Read Koreeg nà moog‑e 34

Koreeg nà moog‑e34

¹Dina ɲen é Liyan ná kussǐ Yagoban‑e, wajjě e wii'ǐ ɲalg é gaam.²É gara Səkiim jaan é Amur ná Iwwi, ná gon gaam naan‑e, tursǐ ɲen‑e e wəri e gəni é kusuur.³Ë bon e bell ɲen é Yagob, e ɲəwi o e kurĩnə koreeg ná cuug.⁴Səkiim e kor faa iinin Amurən: “Wərə̃n ɲen ni ode.”⁵É gara Yagob fiŋəssǐ ná ɲen iinin Dina gansána een‑e, jaalge inəgin ceegǎn, faaz‑ool lewdag‑əəŋg dë maade. E fədə é kor deelg ləŋ eg adaga teyag.⁶Aneenda Amur baaw é Səkiim e wajaga ẽ korro èg Yagobe.

⁷Gəl é gara jaalgeen é Yagobo lii'ǐigi faaz‑oole fiŋəssǐigi koren‑e, ëg bonaaga eg ən eg bàgê rayneeg əndəg é kora Səkiim jissǐ jisə ná taa laan Isrəilən‑i, nəgsǐ è ɲaa é Yagob‑e, jissə jisə ná taa ẽ jiddə́n wa‑e.

⁸Gəl Amur e bii'ĩgən: “Jaa əən Səkiim ë bon ɲawso ɲen uyun. Joo jəldi ĩnə.⁹Lizzu ag wərsə: bii ag jəldə ɲalg uyugu, ogo ũ jəldə ɲalg əyəgə.¹⁰Əwdə èg dage de alda naân tu ũgun. Əddə tu, bəldə tu, bildə kaaŋa ogee.”¹¹Aneenda Səkiim e bee faa é Dina èg awleeg é Dinan: “A ɲəm ã cundu ü kundugu, â gəfũgun jeem ná ug məɲsǐ.¹²Məɲdə kaaŋa é yaama de hadiə ná u ɲəmí‑i â wərə̂nũgun e mada ar ná u ɲəmúin‑i, â gəfũgun jin ná u məɲsǐ. A ɲəm dogo jin taman, gəwdə̃n ɲen od əəni.”¹³É kora yaazznen Dinan gansána een é kusuur‑i, jaalgeen é Yagob e basar Səkiim èg baaw iinin Amur‑i.¹⁴E bèe: “Aga gar ã gawda ä yaazzn jen ná taa korɲa‑e wa. Kore laana ə̃gən.¹⁵U ɲəm ã guɲdu kor uun‑i, bii wirə̂nə́ jag nà fuuig‑i kay ũ əddə ar ag‑e.¹⁶Aneenda agâ gəfũgun ɲalg əyəg û jəldiigə, â jə̀ldə uyugu di. Ag ada èg doge é mumul â ada kaŋ ná taman‑e.¹⁷Gəl ug guɲsû é wirə̂nuugu wa‑e, agâ war ä yaazzn agâ way.”

¹⁸Kor iyəni e cagg Amuru èg jaa iinin Səkiim‑i.¹⁹Səkiim ná jag inəgin gunə̌nǐigi iiŋgə teyag dë maad‑e, e guɲ kora kursə́nĩn‑i é raw ana é kora ɲəmǐ ɲen é Yagob‑e.²⁰Enna Amur èg jaa iini Səkiimi wəjjǐigi rəgsǐigi gaam‑muu e kòr jag é gaaman:²¹“Jag nee andas iyənin weedân èg dage. Biidiigə ẽ adda èg dage é aldan ni ẽ bəldə tu, de aldan madân na war aga a kay. Â jəld ɲalg iyəgin, ê jəldə ɲalg əyəgə di.²²Gəl tə̀lí kor taman ná ada ədǐigi èg dage, been jag fuuig ê wirə̂niigə kay ẽ adda ar ege.²³Aneenda lewdag iyəgin, kaaŋa iyənin èg miəg iyəgin ê aa əyəg‑i waw? Lizzu ã guɲdu kor iyənin, ê àda èg dage.”²⁴Jag fuuig kay nà ləzzǐigi tuu gaam‑muu e gùɲ kor é Amur èg jaa iinin Səkiimi, e wìriigi.

²⁵É gara naag kuyjǐigi ozo, jag iiŋgə e bur naameeg‑e, jaalgeen é Yagob nà dhaag‑e Samoon èg Lawin awleeg é Dina e dòos e wàr temareeg iyəgin e bur gaam naan é dhaaz, e tìrd jag fuuig kərəŋ.²⁶Eg tird Amuru èg Səkiimi é temar e baga ëg yaazzne Dinan teyag maa Səkiimə e wàjaga tui.²⁷Jaalgeen é Yagob edaga eg adaga é wag ná tirsə́nə jag‑e eg korj kaaŋa é gaam ná gansána yaazzne é kusuur‑i.²⁸E kəjíigi lewdag iyəgi miəg, əəriig, togo, cooleeg, èg jeg kay nà teyag‑e èg nà faaz‑oolee‑ne.²⁹E kurjíigə kaaŋa iyənin kay e ŋəw̌níigi jaalge iyəgin è ozooge, e korj jeg é maaga.

³⁰Yagob e bee Samoon èg Lawini: “U wərú kora ən u əssə aan jaa əndi é Kanaanga iilgə è Firissiigi, jag é gaam nee ana te. Ag taa foroj, jag nee eg mussî é mumuli e bursaan èg jag é maag ənəg‑i ê tirdaga.”³¹Gəl eg pəd kor: “Een taa ẽ jiddə ä yaazzn aza de a?”

Pioneer Bible Translators

https://app.library.bible/content/a230cccfbf4362be