Koreeg nà moog‑e25
1Ibrəim e war od man ná dhaan‑e belǎn Gatora.2E kuu'ĩn Zemran, Yakcaan, Madaan, Medyan, Yijbag, èg Cuu'a.3Yakcaan e koo Caba èg Dadaan. Məyəd é Dadaan egan nà Acuuriigə èg Lathuciigi èg Ləumiigi.4Jaalgeen é Medyana egan nà Ifaa, Ifru, Anuuk, Abida, èg Aldaa. Eg kay məyəd é Gatoran.5Ibrəimə e gaf kaaŋa iinin kay jaa iinin Esaagan.6Gəl é gara Ibrəimə e bur e an taw‑e, e gaf jeg biig nà wiəg jaalge inəgin nà kossê é ozoog inəgin nà dhəmg‑i e guniigə tui é jaa iinin Esaag iiŋə eg waj dum é alda gara tel bəə̂ní.7Duug é Ibrəim kay nà əssǐ taǎn 175.8Aneenda Ibrəimə assé duugu eg talg e tir, ë kuuzn e waj èg dë məyədini.9Jaalge inəgin Esaag èg Isməili e duríigin é baal é Makfiila ná teerma é Mamara é gafa é Afron jaa é Soar ná Esse,10gafa ná marsê Ibrəim gar é Esseeg‑e. Eg dur Ibrəimə èg od iinin Sarane tu.11É gara Ibrəim tirsǐ‑i Tel e əild jaa é Ibrəim Esaaga iiŋ, anǎn teerma é Waa ná Denoog Tursan‑e.12Koren rimdə̂n jaalge é Isməil jaa é Ibrəimə, jaa ná kossána Ibrəimən é Ajir ná Məsiri dhəm é Sara.13Jaalge é Isməilə ë səyəgə nee, ar ná dəwəsíig iiɲigin‑i: Nabayot jaan é Isməil ná é moogo, Gidar, Adabeel, Mibsaam,14Micama, Duma, Masa,15Adad, Teema, Yathuur, Naafic èg Gidma.16Jaalgeen nee kay é Isməilə, e nàgá wisəg ë muugu é səyəg iyəgi. Taǎn seenga əsəgdi è nà dhaag‑e.17Duug é Isməil nà əssǐ taǎn 137. E tir, ë kuuzn e waj èg dë məyədini.18Jaalgeen inəgin e sàwr é Awiila dumuun é Cuur teerma ee‑ool é Məsir, gara den wag dum é Acuur‑i. Ŋəmənəsə̌n èg awleegee‑ne.19Koren rimdə̂n jaalge é Esaag jaa é Ibrəim. Ibrəim e koo Esaag.20Duug é Esaaga taǎn 40 é gara jəldǐ Rifgə ɲen é Batowel ná Arami lee é baw‑eelg é Aram yaazz é Laban ná Arami.21Esaag e fir Məi Telan é kora od iinin təə̌nǐ jiwirdi‑i. Məi Tel e fiŋə fir iinin, od iinin Rifgən e wars.22Jaalgeen e məə̌nəs ege dë eelga, e bee: “Ɲiin e jisa aneen‑e?” Aneenda e waj e tisə Məi Tela.23Məi Tel e bii'ĩnə: “Kaŋeeg een dö eelg dhaag, ê lə̀sə iilgə kaŋeeg dhaag. Kaŋ man ê aa e segar e gal golon, kaŋ ná faan‑e ê aa dhəm í golo ná ɲaan‑en.”24É gara wag əə'ǐ ar ẽ koddé, jaalgeen dë eelga e taa wayg.25Jaa ná ləzí moog‑en beraǎn, iiŋ e taa suud. E nagen Issu.26Yaan e ladaga e gon golon dë lud bəlgi, e nagen Yagob. Duug é Esaaga taǎn 60 é gara Rifgən kussǐ jaalgeen‑e.27Jaalgeen e faŋa, Issun e ɲel wiləns əndəg e ad jaa é wəl‑i. Yagob taǎn jaa ɲudi anǎn kumurg‑iilg.28Esaaga ɲəmə̌n kor é Issu é kora nəəmdí oɲg é leeleeg‑e. Rifgən e ɲəm kor é Yagob.29É naanda man Issun e adaga faaz‑oolda e naamê kuni e gəmsəgə Yagobo e jisə kaar man é kaar é dhəwəg.30Issun e bee Yagoban: “Gəfə namees ná bera na ã namsa eem de kun naama.” Aneenda enna nagsána een Adoom‑e.31Yagob e pəd kor e bii'ĩnə: “Mərdə̃n mooge uunu moog.”32E bee: “Tur a waja â tir. Mooge gaf ə̃nə ɲii weeda?”33Gəl Yagobo e bii'ĩnə: “Billə̃n ö aas tad moog.” E billĩnə ë aas tad e mərd mooge Yagoban.34Aneenda Yagob e gəfĩnə bəuulg biig é kaar é dhəwəg. E naam e mad e doos e waj. Issun ŋaɲsé mooge iinin.
Pioneer Bible Translators