Read Koreeg nà moog‑e 27

Koreeg nà moog‑e27

¹É gara Esaag məissǐ idig bussǐigi bur turǐ wag maŋ wa‑e, e tarb Issun jaa iinin ná faan‑e, e bii'ĩnə: “Jaa əən.” Issun e bee: “Aan ni.”²Esaag e bee: “A məissə. A ɲel naand é tiri əənə wa.³Aneenda, war raŋo uun è ɲalgeene, way wəl‑uul ũ dəf ə̃nə oɲ é leeleeg.⁴U liŵnə̃n namees ná a naamě. Aneenda â əild uuŋ bara a tir.”

⁵Gəl Rifgən fiŋənə̌n kora Esaag kurəgə̌nǐ jaa iinin Issun‑i. É gara Issu wəjjǐ wəl‑uul ẽ dawdé oɲ é leeleega man ẽ mərrí deen‑e,⁶Rifgən e bee jaa iinin Yagoban: “Tur. A fiŋəssə ö baawn e kora ö awl Issun:⁷‘dəfə̂nə̃n oɲ é leeleeg u liwə̂nə̃n namees ná cuu a naamé, aneenda â əild uuŋ é Məi Tel muu bara a tir.’⁸Bare jaa əən, fiŋənə maŋ kora â kurũní.⁹Way door‑eelg u bəgə̃n laamg biig dhaag nà wiəg‑i, aneenda gar ã liwsǐ namees man ná weedé ö baawn, ar ná ɲəminǐ.¹⁰Û gəfin ö baawn ẽ nəəmdi, aneenda gar ẽ əild uuŋ bara ẽ tirdə.”

¹¹Yagob e bee maaz iinin Rifgən: “Gəl ä awl Issun iiŋ taaé suud‑i. Aan əəŋ taaé suud wa‑e.¹²O ä baawn e sasarê əəŋ‑i, ê beên a basarsé. Jis ni ê wər̂nə̃n ruid ná é əildǐ əəŋ‑i.”

¹³Maaz iinin e bee: “Jaa əən, bii ruid ẽ walda dä ool. Jis kora a kursũní. Way u bəgə̂niigə ə̃nə.”¹⁴Aneenda e waj e baga miəgə maazn. Rifgən e liw namas man ná cuu‑i, ar ná faan ɲaminí‑i.¹⁵Aneenda Rifgən e war goog nà wiəg əndəg é jaa iinin Issun, nà taa te dë maade, e bədiigə jaa iinin Yagob ná ɲaan‑e.¹⁶E pədí é isig tad ë ŋalg gara səli é pare é miə.¹⁷Aneenda e gaf namas ná jissí cuu‑in è bawlg diiŋ jaa iinin Yagoban.

¹⁸E waj é faa iiŋ e bee: “Ä baaw.” Faa iinin e pəd kor e bee: “Jaa əən. Oon ŋənə?”

¹⁹Yagob e bee: “Aan Issun jaa uun ná faan‑en. A jis ar ná u kursə̃ní. Doos taw ũ nəəm oɲ é leeleeg ni eem gar ũ əild əəŋ.”

²⁰Esaag e tisi: “U gəmsí oɲ isi é raw ana, jaa əən?” E pəd kor: “Məi Tel, Tel uunu onsa.”

²¹Aneenda Esaag e bee Yagoban: “Lee dəəŋ teerma ã sasarsa uuŋ taw ã tursu o taa jaa əən Issu‑i é see war o taa een de wa‑e.”

