Read Koreeg nà moog‑e 24

Koreeg nà moog‑e24

¹Ibrəim məissí əndəg, duug inəgin koyjé, Məi Tel e əildí iiŋ é jega kay.²E bee daa é dhəmg ná teyag dë maade, ná gunĩn kaaŋa kay: “Billə ooso tad.³A ɲam ũ billə̃n ö aas tad é saag é Məi Tel, Tel ná təlí aweelg èg addeeg‑e, gar ar u wər̂ní od man jaa əənən é ɲalg é Kanaan nee a aně diilg te wa.⁴Gəl way é gaam é jag ənəg, û wərə̂n od jaa əən Esaagan.”⁵Dhəm e tisi: “O odo e massâ ná ẽ waydé èg daane é alda niin‑i, â war jaa uunu ã taan deena é gaam ná u liiní‑in a?”⁶Ibrəim e bee: “Fiŋənə kore maŋ. Jaa əən ar u wəy deena dumuun ti wa.⁷Məi Tel, Tel ná təlí aweelg‑e, ná gussí aan teyag maa dä baaw‑e é gaam əənə, ná korso èg daane ná tiwsə meed èg daane biissə̃n: ‘Â gafa alda niin ü məyədən.’ Ê cuu fəər iinin dü muu gar û gəmsə̂ní od jaa əənən é garadi.⁸Odo e massâ ná ẽ waydé èg doon‑e, aneenda u pii ü ŋalga é korena. Kora tu‑in ar u ədǐ è jaa əən ti wa.”⁹Aneenda dhəm e bell ë aasa tad seen iinin Ibrəimən é kora.

¹⁰Aneenda dhəm e bag kəmdəlig əsəgdi nà é seen iinin, e doos e war jeg é muugu biig nà wiəg‑i kay gar é seen iinin. E waj é Aram Nareen dumuun é gaam ná Nauur ənə̌nǐ.¹¹E gurumd kəmdəlig tu biir‑muu é gaam naadi. Wag assé dum jiig muu, ar ná ozoogo wəyə̌níigi ẽ kawda feg‑e.¹²Aneenda e fir: “Məi Tel joo, Tel é seen əən Ibrəim, 'cəədə̃n koren é naanda niinə, raa èg seen əən Ibrəimi.¹³Tur, aan ni tall biir‑muu ni, ɲalg é jag é gaam nee leeŋ ẽ kawdo feg.¹⁴Bii ẽ adda ane, ɲen ná a kursĩn: ‘joo pəlləndə luuŋ uun tad ã masa feg biig‑i,’ een ê bee: ‘maa de â məddə kəmdəlig unug di,’ bii ẽ adda ɲen ná u tursu dhəm uun Esaagan‑e. Aneenda â tur asam ná u rəgsí èg seen əən‑i.”

¹⁵Bara e cində firə, Rifgə e badaga e gon luuŋ dë bora. Rifgən ɲen é Batowela jaan é Melkan ná od é Nauur awl é Ibrəim‑i.¹⁶Ɲen taǎn əŋi kayaaran əndəg, jen fuui man nəgsí èg deene wa. E pall biir‑eelg, e pərdəgə luuŋ iinin e ladaga tuu.¹⁷Dhəm e mirí dumuun diiŋ e bii'ĩnə: “Gəfə̃n fega biig faraj jo nà u gun luuŋ‑iilg dö maad ta‑e ã masa.”¹⁸Ɲen e bee: “Maa, seen əən.” É raw ana e pəllənd luuŋ tad dë əsəgə e gəfĩnə fega e mad.¹⁹É gara məssǐ feg‑e, Rifgən e bee: “Â 'mədə kəmdəlig unugu di ləŋ e bèera.”²⁰Aneenda məŋsí é raw ane fega nà luuŋ‑iilg‑i poor‑eelg‑e, e gal e mər waa‑eelg ẽ tawdé feg ẽ məddí ĩnə kəmdəlig kay.²¹Jen fuui e deni thiiŋ, e gon kor deelg ẽ turdu e been Məi Tel e cəssî kor war e cəssî wa‑e.

