Read Koreeg nà moog‑e 30

Koreeg nà moog‑e30

¹É gara Ra'eel tursǐ ë ŋalga bilǐ jaalgeen biig Yagoban wa‑e, eelga e ad əər é yaazzne iiŋə. E bee Yagoban: “Gəfə̃n jaalgeen biig war ã tirsə!”²Yagobo e bagê rayne dum diiŋə e bii'ĩnə: “Aan Tela ná bijjuun ũ bil jaalgeeg wa‑e na a?”³Aneenda Ra'eel e bee: “Bila ɲen əən ná dhəm‑i een ni. Naa è deene ẽ koddo aneenda gar â ada é jaalgeeg di.”⁴Ra'eel e gaf Bilan ɲen iinin ná dhəm‑i Yagoban ode. Yagobo e nəgí èg deene.⁵Bilan e wars e kuuí ĩnə jaa ná fuui.⁶Aneenda Ra'eel e bee: “Tel ragsa èg daane. Fiŋəssə kor əənə gəwsə̃n jaa.” É korena Ra'eel e nəgin Dan.⁷Dhəm é Ra'eela Bilan e koo Yagoban jaa ná fuui taan.⁸Aneenda Ra'eel e bee: “A karsa əndəg dä yaazz eeɲ. Bare a koyje.” Aneenda Ra'eel e nag jaan Naftali.⁹É gara Liyan tursǐ ë ŋalga bur kuûnǐ jaalgeeg wa‑e, e gaf dhəm iinin Silfa Yagoban ode.¹⁰Dhəm é Liyan Silfan e koo jaa ná fuui Yagoban.¹¹Aneenda Liyan e bee: “Jin ni cunsu ä bon‑e.” Aneenda e nəgin Jaad.¹²Dhəm é Liyan Silfan e koo jaa taan Yagoban.¹³Aneenda Liyan e bee: “Ä bon e cuussu! Ozoogo ê bèlâna cuwəd.” Aneenda e nəgin Aciir.

¹⁴É mun é suun é gamen, Rawbin e waj gafa‑eelg e gəmsəgə guldug é kongo é bəlgə biig, e wəriigə é maazne Liyan. Ra'eel e bee Liyan: “Gəfə̃n guldu bəl é kongo ná jaa uun wərí na eem joo.”¹⁵Gəl e bii'ĩnə: “U rəə é jo wa wa u məssǐ ä jid daane? Û wər guldu é bəl é kongo é jaa əənə di a?” Ra'eel e bee: “Weedân. Bii ẽ nagda èg doone é kaay niinə é kor é guldu bəl é jaa uunu.”¹⁶É gara Yagob mərrǐ gafa‑eelg é jiig naan‑e, Liyan e waj tuu e mudi diiŋ. Liyan e bii'ĩnə: “Û nəə èg daane. A məərí oon é guldu bəl é kong é jaa əən.” Enna nəgsǐ èg deene é kaay naan‑e.¹⁷Tel fiŋəssə kor é Liyan. Liyan e puuj e koo Yagoban jaa ná ədə golgo asaman‑e.¹⁸Aneenda Liyan e bee: “Tel onsan é kora a gawsě ɲen ná kəəmə̃nǐ ä jidən‑i.” Enna nəgsin Yasaakar‑e.¹⁹Liyan e puuj taan e koo Yagoban jaa ná ədə golgo thəldig‑i.²⁰Aneenda Liyan e bee: “Tel gəwsə̃n hadiə ná weeda. Bare ä jidə ê goo aan maŋ é kora a kussǐ ĩnə jaalgeen thəldig‑i.” Aneenda e nəgin Sabulun.²¹É gara wag kuyjǐ é yaag‑e e koo ɲen ná ɲee e nəgi Dina.

²²Aneenda Tel e tur Ra'eela. E fiŋí kor iinin e gudí gəfəd iinin ë muun.²³E puuj e koo jaa ná fuui. Ra'eel e bee: “Tel warsa laan tuu dəəŋə.”²⁴E nəgi Yusif, e bee: “Bii Məi Tel ẽ təwdə̃n jaa man taan.”

