Read Koreeg nà moog‑e 32

Koreeg nà moog‑e32

¹Yagob e waj é teed iinin. Fəəriig é Tela e mugíigi diiŋ.²É gara Yagob tursiigǐ, e bee: “Kumurg é moraag é Tela nee!” Aneenda e nag wag na Manaayem (ná ɲiləs Kumurg Dhaag).

³Yagob e cug kasag dë muu é awlane Issu iiŋ é aldan é Saiir, é gaam Adoom.⁴E kurĩgən: “Kora û kuru seen əən Issun‑i een ni: ‘Dhəm uun Yagob beên een anǎn èg Laban‑e o ləŋ bare bur an tu.⁵Bel tog, cooleeg, əəriig, miəg, dhəmg nà fuuig èg nà ɲeeg. Bare cuu'ǐ koren seen iinin gar ẽ bagden é cuwəd.’ ”

⁶É gara kasaga təssǐigi é Yagob iiŋ‑i eg bee: “Ag lèjja dö awl Issu iiŋ, bare leeŋ è jag fuuig 400 ẽ muddu duuŋ.”⁷Yagob e bagê kojone əndəg e kugur e lad jag nà tàa èg deene, miəg, togo èg kəmdəligi é maldag dhaag.⁸Korǎn: “Issun e lii'î e bursu malda ná taman‑e, yaan ẽ galda.”

⁹Aneenda Yagob e fir: “Tel ná dä baaw Ibrəim, Tel é faa əən Esaag, Məi Tel, ná kursǐ ə̃nə, ‘way taana gaam‑aaŋ dö maad, maa dö jag unug, de â raa èg doone,’¹⁰aan a taa u jissə̃n jisig nà wiəg ne‑e wa, raa ná u rəgsǐ èg dhəm uun‑i. A gonǎn magald əən jo é gara a bəə̌nǐ deel Urdun eel taw‑e, bare a assa maldag dhaag.¹¹A fir bare, fee aan é dä awl Issu isigə, de a feen ê tirda o ê tirdə ɲalga èg maaŋg‑e.¹²Gəl de u biissǐ û rəə èg daane o û ədə ä məyədə ar sasaan é deel nà birsəs wa'ee‑ne.”

¹³E nag é kaay naana ta. E god hadiə é jeg nà bilǐ awlane Issun:¹⁴miəg nà ɲeeg‑e 200, kaarg jaa dui əəŋ, əəriig nà ɲeeg‑e 200 èg nà fuuig‑i jaa dui əəŋ,¹⁵kəmdəlig nà ɲeeg‑e 30 èg dë ɲalgee‑ne, togo 40, kaadelg əsəgdi, cooleeg nà ɲeeg‑e jaa dui əəŋ èg nà fuuig əsəgdi.¹⁶E təliigə dhəmg inəgin ẽ pədiigə moraa man e mane, e bee dhəmgən: “Wəydə bəə dä muu, biidə moragg e lee dhuguig é yaag.”¹⁷E kurd ná leeŋ moog‑e e bii'ĩnə: “Ä awl Issun ê muu duuŋ e tisũn ‘Oon jen é ŋən‑i? U liiŋ dumuun da‑e? Ŋənə bel lewdag nà leeŋ dü muu naan‑e?’¹⁸Aneenda û bii'ĩní ‘Dhəm uun Yagob een bilǐ. Cugí hadiə‑i seen iinin Issun, de een leeŋ dəəɲg.’ ”¹⁹E kurd yaan ná ədə golgo dhaage èg ná ədə golgo ozo‑e èg golgo kay‑e nà dəmə̌n moragg‑e e bii'ĩgən: “Kurúu koran jo re Issun u mussu diiŋ‑i.²⁰Ar ugu jirú wa u kurú ĩnə ‘Dhəm uun Yagob leeŋ dəəɲg.’ ” De een korso dë ŋalg: “Hadiəg nee a cugi dä muu te ẽ cuddu ë kundu. Ag mussî, gar ẽ guɲda cucu.”²¹Enna hadiəg é Yagob bəənsíigǐ dë muu‑i. Gəl Yagob e nag kumur‑iilg ta é kaay naan.

²²É kaay naana Yagob e doos e war ozoog inəgin nà dhaag‑e èg ozoog inəgin nà dhəmg dhaag‑e èg jaalgeen inəgin nà əsəgdi èg ná taman‑e e bəəndiigə ruud Yabuk eel taw.²³É gara bəənsǐ jogo èg jeg inəgin nà bilə̌nǐ‑i ruud ban‑e,²⁴E far e mane. Jen fuui man e adaga eg gənəs ləŋ wag é fee.²⁵É gara jen tursǐ e gərǐ Yagob wa‑e, e billin dë kondorsen. Ë kondorsen ë muun e gus é gara gənəsǐig‑i.²⁶Aneenda jen e bee: “Talan ã waysa de wag feessa.” Yagob e bii'ĩnə: “Â tal oon ũ wəjə wa ləŋ u əild əəŋ.”²⁷Aneenda jen e tisin: “U bil isi?” Yagob e bii'ĩnə: “A bel Yagob.”²⁸Gəl aneenda jen e bii'ĩnə: “Aneenda ö saag e bel Yagob tàa wa. Û bil Isrəil, é kora u dəwrsǐ èg Tele o jage, u rəgsí jiləŋi.”²⁹Yagob e bii'ĩnə: “Rimdə̃n ö saaga joo.” Gəl e bii'ĩnə: “Ɲiin u tinsí ä saag?” Aneenda e əild Yagob iiŋ.³⁰Enna Yagob nəgsǐ wag na Fəniyil‑i, e bee: “É kora a tursǐ Tel ë muun maɲdag‑e, aneenda a bur a den wag.”³¹Ar ná bəəssǐ Fəniyil‑i tel e badag, o e teer é kora ë kondorse gussî‑i.³²Aneenda enna Isrəiliigə nəəmǐigi bəndiil ná gon kondorsen‑e wa‑e, é kora jen billdǐ Yagob dë kondorse.

Pioneer Bible Translators

https://app.library.bible/content/a230cccfbf4362be