²²Yagob e sur teerma dum é faa iini iiŋ. Faa iinin e səsərí iiŋ taw, e bee: “Kor taaé ná é Yagob‑e, isig taaéega nà Issu‑i.”²³Een tursi wa é kora isig təzíigǐ suud ar ë awlane Issun‑i. E guɲ ẽ əildí iiŋ.²⁴E tisi: “Oon jaa əən Issun é see a?” E pəd kor: “Əwəl.”²⁵Aneenda e bee: “Jaa əən, wər̂nə̃n oɲ é leeleeg eem ã naamsa. Â əild uuŋ.” Yagob e wəřní ĩnə e naam e wəřní ĩnə saan e mədi.²⁶Aneenda faa iinin Esaag e bii'ĩnə: “Jaa əən lee te ũ kuɲan dä bəw.”²⁷Enna wəjjǐ dum diiŋ‑i e kuɲi dë bəw. É gara Esaag firsǐ goog é Yagob‑e, e əild iiŋ e bee: “Aaa, ŋald é jaa əənə taa ar ŋald é gafan ná Məi Tel əildǐ iiŋii‑ni.²⁸Bii Tel ẽ gəwdũn koy aldan ẽ koddo jerg e maz tuu ũ bujju saa.²⁹Bii kaŋeeg ẽ kaamda ũnu. Bii jag ẽ gurumdũn tad, aa seende ö awleegan. Jaalgeen nà dö yaazn ê gurumũn tad. Jag nà e naron‑e e mirsə́. Jag nà ê əild uuŋ‑i ê əildə iiŋgə.”

³⁰É gara Esaag əildǐ Yagob iiŋ‑i Yagobo wəjjí tui é faa muu‑i, awlane Issun e badaga é gara liinǐ é wiləns‑i.³¹E liw namees di e wəri e gəfin faan. Aneenda e bii'ĩnə: “Ä baaw, doos taw ũ nəəm oɲ é leeleega ni, aneenda gar ũ əild əəŋ.”³²Faa iinin Esaaga e tisin: “Oon ŋənə?” E pəd kor: “Aan jaa uun Issun, jaa é moogo.”³³Esaag iiŋ e pərd taw jajam e bee: “Ŋənə taa te wərí ə̃nə oɲ é leeleeg ã namse? A naamǎn dü muu teerma bara u ədə̃n ã əildə iiŋ, é see iiŋ e əil!”³⁴É gara Issun fiŋəssǐ kor é faan‑e, e bad kor e ko əndəg e bee faan: “Əildə əəŋ jo di, faa əən!”³⁵Gəl e bii'ĩnə: “Ö awl lii basarsan. A əild iiŋ ná a əildǐ uuŋ‑i.”³⁶Issun e bee: “Yagob ë saaga tall tu é see! Basarsa wag dhaag. Warsé mooge əənə, bare warsa əildəg ənəgə!” Aneenda e tisə faan: “Û əildə əəŋ di waw?”³⁷Esaag e pəd kor: “A əssin seen uundi, a əssə ë awleegen dhəmg inəgi. A gəwsĩn jerg èg saa. Aneenda ɲiinə bare bur ã jisũn‑i, jaa əən?”³⁸Issun e bee faan: “Ü əildəg wag taman jo a, ä baawn? Əildə əəŋ di, ä baawn!” Aneenda Issun e on əndəg.³⁹Faa iinin Esaaga e pəd kor: “Û ən é aldan ná kon jeg əndəg wa ná taa koy əndəg wa‑e.⁴⁰Û nəəm é temar uun eed. Û əə dhəmdi ö awlan. É gara u ɲəwsǐ ũ lədə uuŋ diiŋ‑i, aneenda û pijə guurd iinin tuu dö ŋalga.”

⁴¹Issun e bag Yagob é əniid é kora faa əildǐ iiŋ‑i. E kor dë ŋalg e bee: “Ä baaw lejja teerma e tir. Aneenda â tirdə ä awl Yagobo.”⁴²É gara Rifgə feldána ĩnə é kor é Issun jaa iinin ná faan‑e kursǐ‑i, aneenda e tarb Yagob jaa iinin ná ɲaan‑e e bii'ĩnə: “Ö awl Issun gon ko ẽ tirdu.⁴³Gəl, fiŋənə kora a ɲam ã kurũn‑i. Doos gal maa dä awl Laban é Araan.⁴⁴Ana èg deene ləŋ ö awl ë bon e ada maŋ é yaag⁴⁵ləŋ ö awl ë bon e bijə ray ná naama een dum duuŋ‑i e jersa kora u jissí ĩn‑i. Â cugũn kor û təəgə̂n. Ɲiin â dhudí ogo og dhaage é naand taman?”⁴⁶Aneenda Rifgən e bee Esaagan: “Andasa messaan é kor é ozoog é Issun nà Esseeg nee. Yagob e warsê ɲalg é Esseeg niin man‑e, ɲiinə weeda é andasan‑e.”

Pioneer Bible Translators

https://app.library.bible/content/a230cccfbf4362be