²²É gara kəmdəlig məssǐigi, jen fuuin e godogo tiwi é param ná gon wag fodor‑e lolom fan man èg beelg é paramga nà dhaag‑e taa lolomg əsəgdi.²³Aneenda e tisi: “Oon ɲaa é ŋənə? Kurəsə ə̃nə joo, wag man teyag maa dö baaw ã nagda é kaay niin a?”²⁴E bii'ĩnə: “Aan ɲaa é Batowela jaa é Melka ná kussí Nauurən‑i.²⁵Ag bel leel e mada èg saroone, è wag ná ũ nəgdú é kaay niin‑i.”²⁶Aneenda jen fuuin e gurum tad e maa Məi Tela²⁷e bee: “Bii maanga ẽ adda Məi Telan, Tel é seen əən Ibrəimə, ná rəssə jisig inəgi nà wiəg‑i wa‑e ragsa èg seen əəni. O Məi Tel lindí aan é teed ni jaar ni e tal aan teyag maa jag é seen əən.”²⁸Ɲen e gal e kor teyag maa maazn é jisig nà assa nee.

²⁹Gəl Rifgən belǎn awle bel Laban, e ladaga tuu é raw ẽ muddu è jen fuui iiŋ biir‑muu.³⁰É kora tursǐ tiwi í fodoro èg beelga é yaazzne ë aas‑e fiŋəssǐ Rifgən birsǐ kora jen fuui kurí ĩn‑i, e waj e gəmsəgə jen fuuin e tall kəmdəlig‑əəŋg biir‑muu.³¹E bee: “Lee, oon ná Məi Tel əildí iiŋ‑i. Ɲiin u təllǐ tuu? A təldũgun wee ũ nəgdú èg wag kəmdəligən.”³²Gəl jen e koyj teyag, Laban e pəllənd kəmdəlig iilgə tad. E gəfĩgən saroon èg leele, e waraga fega dhəm é Ibrəimən èg buŋurg inəgini ẽ cəgdíigi ë luugu.

³³Aneenda e wərə̌nĩgən namas e təli dë muu, gəl e bee: “Aan â naam wa ləŋ a korasa kora a ɲam ã kor‑e.” Laban e bii'ĩnə: “Koro.”³⁴Aneenda e bee: “Aan dhəm é Ibrəimə.³⁵Məi Tel əildə seen əən iiŋ əndəg, ada bel kaaŋa e mada. Məi Tel gəwsĩnə əəriig èg tog, kursug èg paramg, dhəmg nà fuuig èg nà ɲeeg, kəmdəlig èg cooleeg.³⁶Od é seen əən Saran kussĩn jaa é gara yuussǐ, Ibrəim gawsa jaa iinin jeg kərəŋ nà een bilí.³⁷Seen əən 'billda aas tad, biinə̌n: ‘Ar u wərí od man jaa əənən é ɲalg é Kanaan nà ané é gaam iyəni te‑e wa.³⁸Gəl way taag maa jag dä baaw, wii muu dä maad û wərgə̂n odo jaa əənən.’³⁹A tissə seen əənə: ‘Ɲiin ê aa de odo e massâ ná ẽ waydé èg daane?’⁴⁰E pəddə̃n kor e bee: ‘Məi Tel ná a talldé èg deene ê cuu fəər dü muu ẽ cədũn kor ũ gəmsən od jaa əənən wii muu dä maad, maa jag dä baaw.⁴¹Aneenda, o leejjâ wii muu dä maade, jag e màssa ná ẽ gəwdũn ɲen‑i û pii kor əən dö ŋalga.’⁴²É gara a lii biir‑muu é naanda niin‑i, a beessa: ‘Joo Məi Tel, Tel é seen əən Ibrəim, cədə̃n kora ẽ wəydí aan ni joo.⁴³Tur, aan nii tall biir‑muu ni. Bii ɲen ná lii ẽ kawda feg a biissĩn: “Jo gəfə̃n feg biig faraj ã masa luuŋ‑iilg dö maad ta,”⁴⁴een e bee: “Maa de â məddə kəmdəlig unugu di,” bii ẽ adda ɲen ná Məi Tel tursí ẽ adda od é jaa é seen əənən‑i.’

