Read Koreeg nà moog‑e 4

Koreeg nà moog‑e4

¹Adama e nag èg od iini Awan‑e, eelg e puuj e koo Gabiil e bee: “Məi Tel corsan enna a wərǐ jaa ná fuui.”²E doos e koo awl é Gabiil ná bel Abiil ná 'nəəmdə miəg‑i. Gabiil e buin.

³É naanda man Gabiil e doos e gaf galaga é aldan biig haye Telan.⁴Abiil e gaf miə iini ná mad‑e e moogo ná boy gol‑iilg‑i. Məi Tel e tur asam ná jissǐ maŋ‑e e guɲ hay é Abiil cucu,⁵gəl guɲsu Gabiilə èg hay iinini cucu wa. Aneenda Gabiil bagsê é rayne ləŋ e war ë muun taw.⁶Məi Tel e bee Gabiilən: “Ɲiin u nəəmdí uuŋ gəl‑i? O ɲiin u guní ü muun taw?⁷U jissî jin ná weed‑e ã guɲsí oon waw? Gəl u jissə̂ jis ná weeda wa‑e, de əniidə naa cuddu dool, oon taa ũ cuddu deel moog.”

⁸Gabiil e bee Abiil awlen: “Wayda faaz‑ool.” É gara lijjiigǐ faaz‑ool‑e Gabiil e doos e kar awle Abiilə e tirdi.

⁹Məi Tel e tissə Gabiil e bii'ĩnə: “Ü awl Abiil een da?”
E bee: “A ɲel wa. Aana paa ä awl‑e a?”

¹⁰Məi Tel e bee: “U jissə ɲii? Fiŋənə! Uniig é afad dö awlo bəəí dəəŋ leen addeeg.¹¹Bare oon a mirsun a gonson tui é aldan ná gosso iigə ã madda afad dö awlo ná u 'tirsə dö aas te.¹²Ma u buin addeeg te‑e, ê kunũn jeem wa. Û cəm wageeg e talg û fun wa addeeg‑oolo.”

¹³Gabiil e bee Məi Telan: “Mirəng ənəg nà u gəwsə̃n ta‑e maŋga ə̃nə əndəg. Â gar wa.¹⁴Bare u gunǐ aan tui é alda ná a bui'í eelg tu‑i â dərdə əəŋ duuŋə. Â cam â fun wa addeeg‑oolo. Jaam e gəmsî aan‑e ê tirda.”

¹⁵Məi Tel e bii'ĩnə: “Ana wa, jaam e tirsunî‑i â mirin garga idig dhaag tawma.” Aneenda Məi Tel e doos e bag ɲee é Gabiil iiŋ gar jaam e mussî diiŋ‑i ê tirdi wa.

¹⁶Gabiil e wajaga tui é Məi Tel muu e lee e ab é aldan é Nud é Adana dumuun é wag ná tel bəə̂n‑i.¹⁷Gabiil e nag èg od iinini. Eelga e puuj e koo jaa iini ná bel Anuuk‑i. É garanda kuə̌n gaam man. É gara kussinǐ‑i e nəgi é saag dë jaane Anuuk.¹⁸Anuuk e koo Erad. Erad e koo Maweel. Maweel e koo Matuceel o Matuceel e koo Laamek.¹⁹Laamek e war ozoogo dhaag, man bel Aada, man e bel Silla.²⁰Aadan e koo Yabal ná assé baaw é jaga nà an é kumurg nəəmdə lewdag‑e.²¹Awle ná bela Yubal‑e een ná baaw é jaga nà undə jiŋər èg baal‑e.²²Silla e koo Tobal Gabiil ná liwsǐ jeg é peelg èg pandaseeg. Yaazz é Tobal Gabiil belǎn Neema.²³Laamek e bee ozoog inəgin: “Aadan èg Sillane, fiŋəə aan te ozoog é Laamek. Fiŋəə kor əənə ni maŋ, a 'tirsə jen man é kora dəwsǐ aan‑e èg buŋur man é kora wirsǐ aan‑e.²⁴Məi Tel e mirsî jen ná 'tirsí Gabiil‑i garga idig dhaag tawma‑e, Məi Tel ê mir jen ná ê tird Laamek‑e garga 77.”

²⁵Adama e doos e nag taan èg od iinini e koo jaa, odo e nag jaan Sees, e bee: “Məi Tel onsan é jaa man e celda wag é Abiil ná Gabiil tirsǐ.”²⁶Sees e koo jaa man di e nəgin Ənuuc. É mun naana jaga e àda fir é saag é Məi Tel.

Pioneer Bible Translators

https://app.library.bible/content/a230cccfbf4362be