Read Koreeg nà moog‑e 28

Koreeg nà moog‑e28

¹Aneenda Esaag e tarb Yagobo e əildi iiŋ e kurí ĩnə: “Ar u wər ɲaa é Kanaanga man wa.²Way baw‑eelg é Aram, é maag é Batowel faa é maaz uun. War od é garadi, é ɲalg é Laban awl é maaz uunu.³Bii Tel ná Segar‑e ẽ əildə uuŋu ũ kuddu ũ əddə o talg ũ ədə kaŋeeg é jag e talg.⁴Bii ẽ əildə uuŋ, oon èg dö məyədi, ar ná əildí Ibrəim iiŋii‑ni. Aneenda û wər alda ná u əní wəəndi, ná Tel gəwsí Ibrəimən‑i.”⁵Aneenda Esaag e cug Yagobo ẽ wayda baw‑eelg é Aram, gar é Laban jaa é Batowel ná é Aram‑e, awl é Rifgən, maaz é Yagob èg Issun.⁶Gəl Issun e tur asam ná Esaaga əildǐ Yagob iiŋ, cugsin ẽ wardé wag baw‑eelg é Aram, kursǐ ĩnə ar e wərǐ ɲaa é Kanaanga wa‑e,⁷o Issun e tur asam ná Yagob fiŋəssí kor é faan èg ná é maazn‑e lijjǐ baw‑eelg é Aram‑e.⁸Aneenda Issun e tur asam ná faa iinin ɲəmí ɲalg é Kanaanga wa‑e.⁹Enna wəjjí ma Isməil wərsǐ Maala, yaazz é Nabayot, ɲaa é jaa é Ibrəim Isməil. E təbin èg ozoog nà bilə̌ní‑ni.

¹⁰Yagob e waj tui é Biir‑Saba e waj dumuun é Araan.¹¹É gara lijjǐ e gəmsəgə wag man, e nag tu é kora tel wəldǐ. E war miid man ẽ kəiddi dë kaɲaad ẽ nagda naag.¹²E naamê caalge. Caalg‑iilgə e tur teed é tondolg ë bəl e tall addeeg eel e caa wag aweelg fəəriig é Tela e cugdə̌níigǐ e pəllə̌níigǐ.¹³Deel taw, Məi Tel e tall tu, e bee: “Aan Məi Tel, Tel ná dö baaw Ibrəim èg Esaag. Â gəfũn aldan ná u nəə̂ní ná oon èg dö məyədi.¹⁴Məyəd unugu ê àa e talg ar dufurd é aldan‑e, ê sàwr biig dumuun é wag ná tel bəə̂ní biig é wag ná tel wələ‑i, biig dumuun taw biig dum tad. Wisəg ë muug kaya addeeg‑oolo iiŋgə ê əil duuŋ o dö məyəd iiŋg.¹⁵Â tall èg doone â paa oon é wag ná û wəjí, â təndə̂nu é aldan ni. Â bii'un wa ləŋ a cində kora a tiwsǐ èg doon‑e.”¹⁶É gara Yagob fəissǐ taw‑e, e bee: “É see Məi Telan é wag ni! Aan a ɲela wa.”¹⁷E bagê kojone e bee: “Wag nassin nii bəgdug kojo ane te! Wag ni taa torome wa, wag é Tela, fol ná gosso iiŋ dum aweelg‑e.”

¹⁸Bimsəg‑uul Yagob e doos e war miid ná kəissǐ dë kaɲaad‑e e təli jerad ar tilŋəni e ugí əyəgə deel.¹⁹E nag wag na Bet‑El. Gaam na belǎn Luus moogo.²⁰Aneenda Yagob e bell aasa tad e bee: “Tel niin e ragsâ èg daane e passan é teed ná a leeŋé niin‑i e gəwsə̃n namees a naamé èg goog a gooé²¹ləŋ â mərə̂n teyag maa dä baaw cucu‑i, aneenda Məi Tel ê aa Tel əən‑i.²²Miid ná a talda taw tilŋə‑i ni ê aa wag é Tele. É see â gəfĩn əsəgdi é jeg ë muugu kay ná ê gəfə̃nǐ.”

Pioneer Bible Translators

https://app.library.bible/content/a230cccfbf4362be