Read Koreeg nà moog‑e 50

Koreeg nà moog‑e50

¹Yusif e wal é faa‑eel e on e kuɲin dë fəndəg.²Gəl Yusifə e kor dhəmg inəgin biig nà akeemg‑e ẽ cəgdíigə iiŋ ẽ məɲdíigə iiŋ é əyəg. Aneenda akeemg e məɲíigǐ iiŋ é əyəg eg jisíigǐ iiŋ é kəmul.³Eg mag eg məɲə̌níigǐ iiŋ é əyəg naaga 40. Naag nà məɲə̌nə ná jen é tirsí‑i egan nee. Məsiriig eg on Isrəilən naaga 70.⁴Naag nà onsâna jen‑e kuyjǐig‑i, Yusif e bee jag faŋg é Firuunun: “A naa gəmsəgə cuwəd gar uyu‑i, əddə kurú Firuunun⁵ä baaw korsé ə̃nə: ‘Billə ö aas tad de a waja â tir. Duraan é fol ná a gəɲsí ä ŋalgan é gaam Kanaan‑e.’ Bare bii'aan ã durûn ä baaw de â mərə̂n.”⁶Firuun e bii'ĩnə: “Way u durûn ö baawn ar ná u billdí ĩnə ö aas tadee‑ne.”⁷Aneenda Yusif e doos e waj ẽ durdí faan. Jag faŋg é Firuun èg jag faŋg nà é Məsir‑i kay e wəjíigə èg deene,⁸èg jag é maag é Yusifə èg awleege èg jag é maag é faan e wəjíigə èg deene. Bijjí jeem é Jasaan wa, jaalgeen iyəgin èg miəg iyəgin èg tog iyəgini egan farsé jo.⁹Karogo é mas èg jag é mosoreega e waj di. Kaŋ mada əndəg.

¹⁰É gara cəggsíigǐ wag ná əmdə̂n na jerg é Ataad, teerma é Urdun‑i, e òn əndəg. Yusif e tall naag idig dhaag nà ẽ ondôna faan‑e.¹¹É gara Kanaanga nà an é wag naan‑e tursíigǐ jag nà oné é wag ná əmdə̂n na jerg é Ataad‑e, eg bee: “Ungə nee maŋga Məsiriigən.” Enna wag ná teerma é deel Urdun‑i nagsána een Ung é Məsiriig‑i.¹²Aneenda jaalgeen é Yagob eg jìs ar ná korsána ĩgənii‑ni.¹³Eg wəríigin e wəjíigǐ deena é Kanaan e duríigin é baal ná gafa‑eelg é Makfiila teerma é Mamara ná Ibrəim məərsǐ èg gafane gar é Afron ná Esse ẽ adda wag é dur‑i.¹⁴É gara Yusifə dursǐ faan‑e, e taa é Məsir èg awleegee‑ne èg jage kay nà wajjé èg deene ẽ durdí faan‑e.

¹⁵É gara awleeg é Yusif tursíigǐ faan iyəni tirsí‑i eg bee: “Aga jis ɲii bare Yusif e warsâ ko dum dəəŋg é jisə ná ag jissǎ een jam‑e?”¹⁶Aneenda eg doos eg cug é Yusif iiŋ eg bee: “Ö baaw bijjí ə̃gən kor man tad bara ẽ tirdə¹⁷beên: ‘Kurú koran Yusifən a ɲam ẽ biddə ugu é jisə ná ən ug jissú'in jam‑e.’ Bare ag ɲam ũ bijaaga é jisə ná ən ag jissí, aga dhəmg é Tel é faa uun.” É gara kor iyəni lijjǐ diiŋ‑i Yusif e ko.¹⁸Awleegen e adaga e wəlíigə dë muu eg bee: “Aga dhəmg unugu.”¹⁹Gəl Yusif e bii'ĩgən: “Ar kojon e bəgí ogo wa. Aan Tel a?²⁰Ug jissú ə̃nə kora əní‑i paseg, gəl Tel jissí kora weed‑e, gar ẽ ciində kora a jissə é naanda nii a gossě jag ë ŋəlgə eg talg ná ẽ tirdíigǐ‑i.²¹Ar ugu nəəmdú uuŋg kojo wa de â 'nəəmduugu è jaalge uyugi.” E kurí èg dege maŋ é kora weeda e 'ədí ëg bonaaga maŋ.

²²Yusifə assé é Məsirə èg jag nà dë baawanee‑ne. Duug inəgin nà əssí taǎn 110.²³Tursí jaalgeen é jaalge é Afrayim. E tur jaalgeen é Makiir, jaa é Manasa, nà kossána ĩn‑i.²⁴Gəl Yusif bee awleegen: “Aan a waja â tir. Gəl de Tel nâ raa èg doge é see ê goo'oogo tu é alda niinə ê way dogo é aldan ná tiwsí meeda èg Ibrəim, Esaaga èg Yagobe.”²⁵Yusif e 'billd jaalgeen é Isrəilə isig tad, e bii'ĩgən: “Tel e ragsâ èg doge e gossoogo tuu te‑e, u wərdə aamg ənəg èg doge.”²⁶Aneenda Yusif belǎn duugu 110 e tir. Eg məɲíigə iiŋ é əyəg e ləsíigə iiŋ é jeesa e təlíigin èg dege é Məsir.

Pioneer Bible Translators

https://app.library.bible/content/a230cccfbf4362be