Read Koreeg nà moog‑e 3

Koreeg nà moog‑e3

¹Gəl dəər e mane jo enna eel taa kəgəər‑i bəidə jeg nà é leeleega Məi Tel təldǐ é basaara. E doos e bee odon: “Bəl, é see Tel beên ar ugû nəəmúu ɲalg é guldug nee tall kaal‑eelg te man wa?”

²Odo e bee dəərən: “Agâ taa ã naamda ɲalg é guldug ná tall kaal‑eelg‑e.³Gəl Tel korsé ar agâ naamá ɲalg é guldu ná tall é ceeg kaal‑eelg‑e wa, ar agâ law iiŋ taw wa, ar ag jisə anaa nee agâ tir.”

⁴Dəərə e bee odon: “Ugû tir man é see wa.⁵Tel ɲel é naanda ná ug nəmsǔ ɲalg é guldu naan‑e uulg ê goo iiŋgə, ô ad ar Tel‑e, ô tur wendada èg əniid‑i.”

⁶É gara odo tursǐ ɲen é guldu wiidǐ‑i, e cuu é kor é nams‑e, iiŋ wiidǐ‑i, təzí jee ədə wag uulg kəgəər‑i, e doos e lad man e nəəmi, e gaf eem jidənin taǎn èg deene re, e nəəmi.⁷Iilgə eg god iiŋ wəŋ, e tùr asam ná əniigí é kulmug‑i eg dhaag‑e. E fèr teefag windəg é guldu ná belâna tiin‑i, e dòos e jìsíigi amsareeg‑e.

⁸Eg fiŋə balfada é Məi Tela e leen kaal‑eelg é jiig. Eg dòos e dàr tui é Məi Tel muu e ùug guldug‑iilg kaal‑eelg.⁹Məi Tel e tarb jen duin e bii'ĩnə: “Oon da?”

¹⁰Jen duin e bee: “A fiŋəssə balfad unugu kaal‑eelg, kojon bagsa é kora a aně é kulmug‑i, a darsa.”

¹¹Məi Tel e tissi e bii'ĩnə: “Ŋən biissũn u ən é kulmug‑i? Bəl u nəəmsə guldu ná a beessé ar u nəəmi wa'ee‑ne a?”

¹²Jen duin e bee: “Odo ná u gəwsə̃ní‑i ã adda è daane‑e, een ná gəwsə̃n ɲen é guldu eem, a namsa.”

¹³Məi Tel e bee odon: “Jee ɲiinə u jissə ta anaan‑e?”
Odo e bee: “Dəərə basarsané, enna a namsa.”

¹⁴Məi Tel e bee dəərən:“É kora u jissǐ anaan‑e a mirsu o mane é lewdag é maag nee iilgə èg lewdag é leeleeg‑iilgə.Û kusur dö eelg,û nəəm dufurg naaga ná û əní taw‑e kərdəŋ.¹⁵Â tal məəliig duulg oon èg ode èg ɲalg inəgini èg unugi.Een â yaram oolo tad, oon û inin dë luug‑bəlg‑i.”

¹⁶E bee odon:“Â taw naamag é ɲalga é gar é konaaga uunu.Û bii'ín u ən dö jid kord‑ool, ê ab fan taw d‑ool.”

¹⁷E bee jen dui ná bel Adam‑e:“É kora u fiŋəssǐ kor é od uun‑io u nəəmsǐ guldu ná a beessé ar u nəəmi wa'ee‑ne,əniidə â pall addeeg é kor uun ná ən u jissí.Namees uun ê aa é dhusu naag unugu kərdəŋ nà u əní taw te‑e.¹⁸Addeega ê koon aasag èg kayma.Û nəəm galag é gafag.¹⁹Û kəəm dhudhusu gar ũ gəmsə̂n namees ləŋ û mər tad é addeeg ná u lədə̌ní‑i,é kora u təzǐ alda‑e û təən addeeg jo.”

²⁰Jen fuui e doos e nag od iini Awa é kora ê ədǐ yaaz é jaga kərdəŋ‑i.²¹Məi Tel e doos e jis fəru man Adaman èg od iinini ã 'guddiigə diiŋg.

²²Məi Tel e bee: “Jen duin nii assa jaa taman ar ag‑e, ɲel kor é wendada èg ná é əniidə‑i. Ar ã bijə een ẽ naamda guldu é andas taw wa, de e namsé ê aa ləŋ pad.”²³Məi Tel e guniigə tu kaal‑eelg é Adan ẽ buizzí é addeega ná lədə̌ná een‑e.²⁴É gara gunǐ jen duin tui‑i e tal fəəriig Karobiig èg temar ná pargân ë beɲaaga kay‑e kaal‑eelg é Adan é beɲj ná tel bəə̂n‑i, ã padda teeda ná aa dumuun é guldu é andas taw‑e.

Pioneer Bible Translators

https://app.library.bible/content/a230cccfbf4362be