Read Koreeg nà moog‑e 26

Koreeg nà moog‑e26

¹Gəl kun man ləzíigi tuu é gaam naadi ná dhaan ar ná ləzíigi moog é mun é Ibrəim‑i. Esaag e waj é kor è Abiməlik məlig é Filistiigə é Jarar.²Məi Tel e ŋol iiŋ Esaagan e bee: “Ar ũ wəy é Məsir wa. Ana é aldan ná â rimdũn ũ ən‑i.³Ana te é aldan niin é yaag. Â raa èg doone â əildə uuŋ. Â gəfũn alda niin kay èg dö məyəd‑i. Â tur meed ná a tiwsǐ èg dö baaw Ibrəim‑i.⁴Â ədə jaalgeeg unugu e talg ar pajog nà aweelgee‑ne. Â gəfĩgən alda ni kay. Â əildə kaŋeeg iiŋgə kay addeeg‑oolo é kor dö məyəd⁵é kora Ibrəim fiŋəssǐ aan o jissǐ jisig ë muugu kay nà a kursĩn ẽ jiddǐ‑i.”

⁶Enna Esaaga əssí é Jarar‑e.⁷É gara jag é Jarara tissǐigin é od iinin‑i, e bii'ĩgən: “De ä yaazzn,” é kora kojon nəəmə̌ni een ná e bii'í, “Od əən‑i.” Korǎn jag gaam nee ẽ tirdi é kor é Rifgə é kora kəyəərǐ əndəg‑i.⁸É gara Esaag əssǐ əndəg‑i, é naand man Abiməlik məlig é Filistiin e tur wag é parbalg é wee iinin e tur Esaag e ciində odene Rifgə.⁹Aneenda Abiməlik e tarb Esaaga e bii'ĩnə: “Rifgə taân od uun é see! Ɲiin u bissǐ ö yaazzn?”
Esaag e pədĩnə kor: “A korǎn jaam na tirdan é kor iinin.”¹⁰Abiməlik e bee: “Ɲiin u jissə̃gən ta anaan‑e? Jaam e nagsê èg od uun naan‑e û wərí ə̃gən ruid waw?”¹¹Abiməlik e kor jag inəgin e bee: “Jaam ná lawsa jen niin èg od iinin‑i ê tirdə́nǐ.”

¹²Esaag e buu é alda naana. É duud naana e waraga kaaŋan é mada é miyəg, é kora Məi Tel əildǐ iiŋ‑i.¹³Esaag e ad seen é kaaŋa‑e. Kaaŋa iinin e mag e boɲ ləŋ ẽ adda bel kaaŋa əndəg.¹⁴E bel əəriig e talg èg miəg èg tog, e bel dhəmg e talg. Filistiigə bəgíigî é muguri.¹⁵Aneenda biirgə nà dhəmg é faan bəssíigi é mun ná faa iinin Ibrəim‑i, Filistiigə e durdíigə iilgə é aldag.¹⁶Aneenda Abiməlik e bee Esaagan: “Way tui dəəŋgə de u əssə o segar əndəg ũ gəldə aga tuu.”¹⁷Enna Esaag wəjí tui ti e bell kumurg inəgin baw‑eelg é Jarar e ab tu.¹⁸Esaag e jall biirg iilgə tuu nà gəɲsə́nə é mun é faa iinin Ibrəim‑i, dursî Filistiigə iilgə é gara Ibrəim tirsǐ. E nəgiigə é səyəg nà faan nəgsiigí jo.¹⁹Dhəmg é Esaag e gə̀ɲ biir baw‑eelg gə̀msəgə feg nà berg.²⁰Gəl kasag é lewdag é Jarar eg fiis èg kasag é lewdag é Esaage e bèe: “Biir ni əyən!” Esaag e nag biir naan Biir é Fii, é kora fiissǐigi.²¹Aneenda e gə̀ɲ biir ná dhaan taan, gəl e fiis é naadinə taan. E nəgin biir Biir é Ŋəməng.²²E waj dum moog e gəɲ biir ná dhaan. Jaam fiissǐ wa. E nag wag naan Kəgəər, e bee: “Gəl Məi Tel gəwsə̃gən wag man. Agâ bel jeg nà wiəg é alda ná taa kəgəər nii.”

²³É wag naadinə e məŋə é Biir‑Saba.²⁴É kaay naana Məi Tel e ŋulí ĩnə iiŋ e bee: “Aan Tel é dö baaw Ibrəimə. Ar kojon e bəí oon wa, de a tall èg doone. Â əild uuŋ â ədə məyəd unugu e talg é kor é dhəm əən Ibrəim.”²⁵Esaag e kuu wə e maa Məi Tel tu. E bell kumur tu. Dhəmg inəgin eg bad biir.

²⁶Abiməlik e wajaga é Jarara e leeŋ è Awsate jen ná rimdĩn koreeg‑e èg Fekol jen ná faan gon moraag inəgin‑i ẽ turdu Esaaga.²⁷Esaag e tisiigə: “Ɲiin u lii'ú ə̃nə, u gərsə̌nú aane o u gunú aan tui duuŋg‑i?”²⁸Eg pəd kor: “Ag turǎ maŋ ná Məi Tel təllí èg doone. Enna ag biə̌nǎ ã adda ã tiwdə meed èg doone ã adda cucu.²⁹Ar u jisǐ ə̃gən jisə man ná ənǐ wa ar ná a təlǎ oon cucuii‑ni. Bare Məi Tel əildə uuŋ.”³⁰Aneenda Esaag e jisĩgən namas e mada, eg mad jega.³¹Wag əssǐ bimsəg‑uul‑i Esaag èg joge e doos e bèll isigə tad. Aneenda Esaag e dhəwiigə e wàj cucu.³²É naand naadinə dhəmg é Esaaga e àdaga e kùríigə ĩnə é kor é biir ná gəɲíigi. E bèe: “Ag gəmsǎ feg!”³³E nəgin Saba, enna gaam ë saaga bilíigi Biir‑Saba ləŋ bare.³⁴É gara duug é Issu əssǐigi 40, e jəld Yawdeet ɲaa é Biri ná Esse, e war Basma ɲaa é Elon ná Essen di.³⁵Rifgən èg Esaage ë bonaaga əngə̌n é kor é ozoog é Issun.

Pioneer Bible Translators

https://app.library.bible/content/a230cccfbf4362be