Wadaddiit Luúkaam13

1Wa diibba kaniisat la diib Andtaakya gale nabyaat wa maqalimiin qalaw wa minnom Barnaaba wa Samqaan la Tsalliim litbahal wa Lukkiyus la baqal Al Ghayrawaan wa Manaayiin la min niúshu baak Hirudos la xaakimma ruboq trabba wa Shaawul.2Wa amqil xatte saaymaam inintom wa Molaay inlaqabdo, la Rox Ghiddus belayom, “Barnaaba wa Shaawul karriso iyye jallaabba shighil la iglu adhekowom.”3Ka xagho semaw wa ddaqaw wa ideyom karaw ittom, nadáwom.
4Wa la Rox Ghiddus kilíitom kim laáka, jahat Sulukiya darraw wa minna asik Ghubrus abxaraw.5Wa Salaamiis dolat batsxaw ib zaqat Rabbi bashsharaw diibba maqaabidda Yahud. Wa Yuxanna littaalayom qala kim sedyaayom.
6Wa killa la jaziirat kaayadaw asik Baafus batsxaw wa ken shaxartaay Yahudi nabi xassaay Baaryashuq la litbahal rakbaw.7Wa hitu min Sarjiiyus Bulus xaakim Ghubrus magharrab qala wa la xaakim zaki nabra. Ka Barnaaba wa Shaawul tlaaka wa zaqat Rabbi igil lidgamo ilu dtalba minnom.8Ka la shaxartaay Qayliim qaaradayom (illa maqnat simetu ta) wa Bulus minna emaan igil liblas xaza.9Darbu Shaawul la Bulis tsamma ibba Rox Ghiddus milú inintu ginnixu it Qayliim atkara10wa belayu, “Inta wilud Abliis inta wa abaay killu raateq inta! Wa ib kil ajnaas ghash wa kidaq mulú inta. Bataatan cawi agbuy Molaay la raatqat iitqabadtir.11Aze ide Rabbi didka igil titmaddad wa igil maddat igil tiqur tu wa tsaxaay ma igil tiré iiko.” Wa it qintaatu shush tsilmut tkarra wa la tetiyu igil lirkab hatamaatama.
12La xaakim la jara dolat raá, amna ajil ib taqliim ib Molaay qijjub qala.
13Wa Bulis wa dtarru min Baafus asik Barja diib Bamfiiliya abxaraw. Wa ken Yuxanna Barnaaba wa Bulis tfanta wa asik Orshaliim qaghbala.14Wa hitom min Barja asik Andtaakya la diib mudiriyat Bisiidya saafaraw. Wa la maqbad la Yahudi ataw amqil sabit wa tgassaw.15Wa xagho minna shariiqat wa akitbatta nabyaat gharáw, la merxatta maqbad zaqat laákaw ittom, “Xawna, igilla shaqab liíkat adfaót min bikum, ib maqrufkum bola minkum.”
16Ka Bulis bidtaaru gabá wa ib idehu ashshara wa bela, “Shaqab Israíil wa umammiyiin la Rabbi taqabdo, attansuni.17Rabbi shaqab Israíil abawna xara wa shaánna shaqab rafqa itta la diib Masir kaláwa wa ib xiilat xaaylat minna balad lahay la shaqab afgara.18Wa igil maddat qarbaqa sanat latghaarib diibba dangarat kahalayom.19Wa min ardat Kanqaan saboq shaqab nawaka wa awrasayom ta.20Wa illi killu qarbaq miít wa ximsa sanat lagabbí kalá.
Wa xaghohan Rabbi ghaadyotaat wada ilom asik waghit nabi Samuíl.
21Wa xare la shaqab malik dtalba minnu wa Rabbi Shaawul wad Ghiis min ghabilat Binyaamiin shayyama ittom wa qarbaqa sanat xakmayom.22Wa xare Rabbi qandtalayu wa Daawid shayyama ittom wa Rabbi, ‘Daawid wad Yassi inaas libye waafigh rakabkowu,’ bela ittu. Wa, ‘Killu la ilu iradde wadde.’ 
23Wa asik Israíil Rabbi min talak Daawid Mangifaay baqasa kimma waqadaya. Wa hitu Yasoq tu.24Wa ghadam mitsát Yasoq, Yuxanna Al Maqmadaan killu shaqab Israíil asik maqmudiyat tobat tlaaka.25Wa Yuxanna seru inlaátammim bela, ‘Ana min imaslakkum halleko? Ana hitu yaána. Hitu xaghoye igil limtsá tu, ana fetxaay siraak isínu igil ibgá yaástihil.’