⁴⁵Bara a cində fir dä eelg‑e, Rifgə e badaga e gon luuŋ dë bora. E pall biir‑eelg e pərdəgə luuŋ iinin, a bii'ĩn, ‘Gəfə̃n feg biig joo ã masa.’⁴⁶É raw ana e pəllənd luuŋ tad dë bora e bee: ‘Maa de â məədə kəmdəlig unugu di.’ Gəl a mad, e məd kəmdəlig ənəgə jo di.⁴⁷A tisi: ‘Oon ɲaa é ŋənə?’ E bee: ‘Aan ɲaa é Batowel jaa é Nauur, ná Melkan kussǐ ĩn‑i.’ Aneenda a bədĩn tiwi dë fodor a bədĩn beelga dees.⁴⁸A gurum tad ã fir Məi Telan. A maa Məi Tel, Tel é seen əən Ibrəim ná liiní daana é teed ná weed‑e a gəmsən od jaa é seen əənən gar é jaa é awlane.⁴⁹Gəl ug na jisî seen əənə ma maŋ ləŋ duulg é ceeg‑e u kurə̃n. Ug na jisî wa‑e u kurə̃n. Gar ã tursí teed man.”⁵⁰Laban èg Batowele eg bee: “Koren leen gar é Məi Tel. Aga gar ã kurũn kor man wa.⁵¹Rifgə ni, waren ũ wəidə ẽ adda od é jaa é seen uun‑i, ar ná Məi Tel kursiní‑i.”⁵²É gara dhəm é Ibrəim fiŋəssǐ kora kursíig‑i, e gurum tad é Məi Tel muu.⁵³Aneenda dhəm e godaga paramg èg kurus é koraje èg goog, e gəfiigə Rifgən. E gaf jeg biig jo di awl é ɲenan èg maaz é ɲenan nà wiəg əndəg.⁵⁴Aneenda een èg jag nà taa èg deen‑e e naam e mad e nag é kaay naana ta.
É gara nəgsíigǐ wag fissǐ‑i e bee: “Təldan ã waysa ã taasa é seen əən iiŋ.”⁵⁵Gəl awlane èg maazne e bee: “Bii ɲen ẽ adda è dage dumuun naag əsəgdi, aneenda gar ũ wəydə.”⁵⁶Gəl e bii'ĩgən: “Ar ugu təw ä muun tad wa. Bare Məi Tel cəəssə̃n kora əddí aan‑e, bidan ã taasa de waja é seen əən‑i.”⁵⁷Aneenda eg bee: “Bii ã tarda ɲen. Agâ fiŋə kora guní dë eelg‑e.”⁵⁸Eg tarb Rifgən e tisiníigi: “Û wəy èg jen niin a?” Rifgən e bee: “Â way.”⁵⁹Eg dhaw yaazzne Rifgən ẽ wayda èg daa iini èg dhəm é Ibrəimi èg buŋurg inəgini.⁶⁰Eg əild Rifgə iiŋ, e biə̌níigə ĩnə: “Äg yaazz, boɲ ũ ədə alfaga alfag, ü məyədə ẽ bàgda gaamg é jag nà ŋəməniig‑i.”⁶¹Aneenda Rifgən èg ɲalg inəgin nà dhəmgii‑ni eg doos e cud kəmdəlig‑uulg eg waj èg jene. Aneenda dhəm e war Rifgə e waj.

⁶²Esaaga mərí é Waa ná Denoog Tursan‑e dumuun é Nagab é wag ná əní é fay.⁶³É naanda man wag taǎn jiig, Esaaga e waj dum gafa‑eelg ẽ pərrə, é gara wərsǐ eel taw‑en e tur kəmdəlig biig e lèeŋ dum diiŋ.⁶⁴Rifgən e wii wag di e tur Esaaga. E pall tad kəmdəl‑uul dë maade,⁶⁵e tisə dhəmə: “Jen fuui na een ná leeŋ gafa‑eelg dum dəəŋg te?” Dhəm e bee: “Seen əənə.” Rifgən e kumur ë muun tad é goo.⁶⁶Aneenda dhəm e kor Esaagan é jisig nà assé kay.⁶⁷Esaag e kuyd Rifgən kumur‑iilg ma maaz iinin Sara, e jəldi e ad od iinin, e ɲəmi əndəg. Ë bon e ad e cuu taan, é kora ë bon ənə̌nǐ é tiri é maazn‑e.

Pioneer Bible Translators

https://app.library.bible/content/a230cccfbf4362be