Wadaddiit Luúkaam11

1Wa la luúkaam wa la xaw diib Al Yahudiya la Yahud la iigabáw ma zaqat Rabbi tkabbataw samqaw.2Ka Budtrus asik Orshaliim waan qaghbala emnatta kishbo atgaalalawu3wa belawu, “Inta bet xilalaataat ateka wa balqaka gorom!”
4Ka Budtrus ib isirur la jara sharxa ilom wa bela,5“Diib madiinat Yaafa iddeqe qalko wa jazabat tkarret ichche wa diib rúya sanqat cirraamat waasqat massil ib qarbaq rikina tsibdtit min qastar asikye intijjarbab reékowa.6Wa dolat shimuy ganxakowa ajnaassa xaywaanaat la ib qarbaq taakish wa la aawaat wa la lemmat wa la sarayir reéko.7Wa kirin samqako wa telanni, ‘Wo Budtrus, kib de, xirad wa bilaq.’8Ka balasko, ‘Bataatan abajá Molaay! Diib afuye sanqat xirrim aw najsat laawish yaána.’9Ka la kirin la qastariyat ib xadiis, ‘Rabbi la adtharayu, inta najis iitismayu,’ belat.10Wa illi salas dol tkarrara wa xare killu asik qastar tsaxaba.
11Wa asaru la salas inaas la min Ghaysariiya tlaákaw ichche itta betta xidrinnachche attabdtaraw.12Wa la Rox imbal atmakaalót igil igiis gorom ammarenni. Bardu illom sis xu talawni wa betta inaas atena.13Wa assaálenna ib kafo maláak diib betu abhaza wa belayu, ‘Asik Yaafa laák wa Samqaan la Budtrus litkanne atlaake.14Wa hitu liíkat igil lijlab ikka tu ibba inta wa dtewaaka killom tnagfo.’
15Wa waan igil ithaage ambatko Rox Ghiddus tkarra ittom kimma la itna tkarraya ib salif.16Wa xare la Molaay belayu faghadko, ‘Yuxanna ib maay qammada laakiin intim ib Rox Ghiddus igil titqammado tu.’17Ka Rabbi nafsa la wahabat la inna habaya xahgo habayom, xina la ib Molaay Yasoq Al Masex amanna, ana min inde gaáko Rabbi itqaarad?”
18Illi waan samqaw maghaawamatom aktamat wa Rabbi xammadaw, “Ka Rabbi igilla umammiyiin ma tobat igil rakiib xayot mannaxayom.”
19Minnaata la ibba sababba matkalaabaat la misil matrajjaam Istifaanus litásaasar tfandtaraw Finiighiya wa Ghubrus wa Andtaakya batsxaw wa hitom ibba liíkat la Yahud kaw bashshiro qalaw.20Gale min Ghubrus wa Al Ghayrawaan laata Andtaakya batsxaw wa la Yunaaniyiin igil lithaagaw astabdaw wa ib bishaarat Molaay Yasoq assaálawom.21Wa ide Molaay baakom qalat wa bizxaam amnaw wa it Molaay tobaw.
22Wa kabar illi kaniisat Orshaliim batsxa ka Barnaaba asik Andtaakya laákaw.23Wa waan batsxa wa daliil niqimat Rabbi raá farxa wa killom atxaadtara diib Molaay igil lisbato ib killa albaabom.24Wa hitu inaas sanni wa ib Rox Ghiddus wa emaan miló qala. Wa addaam bizxaam ib Molaay amnaw.
25Asar illi Barnaaba asik Dtarsus twajjaha Shaawul igil lixize.26Wa dolat rakbayu asik Andtaakya matsá ibbu wa igil sanat ib gidiida Barnaaba wa Shaawul baakka kaniisat laájtamqo wa maxaabir laqallimo qalaw. Wa diib Andtaakya la darasa Masixiyiin igil lissammaw astabdaw.
27Ittilli waghit illi gale nabyaat min Orshaliim asik Andtaakya darraw.28Wa fingehom nabi Aghaabus la litbahal qala. Ka bidtaaru gabá wa ib waxey min Rox ib majaaqat daaghbat killa la idduniya tshammil tnabbaá. (Wa illi it waghit shiimat Kuludiyus tamma.)29Jalliib illi la darasa kil minnomka qadad ghidratu igil litbarraq igilla xaw la diib Al Yahudiya gharraraw.30Wa illi ib laákot sadaghaatom asikka sabba gats ib ide Barnaaba wa Shaawul wadawu.

Summer Institute of Linguistics Ethiopia

https://app.library.bible/content/9497b5e348514f38