Read Koreeg nà moog‑e 49

Koreeg nà moog‑e49

¹Yagob e tarb jaalge inəgin e bii'ĩgən: “Əddú dəəŋ te ã kurəs ũgun é jisig nà ẽ əddũgun é mun ná leeŋ.²Məldú ug fiŋə jaalge é Yagob. Fiŋə aan, baaw uyun Isrəilə.³Rawbin, oono jaa əən é mooge, oono a kossé é buŋuri, é jaalge ənəgə iilgə kay oon kaadel segare.⁴Uuŋ pərə̂n taw ar waa nà jaal é kusuurin‑i, war û əə jaa é mooge ta wa, é kora u nəgsǐ èg od ná dö baawn ná dhəm‑i, u jis jisə ná ənǐ‑i nəəmsa laan.⁵Samoon èg Lawini jag é karaaben. Kaɲarg iyəgin nee é dafân.⁶Ar â bədí ä ŋalga é koreeg iyəgi wa, war ar â ané é wag ná məlíigǐ wa, é kora bânê rayneege 'tir̂níigǐ wag‑e o de ceeng iyəgin ɲammân kaadelg ëg luugu.⁷Bii Tel ẽ mirrí ray iyəni ná ən te, é kora ray iyəni kuyjǐ tui. Â mir é məyədi â laa iilgə dhogeeg â 'səwrəndiigə ta ta taman é gaam Isrəil.⁸Yəusə, ö awleeg ê maâno. Û gər jag nà ŋəmən oon‑i. Jaalgeen nà dö baawn ê gùrum ũnu tad.⁹Jaa əən Yəusə, u təə ar bərd ɲaanee‑ne. U dəfí oɲ uun‑i o tazaga é wag uun ná u nəə̂nǐ‑i. U təə ar bərd ná ẽ peelda tad‑e ɲel kojo iiŋ wa'ee‑ne. U təə ar bərd ná ɲee'ee‑ne. Ŋənə ẽ 'ugsuduun taw‑e?¹⁰Ü məyədə ê goo məŋid é seenaag‑e, mogord é seenaaga ê pall dëg isigə tad wa ləŋ jen ná bel məŋid diilg‑i ẽ addé, kaŋeeg kay addeeg‑oolo ê fiŋə̂níigǐ kor iinin.¹¹Yəusən ê tifə cool iinin é guldu é sawa, ê tifə cool ɲaa iinin é guldu é sawa ë aas ná weed‑e, ê bay goog inəgin é saa, ê bay goog inəgin é feg é sawag.¹²Eelga ê tall beer é asiir ná bilǐ naa tui èg iig nà bilǐ talg naa tui.¹³Sabulun ê an deel‑ɲiid. Wag iini ê aa wag ná poorg rə̂níigǐ‑i, eeg inəgin ê baa ləŋ é Sayda.¹⁴Yasaakara taa ar cool ná segar poolân tad é pareeg dë beɲaagee‑ne.¹⁵E tursu wag man ná weeda ẽ fundǐ‑i, e ɲaar é jega dë ool. Ê tal ë ŋalg tad dhəmdi, kazaam ná dhusǐ‑in.¹⁶Dan ê liŵn koreeg é jag inəgin ar wisəg ë muug nà é Isrəil‑i.¹⁷Dan ê aa dəər, darga'e teed‑eelg. Ê inə̂n mosor dë luug jen ná əní dë ool‑e e wala taare.¹⁸Məi Tel, a bomân oon ũ fidaan.¹⁹Jaad ê burî gəəzəəgi, gəl ê dəfiigə tad ê guniigə.²⁰Namees é Aciirə ê aa é weeda, ê gafa namees ná cuu taa ar ná gafân məliigən‑i.²¹Naftali taa ar maaw ná kar dë kor‑e, kon ɲalgen eg wiəgí.²²Yusifə taa ar kandal ná koônee‑ne, ná tall teerma ruud‑ɲiid isig baân ko kund‑i.²³Jag é raŋogo eg buríigi é muguri ná guníigǐ‑i, eg tumíigi é raŋog jajam.²⁴Gəl e gon raŋo iini dë aas ciciləŋ, isig ê aa eg segarg é segard é Tel é Yagob, é kor é Tela ná paa Isrəil ar kasa ná paa miəgii‑ni,²⁵é kor é Tel ná dö baawn ná coroon‑e, é kor é Tel ná Segar ná əildə uuŋ é əild é koy ná lee taw aweelg‑e èg é əild é fega nà billǐ tad addeeg‑e, e əild uuŋ u bil jaalgeeg èg lewdag eg talg.²⁶Əildəg é faa uun maŋga bəidə gaamg nà taa juund‑i bəidə dəwəg nà juund‑i. Bii əildəg nee kay ẽ adda é Yusif eel ná təldǐ ẽ goddo awleegen‑e.²⁷Benyamin taa ar əəl é leeleeg‑e ẽ bellda oɲ iinin é bimsəg‑i, e lədí eelga golgan é jiig.”

²⁸Jag nee kay egan wisəg é Isrəiliig ë muugu nà taa əsəgdi èg nà dhaag. Kora faa iyəni kursí‑i een nii. Eg kay‑e e əildí iiŋgə jaam əildəg inəgin diiŋ.

²⁹Gəl e thiindiigə e bii'ĩgən: “Â waja â tir. Ug durda èg dä baawaade é fol é baal ná gafa‑eelg maa Afron ná Esse,³⁰baal een gafa‑eelg é Makfiila teerma é Mamara é Kanaan. Ibrəim məərsi ẽ adda fol é duri èg gafa gar é Afron ná Esse.³¹Ibrəim èg od iinin Sarane e duriigə tu, Esaaga èg od iinin Rifgəni e duriigə tu, aan a dur Liyan tu.³²Gafan èg baale marsána gar é Esseeg.”³³É gara Yagob cinsǐ thiinsəg èg jaalge inəgin‑i, e war ë luugu taw aŋar‑ool e tir ë kuuzəg e waj èg dë məyədini.

Pioneer Bible Translators

https://app.library.bible/content/a230cccfbf4362be