Read Koreeg nà moog‑e 2

Koreeg nà moog‑e2

¹Tel anaanda gəl e cind aweelga èg addeeg èg jeg nà diilgii‑ni kərdəŋ.²É naanda ná ədə golgo idig dhaag‑e, Tel cinsǐ kazaam iini kay e ab tad.³Tel e əild naanda ná ədə golgo idig dhaag‑e iiŋ, e 'ədi naand iini, é kora rəssǐ jega nà tələ̌ní.

⁴Jen ni rimdə̂n asam ná Tela təldǐ aweelga èg addeege. É gara Məi Tela təldǐ addeega èg aweelg‑e,⁵leel doosséege addeeg‑oolo wa, war foydag biig təə̌nǐigi tu wa‑e, é kora Tel luussǐ koy man addeega wa‑e, é kora jaam dui təə̌nǐ tu ã bui'i wa‑e.⁶Jiləbəg eg bellá tad dumuun taw ẽ məddə addeeg ool kərdəŋ.⁷Məi Tel e kuu jen duin é ɲənd, e fuín dë fodorg ë faŋeeg é andas taw, e doos e ad jee denoog‑e.

⁸Məi Tel e doos e dib kaal é Adan é wag ná tel bəə̂n‑i. E doos e tal jen duin tu ná təldí‑i.⁹Məi Tel e bij guldugu ë muugu kay ã koddo addeeg ool, guldug nà wiəg əndəg, biig é kor é namees. Biig e tal é ceeg dhaag, guldun é andas taw èg guldun é ɲelag é wendad èg ná é əniid‑i.

¹⁰Deel man leen é Adan ã 'məddə kaal. E lada iiŋ garga yəəsə.¹¹Ná moog‑e bel Ficuun koyǎn addeeg‑eelga kərdəŋ é og ná bel Awiila taa paramg‑e.¹²Param é addeega na weedé èg kəmuliigə èg miidəg biig nà pargân wiəg‑i taǎn tu.¹³Deel yaan belâna Ji'uun lemǎn addeeg ná bel Kuc‑i kərdəŋ.¹⁴Deel ná ədiigə ozo‑e ë saaga bel Dijilə enna kaar fan é Acuuru é wag ná tel bəə̂n‑i. Yaan ná ədiigə yəəsə‑i bel Forat.

¹⁵Məi Tel e doos e bag jen duin e təli kaal‑eelg é Adan ẽ bui'i ẽ pəddi.¹⁶Məi Tel e kor jen duin: “Naam ɲalg é guldugu nà kaal‑eelg‑e kərdəŋ.¹⁷Guldun taman jo ná bel guldu é ɲelag é wendad èg ná é əniid‑i ar u nəəmi wa. É naanda ná u nəəmsi eem‑e, é see û tir.”

¹⁸Məi Tel e bee: “De weedân jen duin ã biddə́nĩn ã adda e mane wa. Â tal jaam ná taa ar een‑e ẽ corde.”¹⁹Məi Tel e war ɲənd man addeeg e kuu lewdag é muug kay èg miig é aweelge, e wərə̌niigə e təliigə é jen dui muu ẽ nəgdiigə é saag. Saaga nà jen dui tərsǐ egan saag é jee naan‑e.²⁰Jen duin e nag lewdaga é maag kərdəŋ èg miig é aweelge èg jeg é leeleege é səyəg. Een e mane jo, gəmsí jaam ná tall maŋ ã corden‑e wa.

²¹Məi Tel e 'nəd jen duin nag. E doos e gudí aam eem èg pebar man. E doos e mur wag naan é oɲ.²²Məi Tela e kuu od é aam ná gudǔní é jen duin beɲj‑e. Gəl e 'ədə̌ni deena ĩnə.

²³Aneenda jen duin e bee:“Ada gəmsi aam nii leen dəəŋ, oɲ nii leen dəəŋ.Aneenda ê bel ‘od,’ é kora godǎná een é jen fuui iiŋ‑i.”

²⁴É koranda enna jen fuui e bii maazn èg faane, e mug è od iinini, eg àd jaa taman.

²⁵Jen fuuin èg od iinini ànǎn é kulmug ega naamǎnê laan wa.

Pioneer Bible Translators

https://app.library.bible/content/a230cccfbf4362be