26Xawye min wilaad Ibraahiim wa umammiyiin ferhat Rabbi, zaqatta mangafo asikna tlaákat.27Shaqab Orshaliim wa xikkaamom Yasoq iifarragaw wa misil illi ib xaakamotu zaqotaatta nabyaat la kil sabit titgharrá atmamaw.28Jarimat mot taqabatstsex inde iirakbo ittu min Biladtos igil laqaghtillu dtalbaw.29Wa killu la tkattaba ittu xagho naffazaw ittu, minna saliib karawu wa diib ghabir ghabrawu.30Wa laakiin Rabbi min mot qaghnatsayu.31Wa igil amqilotaat bizxaat igilla min Al Jaliil asik Orshaliim saafaraw mislu abhaza. Wa hitom aze igilla shaqab lishshido ilu.
32Wa xina illa xina ibba Rabbi abawna waqada ibbu inbashshirkkum hallena.33Wa igilna wilaadom atmamayu ajil Yasoq min mot qaghnatsa kimma diibba Mazmur la kaaláay tkattaba,‘Inta walye inta;yom abuka gaáko.’ 34Rabbi min mot qaghnatsayu wa matqashqaash bataatan kim iirakkibbu, tahaaga,‘Illa wuqud la ghiddisit wa imnitla Daawid waqadko ibbaigil habakkum tu.’ 35Wa diib mazmur biqid Daawid libil,‘Ghidduska igil litqashqash iittaázzim minnu.’ 36Daawid it gimmu ghasid Rabbi kadma wa darbu mota wa qaaghaab abawu tsabdta wa min matqashqaash iitarfa.37Minnaata Rabbi la min mot qaghnatsayu, matqashqaash yaqarrayu.
38Sababu xawye yahaw, ib Yasoq ib maghfirat zinub titbashsharo.39Wa ib gabeyu la laámmin killu min kil zanib litbarrá. Shariiqat Musa laata kiínna igil tide iitghaddir.40Ka daggago la nabyaat belawu igil iilidtdtabbagh itkum:41‘Intim ghebbat ginxowa taqajjabo wa hilako.Ana it maddatkumwiddaay nafar ma min laássilakkum ibbuwiyaámankumuigil ide tu.’” 
42Wa Bulis wa Barnaaba la maqbad inlaxadgo la shaqab la sabit la ghiblaata ibbilli sinaq igil laádrusom dtalbaw minnom.43Wa xagho la ijtimaaq aktama bizxaam minna Yahud wa la mathawidiin la qebdat asar Bulis wa Barnaaba gabáw wa hitom haye diib niqimat Rabbi igil lisbato tfaanawom.
44Wa itta sabit la ghiblaata, ib gabbí killa la madiinat jammaqat zaqat Molaay igil lismaqo.45Wa waan la Yahud la maxaabir raáw ib ghiirat malláw wa la Bulis libillu qala qaaradaw wa qayarawu.
46Wa darbu Bulis wa Barnaaba ib bataakat balsaw ittom, “Ib zaqat Rabbi igil nibalghakkum ib salif daruri qala wa sabab tgaarafkuma, it nafiskum kim xayot diima iitaástihilo xakamkum. Ka aze jahatta umammiyiin nitwallab hallena47jalla Molaay ibbilli wassenna wa bela,‘Igilla umammiyiin nur wadekokaasikka firadda midirmangafo igil laámtsí.’” 48Ka la umammiyiin illi xiin samqaw farxaw wa zaqat Molaay sharrafaw. Wa killom la Rabbi igil xayot diima qayyanayom amnaw.
49Wa zaqat Molaay diib killa la mandtighat tnashsharat.50Laakiin la Yahud la anis la ferhiyaat Rabbi la simuyaat wa la sab la merxatta madiinat fatnaw. Wa did Bulis wa Barnaaba dtaras harrasaw wa min mandtighatom dtardawom.51Ka min qaaghaabom qisaas nagfaw kim ishaarat nagot wa asik Iighuniya gesaw.52Wa la darasa ib lawagh wa ib Rox Ghiddus miláam qalaw.

Summer Institute of Linguistics Ethiopia

https://app.library.bible/content/9497b5e348514f38