Read Koreeg nà moog‑e 44

Koreeg nà moog‑e44

¹Yusif gawsé koren dhəm é maag iinin, e bii'ĩnə: “Pərdə pareeg é jaga nee é namees e mada ar ná nà gəríigə ẽ wərdíig‑i, û nəgə ĩgən eg kay jaam kurus pareeg dë maade.²Aneenda û nəgə bay əən é kurusu é pare‑uug ma é jaa ná ɲaan‑e è kursug nà ɲəmə̌niigí ẽ mərríigi jerg‑e.” E jis ar ná Yusif kursí iini‑ni.³É gara wag fissǐ‑i, jaga e taleega e waj èg cooleeg iyəgini.⁴Bara ẽ wayda dhugud é gaam naana, Yusif e bee dhəm iinin: “Way é jag na iiɲg, u gəmsiigî‑i û bii'ĩgən, ‘Ag jissâ ogo maŋ‑e ɲiin u jissú aga jam?⁵Ɲiin ug wərrú bay ná seen əən məzǐ feg o turǐ jisig nà taa é gəzg‑i. Ug jissə jis ná ən əndəg waw?’ ”

⁶É gara bəgsǐ iiŋg‑i e pədĩgən koreeg nee jo.⁷Gəl eg bii'íigə ĩnə: “Ɲiin seen əyən bee koro ana? Aga dhəmg unugu, aga jis jissə ná taa anaan‑e wa‑e!⁸Ag lee pəssǎ ũnu kursugu nà ag gəmsáaga pareeg‑iilg é gara ag mərrǎ é Kanaan. Ɲiin aga gəsə kurus èg param ná teyag maa seen?⁹U gəmsî bayn gar é dhəmgə nee man‑e, jen naan ẽ tirdə. Aga nà farsé‑e â àda dhəmg unugi.”¹⁰E bee: “Weedân, bii ada ar ná ug kursú'in‑i. Jen ná gəmsə́nə bayn gar iini ê ada dhəm əəni, ogo u wəidə.”

¹¹Eg kay e pəllənd pareeg tad ẽ guddíigə ë muugu.¹²Aneenda dhəm e doos e ada ɲerân pareeg‑iilgə e bəgə̌niigə é jen ná faan‑e e lee rəddí é jaan ná ɲaan‑e iiŋ. E gəmsəgə bayn pare‑eelg maa Benyamin.¹³É koranda awleegen eg pord goog iyəgin iilgə. Eg doos eg tif cooleeg iyəgin iilgə eg taa gaam‑aaŋ.¹⁴Yusif bur anǎn teyag é gara Yəusən èg awleegene lii'íig‑i, eg gurumíigi tad dë muu.¹⁵Yusifə e bii'ĩgən: “Ɲiin ug jissə ta anaan‑e? Ug ɲil ná jen ná taa ar aan‑e turǐ jisig nà taa é gəzg‑i waw?”¹⁶Yəusən e pəd kor: “Aga kor isi, seen əən? Aga pee äg ŋəlgə isi? Tel gossé dhəmg unug iiɲəg tui é əniid ná ag jissǎ‑e. Aga bare dhəmg unugu èg jen ná gəmsə́nə bay gar iinii‑ni.”¹⁷Gəl Yusif e bee: “Â jis koran da wa! Jen ná gəmsə́nə bay gar iin‑i een e mane e ad dhəm əən‑i. Ogo wəydə təə é faa uyu iiŋ.”¹⁸Aneenda Yəusən e ədí ləŋ diiŋ e bii'ĩnə: “Joo, seen əən, bii aan dhəm uun ẽ korro kor man. U təzí ar Firuuni di. Ar rayn e bəgí oon dumuun é dhəm uun iiŋə wa.¹⁹Seen əən tissí aga äg baawan tu a, ag bel awl man taân a.²⁰Ag pəssə ĩnə kor äg baaw məissə, jaa man tu ná kussə́nǐ é gara məissǐ. Ë awle tirsə, een jo farsé e mane é maaz iiŋ‑i, o faa ɲəmi əndəg.²¹U biissí ə̃gən ag dhəmg unugun ag bagda'e ũnu ũ turí iiŋ dö idig.²²Ag pəssə ũnu kor, seen əyən, jaan na gar ẽ biddí faa wa. E bijî faan‑e faan ê tir.²³Gəl u kursí ə̃gən ag dhəmg unugun äg awl ná ɲaan‑e e lii'î dö muu èg dage wa‑e, ar aga turǎ ö muun taan wa.²⁴É gara ag tassǎ dä baaw iiŋ dhəm uun‑i, ag kurí kora u kursí ə̃gən‑i.²⁵Aneenda é gara ag assǎ naaga biig‑i äg baawn korsé ə̃gən ag taa ag marra namees man taan ə̃gən.²⁶Gəl ag korsa ĩnə aga gar ag wayda ag maneeg wa. Gəl äg awl ɲaane e wajjê èg dage‑e gar â waj. De aga gar ã turdu ü muun wa, ä awl e taa èg dage wa‑e.²⁷Dhəm uun faa əyən korsé ə̃gən ar ná ag ɲelǎ ná od iini Ra'eel kussí ĩnə jaalgeen dhaag‑e.²⁸Jaa ná taman‑e wajjé diiŋə tui, korǎn namsê əəl tirsə. Tursí iiŋ wa wag gaalda.²⁹Ag warsâ nii deene di‑i, jeem e əssĩnî‑i ë kundu na ê ən ê tir é kora məissǐ‑i.³⁰Gəl, jaan e wajjâ èg dage wa‑e, â gar a taan teyag dä baaw dhəm uun iiŋə wa, é kora ä baawn ənǐ taw è kor é jaanee‑ne.³¹E tursû jaan èg dage wa‑e, ê tir. Aga dhəmg unugu agâ 'ədə äg baawn ë bon e ən e tir é kora məissǐ.³²Aan dhəm uunu a tiwsí kor é dä baaw‑muu ná ã padé jaan‑e. A korsé ĩnə a mərî é jaa wa‑e, andas əən ná a aně ê ada e ən kay!³³Gəl joo, bii aan ã farsa tad ã əsũn dhəmdi é wag é jaan, û bijə jaan ẽ wayda e taa èg awleegee‑ne.³⁴Â way â taaẑn é dä baaw muu isi jaan e taa'â èg daane wa‑e? A gar a tur jisə ná ən ê wal é dä baaw iiŋ‑i isi?”

Pioneer Bible Translators

https://app.library.bible/content/a230cccfbf4362be