阅读Koreeg nà moog‑e 33

Koreeg nà moog‑e33

¹Yagob e tur Issun e leeŋ è jag fuuig 400. Aneenda e lad jaalge iilgə biig Liyan, biig Ra'eelan, biig ozoog inəgin nà dhəmg dhaag‑en.²E tal ozoog inəgin nà dhəmg dhaag‑e èg jaalgeeg iyəgini moog, Liyan èg jaalgeeg inəgini diiɲg, Ra'eel èg Yusifi əɲəg.³Een e wəjjǐ dë muug e gurum tad garg idig dhaag é gara bəgsǐ awlane teerma‑e.⁴Gəl Issun e gal e mug ë awlane iiŋ e fərin dë kund, eg on èg dhaage.

⁵Aneenda Issun e tur ozoogo è jaalgeene, e tissə wag: “Ŋənəəd nà leeŋ èg doone ta‑e?” Yagob e pəd ĩnə kor: “De jaalge nà Məi Tel unsǐ dhəm uunun‑i egan nee.”⁶Aneenda ozoog inəgin nà dhəmg dhaag‑e èg jaalgeene lii'ǐigi teerma‑e e gùrum tad.⁷É yaag ane Liyan èg jaalgeeg inəgini e bàdaga e gùrum tad. Əɲəgə, Yusif è Ra'eele e bàdaga e gùrum tad di.

⁸Issun e tissə Yagobo: “Kaaŋa niin é ɲiinə ná a muuǐ diiŋ ni?” E bee: “Gar a gəmsə̂ní cuwəd duuŋ seen əən.”⁹Gəl Issun e bii'ĩnə: “A bel kaaŋa, ä awl. Bii kaaŋa uun ná oond‑e.”¹⁰Yagob e bee: “Wa, joo! Anaa gəmsəgə cuwəd duuŋ‑i, baa hadiə ni dä aasa. A tursu ü muuni təə̂n ar ná a tursǐ Tel ë muunii‑ni, a gəmsí cuwəd duuŋ.¹¹Joo guɲ hadiə ná wərə̂nũn‑i, de Tel taǎn èg daane, gəwsə̃n jeg kay nà a ɲamǎn‑e.” É gara Yagob təldǐ kor diiŋ‑i, enna Issun guɲsǐ.

¹²Aneenda Issun e bee: “Lee ã wayda de â way èg doone.”¹³Gəl Yagob e bii'ĩnə: “Seen əən, u ɲil jaalgeen bur baarga, lewdag bel ɲalgeeg. A wajjâ duguud teleen kay‑e, lewdag kay ê tir.¹⁴Bii seen əən ẽ wayda é dhəm iinin muu, de â leyân é yaag é yaag èg jaalgeen èg kaaŋane ləŋ â cagga wag é seen əən iiŋ é Saiir.”¹⁵Issun e bee: “Bii ã biisũn jag ənəg nee biig tad.” Gəl Yagob e bii'ĩnə: “É kor é ɲii? Jin ná a ɲəm doone, ö bon ẽ tallda e cuu dəəŋə.”

¹⁶É naanda na Issun e mər e taa dumuun é Saiir.¹⁷Yagob e waj é Sukut, e kuu maag é garadi e bell doorg é lewdag inəgin. Enna wag nagsána een Sukut‑i.

¹⁸É gara Yagob wəjjǐ tui baw‑eelg é Aram‑e, e badaga é gaam Səkiim ná é aldan é Kanaan ma maŋ, e bell kumurg inəgin teerma tu.¹⁹E maar aldan é lolomg é kursug 100, gar é jaalgeeg é Amur, baaw é Səkiim, e bell kumurg inəgin é alda na.²⁰É garadinə e kuu wə e nəgi “Tel é Isrəil Tel é see”.

Pioneer Bible Translators

https://app.library.bible/content/a230cccfbf4362be