²⁵É gara Ra'eel kussǐ Yusif‑i, Yagob e bee Labanan: “Tal aan ã waysa ã taasa dä maad é aldan ná a leeně.²⁶Gəfə̃n ozoog ənəgə èg jaalge ənəgi nà a kaamsě ũn‑i, de â baa teed əənə. U ɲil asam ná a kaamsě ũn‑i.”²⁷Gəl Laban e bii'ĩnə: “O na rag é kor əən eelg‑e ana èg daane joo, de a tursu ná Məi Tel əildǐ əəŋ é kor uun‑i.²⁸Rimdə̃n jin ná u ɲəmǐ, de â gəfũn.”²⁹Yagob e bii'ĩnə: “U ɲil asam ná a kaamsě ũnu əndəg‑i, o asam ná lewdag unug buɲsǐigi é gondos ná a gonǎneeg‑e.³⁰Lewdag nà u bilə̌n faraj bara a adǎn‑e bare boɲso əndəg. Məi Tel əildə uuŋ é wageeg kay nà a taǎně tu‑i. Gəl bare, aan â jisə jeem ná weedân dəi jag ənəgən‑i?”³¹Laban e tisin: “Â gəfũn ɲii?” Yagob e bii'ĩnə: “Ar u gəfǐ ə̃nə jeem wa. Gəl o na jisə̃n jin ná taman niin‑i, â way â nəəmdə lewdaga unugu â paa'eega.³²Bii aan ã waysa lewdag‑iilg dö maad é naanda ni ã cersa əəriigə nà iiŋg taa é ŋay buuzg‑i èg ná baalg‑e, èg əəriig nà gon ŋay duig‑i èg miəg nà iiŋg buuzg‑i èg nà iiŋg baalg‑e. Ê àda ənəg‑i.³³Jisə niin ê təldan a ber é mun ná leeŋ‑e, é naand ná û ɲirǐ jeg nà u gəwsə̃nǐ. U gəmsî miə man ná buuz war baal wa‑e de naan gəzsə́nə.”³⁴Laban e guɲ. E bee: “Weedân, bii ẽ adda ar ná u kursinǐ.”³⁵É naanda na jo Laban e karr kaarg kay nà iiŋg taa è faazg‑e èg nà iiŋg baalgee‑ne èg miəg nà iiŋg buuzg‑i èg nà baalg‑e èg əəriigə kay nà duig‑i, e bijjiigə jaalgeen inəgin ẽ dindiigə maŋ.³⁶Aneenda Laban e waj è lewdag naan é wag ná war naaga ozo é Yagob iiŋ‑i. Yagobo e far ẽ 'nəəmdə miəg é Laban nà farsé.

³⁷Yagobo e waraga guldug isigə nà ɲaarg kumí é guldug é meez, aŋanda èg guum e cifí bagaane tuu ẽ rimdə garg nà é ceeg poog‑e.³⁸Aneenda e tal guldug isigə nà cifsí‑i é fuulg nà thewsa feg‑e ẽ talda jerad moragg‑muug é gara e lèe məǐig‑i.³⁹Eg gawr é guldug isig nà muug, eg koo ɲalgen iiŋgə e taa é faazg, buuzg èg baalg.⁴⁰Yagob e karr əəriig ɲalgen nà iiŋg taa é faazg, buuzg, èg baalg‑e eg maneeg, e bij miəg nà farsé‑e eg tall dumuun é miəg é Laban nà iiŋg taa é faazg èg nà duig‑i. Aneenda e jis moraa eende war mussiigə èg nà é Laban‑e wa.⁴¹Miəg nà ɲeeg segarg‑en e muuldu ẽ ɲam ẽ gawr‑e, Yagobo e doos e tal guldugu isigə é miəg‑muug é fuulg nà thewsa feg‑e, aneenda gar ẽ gawra guldug muug.⁴²Gəl miəgə e kayg‑e, təlǐ guldugu dë muug wa. Enna miəgə nà kayg‑e fəərsǐigi è Labanee‑ne èg nà segarg‑e fəərsǐigi Yagoban‑e.⁴³Aneenda Yagobo e ad bel kaaŋa əəriig e talg èg miəgi, e ad bel dhəmg nà ɲeeg èg nà fuuig, kəmdəligə èg cooleeg.

Pioneer Bible Translators

https://app.library.bible/content/a230cccfbf4362be