อ่านหนังสือ Koreeg nà moog‑e 45

Koreeg nà moog‑e45

¹Aneenda Yusifə garsa ã bagda ë bon taw é jag muugu wa, e ko taw e kor jagan: “Wəidə tui dä muu!” O jaam taǎn é Yusif muu wa é gara rimsǐ ë ŋalga awleege‑ne.²Yusif e ko taw əndəg ləŋ Məsiriigə èg jag nà teyag maa Firuun‑i e fìŋə di.

³Yusifə e bee awleegen: “Aan Yusifə! Ä baaw bur den wag a?” Gəl awleege war garsa ẽ pəddíigə ĩnə kor man wa é kora bagsê kojoneeg‑e.⁴Gəl Yusif e bee awleegen: “Lizzú dəəŋ teerma te.” Eg juríigi teerma diiŋ. E bii'ĩgən: “Aan ö awl Yusifə ná ug mərsú é Məsir‑i!⁵Ar ugû pədú duuŋg é jisə ná ug jissú jam u 'mərsú aan é Məsir‑i wa, é kora Tel cugsǐ aan dü muug ã fedoog‑e.⁶Bare kun namsa duugu dhaag addeeg‑oolo, tum ê aa tu wa èg suuni é duug nà leeŋ asaman‑e.⁷Gəl Tel cuu'í aan dü muug, jissə koren gar ẽ 'əndí taaz é muun uyun addeeg‑ool. Tel e jissə jisig nà maŋg ẽ feddoogo.⁸Aneenda ogon cugí aan te wa, de Tela. 'Əssə aan jen ná faan é Firuun é aaɲ‑e, seen é jag é maag inəgin kay, jaa faane a goo Məsir kay.⁹Bare təə é raw ane é faa əən iiŋ ug kur ĩnə Tel 'əssə aan seende é Məsir kay. Gəl ê adé é raw ar e rəgə̂ní wa.¹⁰E lii'î‑i ẽ awda teerma dä beɲj é gaam Jasaan, een èg jaalge inəgini èg məyəd inəgini èg tog inəgini èg miəg inəgini èg kaaŋa iini ná bilinǐ‑i kay.¹¹De â gəfĩn namasa ũ nəəmdə, é kora duug é kun nà asaman‑e e ə̀də̂níigǐ. E adé èg jag é maag inəgi èg kaaŋa iinini gar ẽ dəwdî kuni wa.¹²Ogo o dä awl Benyamini, ug tursu é see aan Yusifə.¹³Kurru ä baawan é məŋid ná a gon é Məsir te èg jega kay nà ug tursu te. U wərdú ä baawn te é raw.”¹⁴Aneenda e doos e bag awlane dë kund e ko. Benyamin e ko di.¹⁵E bag awleegen dë kundug eg on èg kay. É yaag ane awleege eg ada kuríigə èg deene.

¹⁶É gara kor cəggsǐ wag é Firuun iiŋ ná awleeg é Yusif lii'ǐ‑i, ë kundu e cuu è jag nà èg deene.¹⁷Firuun e bee Yusifən: “Koro ö awleegan ẽ warda namas cooleeg‑uulg dëg maade e tàa é Kanaan¹⁸ẽ wardé ö baawn èg jag é maag iyəgini, êg mərí dəəŋ. Â gəfĩgən alda ná weedé é Məsir te‑e ũ nəəmdə jega nà e làdaga tu‑i.¹⁹Û kuru ĩgən ẽ bagda karogo biig é Məsir ẽ wərdíigi jaalgeen iyəgi èg ozoog iyəgini ẽ wardé ëg baawne ẽ addé.²⁰Ar eg təlíigə ëg bonaag é kor man é kaaŋa iyəni ná e bilíigǐ ti‑i wa, é kora kaaŋa ná weeda é Məsir niin e ədǐ ĩgən‑i.”

²¹Aneenda jaalgeen é Isrəil e jìs ar ná korsána nee. Yusif e gəfĩgən karogo ar ná Firuun kursǐ ĩn‑i, e gəfĩgən namees ná ẽ nəəmdíigə teed‑eelg‑e.²²E gəfĩgən goog nà yaag eg kay, e gaf Benyamin kursugu 300 èg googo uulgu asaman.²³E cug baawanen cooleeg əsəgdi e gon jeg nà wiəg é Məsir, èg cooleeg nà ɲeeg əsəgdi e gon jerg èg bəwlg è namees ná ẽ nəəmdǐ teed‑eelg‑e.²⁴Gəl e tal awleege e wàj, e bii'ĩgən: “Ar ugu məldəsú teed‑eelg wa!”

²⁵E wàjaga é Məsirə e àdaga é faa iyəni iiŋ é Kanaan.²⁶Eg kuríigə ĩnə: “Yusifə bur denoog, gon məŋid ná mada é Məsir.” Yagob e sindər war wərsí kor iyəni wa.²⁷Gəl é gara korsána ĩnə é jisig ë muugu kay nà Yusif kurǐ ĩgən‑i o tursǐ karogo nà cuu'ǐ ẽ warden‑e, ë bon e ad maŋ.²⁸Isrəil e bee: “A tursu kor uyun taa é see! Jaa əən Yusif bur denoog. Â way ã tursu iiŋ bara a tir.”

Pioneer Bible Translators

https://app.library.bible/content/a230cccfbf4362be