Read Koreeg nà moog‑e 43

Koreeg nà moog‑e43

¹Kun bur naamǎn əndəg é Kanaan.²É gara namasa kay ná wərǐigə é Məsir‑i cissí‑i, faan iyəni e bii'ĩgən: “Təəzzə é Məsir ũ mərrú ə̃gən namees man.”³Gəl Yəusə e bii'ĩnə: “Jen naadi thuní aga əndəg beên, ‘Ugû tur ä muun wa û bəú ög awl èg doge wa‑e.’⁴O ná tal äg awl èg dage‑e, agâ way ã maarra ũnu namasa.⁵Gəl o ná tale wa‑e, agâ way wa é kora jen kursǐ ə̃gən, ‘Ugû tur ä muun wa ö awl e lii'î èg doge wa‑e.’ ”⁶Isrəil e bii'ĩgən: “Ɲiin u jissú jis ná ənii ə̃nə, u kurú jen naan u bil ö awl man ná dhaan‑e?”⁷Eg pəd kor eg bee: “Jen tis aga ləŋ dä məsiig é jag é maag əyəg‑i. Tissə aga: ‘Ö baaw bur den wag a? U bil ö awl man ná dhaan a?’ Ag pəssə koreeg nà tissí ag‑e. Ag ɲelǎn e beên, ‘Bəgdú ə̃nə ö awl’ a?”⁸Aneenda Yəusən e bee Isrəil faa iinin: “Tal jaan ẽ wayda èg daane ag wəddə wag, aneenda gar aga èg doone èg jaalge əyəg‑i ã dedda wag ná ã tirdǎ‑e.⁹Biyə̃n ë koren dä ŋalg aan e pədi. A mərî deen a lee təldũni dü muu te wa‑e, a ada jaa ən‑i é andas ná a ané dü muu nii.¹⁰Ma e been mərəng əyəg neen wa‑e, ag lejjáaga ag məríig äg luugu dhaag.”

¹¹Aneenda faa iyəni Isrəilə e doos e bii'ĩgən: “Kor e taa anaan‑e u wəydú‑i wərdə jeg é gaam nà wiəg‑i pareeg‑iilg düg maad: laad é fui, aay, èg səəmg biig nà é bunu, kəmul, koreek èg aŋanda idigi. U gəwdiig hadiə jenan.¹²Wərdə kursug dhaag dhaag èg doge, u pəddú kursug nà nagsána pareeg‑uug düg maad‑e, de na nagsána jaam.¹³Wərdə ö awl èg doge u təəzzə é jen iiŋ.¹⁴Bii Tel ná Segar‑e ẽ cordoogo ẽ biddi ẽ jidduugə maŋ ẽ taldé ö awl ná ti‑in è Benyamini ẽ waydé è doge. De e 'dhuussu jaalgeen‑e, de jeem een tu ná â jisí‑i wa.”

¹⁵Jag eg war hadiəgə èg kursug dhaag dhaag, èg Benyamini. E mèr dumuun é Məsir eg pall èg Yusif‑muu.¹⁶É gara Yusif tursǐ Benyamin èg deg‑e e bee dhəm iini é maagan: “War jag nee, way dega teyag dä maad. U wir ĩgən jeem tad, u liw namasa de nà lee naam èg daane tel e mərsí.”¹⁷Jen e jis ar ná Yusif kursǐ ĩn‑i, e waj é jaga teyag maa Yusif.

¹⁸Jaga bagsê kojone é gara lejjána dega maa Yusif‑i. Eg kurəs ege eg bee: “Wərə̂náaga te é kor é kursug nà nagsána pareeg‑iilg däg maade é gara moog‑e. Ɲam e buraaga ẽ bagdaaga ẽ 'əddaaga dhəmgi ẽ warda cooleeg əyəgə.”¹⁹Eg doos eg waj é dhəm é Yusif iiŋ eg kuríigi èg deene e tall wii‑muu.²⁰Eg bee: “Joo seen, ag leyaga te moogo ã maarra namees.²¹Gəl é gara ag lejja é wag ná ag nagda‑e, ag gossa pareeg ë muugu kay, ag gəmsəgə kursug eg naa pareeg‑muug ar ná təə̌níig‑i. Bare ag təənǎ dega.²²Ag 'təwǎ jaam kurus ã maarra namees. Ag ɲel jen ná nagsa kursug əyəgə pareeg‑iilg däg maade wa.”²³E bii'ĩgən: “Bəgdə ö bonaag taw. Ar kojon e bəgí ogo wa. Tel uyun, Tel é faa uyun, gəwsũgun kursug pareeg‑iilg düg maad. A bagsa kursug uyugu.” Aneenda e ŋulə̌nĩgən Samoon tuu é folo.

²⁴Dhəm e war jaga e wəjjí dega taag maa Yusif, e gəfí ĩgən feg ẽ cəgdíigi ë luugu e gaf saroo cooleeg iyəgin.²⁵Eg liw hadiəg iyəgin e ad paa Yusif é gara e ədə̂nǐ é tel é mərsí é kora fiŋəssíigǐ ê naam ta‑e.

²⁶É gara Yusif lii teyag‑e, eg gəfíigə ĩnə hadiəg nà wəríigə è deg‑e eg gurum tad Yusifən addeeg.²⁷Yusif e tisiigə e bii'ĩgən: “Ög baaw ná ug kursu ə̃nə məissǐ ta isi? Bur an taw a?”²⁸Eg pəd kor: “Dhəm uun äg baaw segar, bur den wag.” Eg gurumíigə ĩnə tad taan é kora fiiníigi ë muun‑i.

²⁹É gara wissǐ wag tursǐ Benyamin ë awlane ná liiníigi maazn taman‑e, e bii'ĩgən: “Ö awl ná ɲaan ug kurə̌nú ə̃n‑i e niin a?” E bee Benyaminən: “Bii Tel ẽ əildə uuŋ, jaa əən.”³⁰Yusif e waj tui é raw, e ɲer wag man ẽ undí. E waj é wee iinin e ada oné é kora eelga jəldí awlane əndəg‑i.

³¹É gara cəgsǐ ë muun tui‑i, e ladaga tuu e bag ë bon taw é kora unə̌nǐ‑i, e bee: “Wərdú namees.”³²Dhəmgə eg gəfíigə ĩnə namas iinin e mane, awleegen eg maneeg, Məsiriigə nà lii ẽ naamdé‑e gəfĩgən eg maneeg, é kora Məsiriigə diníigǐ namsa èg Ibraneege rui‑i.³³Aneenda e 'əwdə awleeg é Yusifə dë muu é faaz ar ná kossána ege‑eene, ná é moogo ləŋ é ná ɲaane iiŋ. Eg galwad ege.³⁴E gəfĩgən namasa ná taldána é Yusif muu‑i eem, fand é Benyamin taǎn taw ma e gal ná é jaga kay‑e garga asaman. Eg naam eg mad dë kore èg deene.

Pioneer Bible Translators

https://app.library.bible/content/a230cccfbf4362be