Mark16
1ဝမ်းဥပုရောင့်ဝ်ကော်လော့် အောင်းပေးကွန်းမှိန်းမာဂဒလ မာရိ၊ မယ်ယာကုပ် မာရိတောင်း ရှာလုံဟော်န ရာအလောင်းစောင့်ယေရှု ကွာဆီ ဟပေါနယ့်တား အောင်းဟောမ် လေ ဆေ့ဆီ အောင်းဝ်ဟင်းမားဝိုက်။2ဝမ်းတနင်္ဂနွေ ကန်းနော်ဝ်စောင့်ဝ်စောင့်ဝ် မနော်လေန ရာချန်းချိန်းဂူ ထီန်ဟင်းမားဝိုက်။3မနော်လေန “အောင်းကောင့်ဟဉ်အောင်းရောင်းရာနာ့ဆိုတူးချန်းချိန်းဂူ ဖောအိဉ်ဆီ တဖယ်ဟောင့်ဝ်” ဆီ အချန်းချန်း ထန်မ်ဟင်းတန့်ဟင်းကော်ဝိုက်။4တော်နယ်ကော့် မနော်ထီန်ဆီ တွဲကော်လော့် အောင်းကောင့်ဟဉ်လုန်န တောင်းပါ့ဟဉ်း အောင်းအိဉ့်ဆီဖယ်ဝိုက်လ နယ့်ခေါက်ပ်ဟင်းကော်ဝိုက်။5နောက်လောင်နော့် မနော်လေန ရာခနောဝ်ချန်းချိန်းဂူ ခေါင့်ဝ်ဟင်းကော်လော့် အောင်းဆေလုန်အောင်းခေါင်ဝ် အောင်းနွန်ဝိုက် ကွန်းဆေးအင်ကော်နိမ်န တောင်းပါ့ကန့်ခွာမနော် အောင်းနောင်ဆီအူလ မနော်ခေါက်ပ်ဟင်းကော်လော့် တွန်ဟင်းကော်ဝိုက်။6တော်နယ်ကော့် ကွန်းဆေးအင်ဟောန့်န “ပီတွန်ဟင်း။ မဆူလေန ခနေလက်ဝါးကပ်တိုင် အောင်းအောင်းဝ်သိုင်းနယ့်ခမ် အောင်းကွန်းမှိန်းနာဇရက် ခါအောင်းစောင့်ယေရှုဟင်းမစော်လေး။ မွန်းန ရာတီဟိုက် မရောင်းကော့်။ မွန်းန အဆတ်ခွန်းပေါက်ကော်။ ရာဝိုက်အောင်းအလောင်းမွန်း တွဲကော်။7အစောင် မဆူလေကော့် အောင်းပေတရုတောင်း အောင်းတပဲ့မွန်းစောင့်အောင်းတန်းတီလေ ကွာဆီ ‘စောင့်ယေရှုန ရာမှိန်းဂါလိလဲ ဆာဆီမဆူ တကြွကွာအောင်းတိုင်း။ နောင်စောင့်ယေရှုဝါမားညော့ ရာတီဟောန့် မဆူလေန အောင်းမွန်းစောင့် တခေါက်ပ်ဟင်း’ ဆီ လောင်ဝ်ပြားဟင်းကော်” ဆီ ဝါကော်ဝိုက်။8မေနယ့်လော့် ကော့်ယဉ်းလေန နီးကိုးဆောန်ရူရူဆီ စောဝ်ယွန့်ဟင်းဆီ ဆီမေခနောဝ်ချန်းချိန်းဂူန အောက်ဟင်းမားကော်ဝိုက်။ မနော်လေန နီးကိုးဟင်းညော့ ရာခွန်တန်း အောင်းဖောကော့် ခွမ်းမတန့်ပေးဟင်းကော့်ဆီ အူကော်ဝိုက်။ 9ဝမ်းတနင်္ဂနွေ ကန်းနော်ဝ်စောင့်ဝ်စောင့်ဝ်လော့် စောင့်ယေရှုန အဆတ်ခွန်းပေါက်မားဆီ အောင်းကွန်းမှိန်းမာဂဒလ အောင်းမာရိ မားပြားတိုးအောင်းတိုင်းဝိုက်။ မာရိဟောန့်န မေစောင့် အောင်းဖီမနီးစေတိုး အောင်းစောင့်ယေရှုဟော့်အောက်မားကောင်ဝ် မာရိဝိုက်။10အောင်းစောဝ်ဆွေ့ဆီဟိုင့်ဟင်း တောင်းစောင့်ယေရှုတောင်း ရာကွန်းအူနွေ့ဟင်းမားကောင်ဝ် မာရိန အောင်းအကြောင်းဟောန့် ကွာဆီ လောင်ဝ်ပြားကော်ဝိုက်။11တော်နယ်ကော့် အောင်းအကြောင်းစောင့်ယေရှုအဆတ်ခွန်းဆီရောင်းတောင်း