “မောန အဟောင်းကော့်မတန့်ပေါက်ဆီ တအူလေး။ ကွန်းဟိုက်လေန အောင်းစမော ဆန့်ကျင်ဆီ အောင်းတန့်ဟင်းန နောင်နူး” ဆီ ထန်မ်ကော်ဝိုက်။61တော်နယ်ကော့် စောင့်ယေရှုန ကမ်းနိမ်ကော့်မဖြေဆီ ရိန်းစမ့်စမ့် အူကော်ဝိုက်။ နောက်လောင်ဟာနိမ် ပုရောဟိတ်အောင်းချဉ်းရောင်ဝ်န “မောန အောင်းဟောချီးမွမ်းဆီတန့် လုစိုင်းစောင့်ဖလား ပေးမေရှိယလေး” ဆီ ဝါကော်ဝိုက်။62စောင့်ယေရှုကော့် “စော်။ လူ့သားတော်န အောင်းဘုန်းတော်ရောင်း တောင်းပါ့ကန့်ခွာစောင့်ဖလား နှောင်ဆီ ဆီမေတောင့်ဖ အောင်းချီဖချီဆီ အောင်းကြွမား မဆူတနယ့်ဟောန်ဟင်း” ဆီ ဝါကော်ဝိုက်။63အောင်းခွမ်းမွန်းစောင့်တန့်လေ နယ့်ဟဉ်းကော်လော့် ပုရောဟိတ်အောင်းချဉ်းရောင်ဝ်န သောဆားအောက်ဆီ အောင်းဆေ့လုန်မွန်းစိုက်ဆီ “ဟောလေန သက်သေအောင်းတန်းတီလေ နောင်နူးဆီသလိုကော့်။64ကွန်းဟိုက်န အောင်းစောင့်ဖလား အောင်းစော်ကားဆီတန့်န မဆူနယ့်ဟဉ်းဟင်းကော်။ ကောပ့်နယ့်ညော့ မဆူထန်နောင်နူး” ဆီ ထန်မ်ကော်လော့် မွန်းစောင့်န အပြစ်ရောင်းညော့ ဒဏ်အောင်းသိုင်းဟောင့်ဝ်သင့်ဆီ မနော်တောင်းလုန် သဘောတူဟင်းကော်ဝိုက်။65နောက်လောင်နော့် ကွန်းကန့်ဖောင်န အောင်းစောင့်ယေရှု တောင်းနမ့်လိုင်းတောင်း စဆီထွီဟင်းကော်ဝိုက်။ မနော်လေန အောင်းနာ့စောင့်ယေရှု အုဆီ အောင်းမွန်းစောင့် တောင်းတားမေးတောင်း နတ်ဆီ “မောန ပရောဖက်ဟောင်ပေါစော် အောင်းမောဖောတင်န စမ်းဟောနူ” ဆီ ဝါဟင်းကော်ဝိုက်။ စစ်သားအောင်းပေါင့်ဝ်လေကော့် အောင်းစောင့်ယေရှု ဟောင့်ကွာကော်ဆီ တင်ဟင်းကော်ဝိုက်။66မေအချီန်ဟောန့် ပေတရုန ရာခနောဝ်ဝမ်းဟုန်း တကြားနှောင်ဆီအူန ခကော့်ယဉ်းပုရောဟိတ်အောင်းချဉ်းရောင်ဝ်န ရာတီဟောန့် ထီန်မားကော်ဝိုက်။67နောက်လောင်နော့် ကော့်ယဉ်းဟောန့်န အောင်းပေတရုအောင်မ်ဖိုင်းဆီအူန ဟောန်ကော်လော့် နီးနီးငမ်းငမ်း တွဲဆီ “မောကော့် တောင်းကွန်းမှိန်းနာဇရက် တောင်းစောင့်ယေရှုတောင်း ပေးကွန်းအောင်းရောင်းမား” ဆီ ဝါကော်ဝိုက်။68တော်နယ်ကော့် ပေတရုန “အောင်းမောဝါလေန ကောမဟု။ ဟုကော့်မဟုထောင်မ်” ဆီ ဝါဆီ တောင်းပါ့နာ့ဆိုတူးဝမ်းဟုန်း အောက်ကွာကော်ဝိုက်။ မေအချီန်ဟောန့် ကိုင်ခေါန်ကော်ဝိုက် ။69ကော့်ယဉ်းဟောန့်ကော့် ပေတရုစိန်ရာဟောန့်ဆီအူလ ဟောန်ကော်လော့် “ကွန်းဟိုက်န ဆီမေခနောဝ်မနော်လ ပေးကော်နိမ်” ဆီ အောင်းကွန်းရောင်းခန့်မွန်းလေ နောက်လောင်ဟာနိမ် ဝါကော်ဝိုက်။70တော်နယ်ကော့် ပေတရုန မဟုဆီ နောက်လောင်ဟာနိမ် ဝါဟွန်းကော်ဝိုက်။ အချီန်စောင်နိန်ဟူမားကော်လော့် ကွန်းစောင့်စိန်ခန့်ဟောန့်လေန အောင်းပေတရု “မောန အောင်းတဲ့တဲ့ကော့် ပေးကွန်းခနောဝ်မနော်ကော်နိမ်။ ဟေဟောင်းဆီပေါဝါလော့် မောန ပေးကွန်းမားဆီမေမှိန်းဂါလိလဲ ” ဆီ နောက်လောင်ဟာနိမ် ဝါဟွန်းကော်ဝိုက်။71ပေတရုကော့် “ကွန်းအောင်းမဆူဝါလ ကောမဟု” ဆီ ကျိဉ်ဆီ ဝါကော်ဝိုက်။72ချရှ်ချန်းကော့် ဒုတိယဟာနိမ် ကိုင်ခေါန်မားကော်ဝိုက်။ မေနယ့်လော့် ပေတရုန “ကိုင်ဆောင်န်ဟာမခေါန်ခွေတ် မောန အောင်းစကော မဟုဆီ ဆမ်ဟာတော်ပေါထိန့် တဝါ” ဆီ အောင်းခွမ်းစောင့်ယေရှုဝါမားလ ဆတိနွိုက်ကော်ညော့ အိုင့်ဆိုင့်ပါးလား ဟိုင့်ကော်ဝိုက်။
Empower Asia Bible Translation Movement