အောင်းစောင့်ယေရှု အောင်းအကြောင်းမွန်းခေါက်ပ်မားလေ မနော်နယ့်ဟဉ်းကော်လော့် မယွန်မ်ဟင်းဝိုက်။12နောက်လောင်နော့် တပဲ့ဆောင်န်ကော့်န တောင်းပါ့မန့် ပိုင်းတန်းဆီ တကြားကွာဟင်းလော့် စောင့်ယေရှုန အောင်းတပဲ့မွန်းဆောင်န်ကော့် မနော်ဟပေါမမှတ် တောင်းပွန်စံအောင်းမတူတောင်း မားပြားတိုးဝိုက်။13မနော်လေန အကြောင်းစောင့်ယေရှု ဟုဟင်းကော်လော့် ရာမှိန်းဂျေရုဆလင် ပေါက်ကွာဟင်းဆီ အကြောင်းဟောန့် အောင်းတပဲ့တန်းတီလေ လောင်ဝ်ပြားဟင်းကော်ဝိုက်။ တော်နယ်ကော့် ဖောကော့် မယွန်မ်ဟင်းဝိုက်။14နောက်လောင်နော့် စောင့်ယေရှုန တကြားတပဲ့ဆစ်ပ်အေကော့်ကျဉ်းခေါင်ကျဉ်းဟင်းန အောင်းစမနော် မားပြားတိုးဝိုက်။ မွန်းစောင့်န ဆီမေသိုင်း အောင်းအဆတ်ခွန်းပေါက် အောင်းစမွန်း အောင်းခွမ်းကွန်းစောင့်ဟောန်လေ မယွန်မ်ဆီ ဟိုချိုင်ဟင်းညော့ အောင်းစမနော် တန်အပြစ်ဆီ ဆုံးမကော်ဝိုက်။15မွန်းစောင့်န အောင်းစမနော် “ကမ္ဘာတော်ပေါစောက် ကွာဆီ အောင်းသတင်းနီး အောင်းကွန်းတောင်းလုန် ဟောပြားကော်။16အောင်းသတင်းနီးယွန်မ်ဆီ ကွန်းခမ်ရေနှစ်မင်္ဂလာလေန အောင်းစောင့်ဖလားကယ် တနယ့်ခမ်။ တော်နယ်ကော့် အောင်းသတင်းနီး ကွန်းစောင့်မယွန်မ်လေန အောင်းစောင့်ဖလားစီရင်အပြစ် တနယ့်ခမ်။17ခနေကော အောင်းကွန်းစောင့်ယွန်မ်လေန အောင်းနိမိတ်လက္ခဏာလေ တဟေဟင်းပဲ့။ တောင်းနာမယ်ကောတောင်း အောင်းဖီမနီးလေ မနော်လေန တဟော့်အောက်ပဲ့။ ခွမ်းအောင်းမော်ဝ်လေကော့် တတန့်ဟင်းပဲ့။18မနော်လေန တောင်းမေးမနော်တောင်း အောင်းငူးလေ ဟောင်ပေါဝမ့်ကော့်ခရောင့်ဝ်၊ အောင်းအဆိပ်အောင်းသိုင်းပဲ့ ဆို့ဆောင်ဝ်ကော်ကော့်ခရောင့်ဝ် အောင်းစမနော် တဟပေးအန္တရာယ်မစော်။ မနော်လေန ခနေကွန်းမအူနီးလေ အောင်းမေးမနော်လေ တန်ဆီ အောင်းကွန်းဟောန့်လေ တဟအူနီး” ဆီ ဝါကော်ဝိုက်။19စောင့်ယေရှုန အောင်းတပဲ့လေ နောင်နယ့်ဆီဝါရောင့်ဝ် စောင့်ဖလားန အောင်းစမွန်းစောင့် ရာမှိန်းခမ်း ဟောင့်ကွာရောင့်ဝ်ကော်လော့် မွန်းစောင့်န တောင်းပါ့ကန့်ခွာစောင့်ဖလား နှောင်ဆီအူဝိုက်။20နောက်လောင်နော့် တပဲ့လေကော့် အောက်ကွာကော်ဆီ ရာတီတောင်းလုန် တော်ပေါစောက် ဟောပြားဆောန်ပြားကော်ဝိုက်။ စောင့်ယေရှုကော့် တောင်းမနော်တောင်း ဟေနွေ့ဟင်းဆီ ခွမ်းသတင်းအောင်းမနော်ဟောလေန အကြောင်းစော်ကော့် တောင်းနိမိတ်လက္ခဏာလေတောင်း ပြားကော်ဝိုက်။
Empower Asia Bible Translation Movement