Read Koreeg nà moog‑e 22

Koreeg nà moog‑e22

¹É gara jisigə nee kərdəŋ kujjǐig‑i, Tel e doos e cəw Ibrəimə. E bii'ĩnə: “Ibrəim.”
Ibrəimə e bee: “Aan ni.”

²Tel e bee: “War jaa uun ná taa taman, u ɲam əndəg bel Esaag‑e, way dumuun é gaam ná bel Moraya‑e. Wiri tad hay ná tuînə é moo'ee‑ne, é gaam man ná â rimdũn‑i.”

³Ibrəimə e doos é bimsəguul e tif cool iini‑eel. E war è dhəmg inəgi biig dhaag è Esaag jaan iinin. E war guldug nà ẽ tuidí hayn‑e. E doos e waj dumuun é wag ná Tel rimsǐ ĩnə‑i.

⁴É naanda ná ədə golgo ozo‑e Ibrəimə e wii wag e tur wag e tall duguud.⁵Ibrəimə e bee kasag inəgin nà dhaage kaama ĩn‑i: “Bumdinú aan te èg coole, agâ way aan è jaan əən‑i ã firdə Telan, de aga â mərə̂n duuŋg.”

⁶E doos e nag guldugu nà ẽ tujjə hayn‑e jaa iini Esaagan. Een e war moon è kaɲare. E wàj gar taman èg dhaage.⁷Esaaga e doos e tisə faan e bii'ĩnə: “Ä baaw.” Ibrəim e bee: “Aya, jaa əən.” Esaag e bee: “Bəl moon ni èg guldugi. Əər een da ná agâ tuyə hayn‑e?”

⁸Ibrəim e bii'ĩnə: “Jaa əən, Tel â gaf əər ná agâ tui hay‑e.” Eg doos eg waj gar taman.

⁹É gara Ibrəim cəggsíigǐ é wag ná Tel rimsǐ ĩnə ã wirrí hay iinin‑i, e doos e kuu wə man ã jiddí hay iini, e məlí guldugu dë ool. E doos e tif jaa iini tad, e nəgi wə‑uul guldug‑uulg.¹⁰Gəl e god kaɲar iini ã wirrə jaa iini.

¹¹Gəl fəər é Məi Tela ná lee aweelg‑e e tərbi e doos e bee: “Ibrəim, Ibrəim.”
Ibrəimə e bee: “Aya, aan ni.”

¹²Fəərə e bee: “Ar u ləwnǐ jaa uunu é kor é wirəŋ wa, a tursu asam ná u fiiní Tel‑e, u 'dərsə jaa uun ná taa taman‑e ə̃nə wa.”

¹³É garanda Ibrəimə e god idigə dumuun taw e tur əər man ná mad‑e e bagsê guldug‑iilg dë ulg‑i, e waj e bəgə̌ni e wiri é kora é wirəsi jaa iini hay‑e.¹⁴Ibrəimə e nag wag naan: “Məi Tel ê Gaf.” Ləŋ bare jag korân: “É gaam é Məi Tela, Tel ê gaf.”

¹⁵Fəər é Məi Tela ná lee aweelg‑e e tarb Ibrəimə taan¹⁶e bee: “A tiwsə meed ä ŋalgan, Məi Tel beên, é kora u jis anaan‑e, u 'dəldí jaa uunu ná taa taman‑e ə̃nə wa‑e,¹⁷â əildə uuŋ â əduugu og talg ar pajog é aweelg‑e ar sasaa ná deel ɲiid‑i. Məyəd unugu êg baa gaamg é jaga nà ŋəməniig‑i.¹⁸Â əildə jag iiŋgə kay addeeg‑oolo é kor dö məyəd unugu é kora u fiŋəssǐ aan‑e.”

¹⁹Ibrəimə e doos e taa dumuun é dhəmg inəgi iiŋg, eg wàj èg kərdəŋ dumuun é wag ná bel Biir‑Saba‑e, eg àb tu.

²⁰É gara wag man kuyjǐ é yaag‑e Ibrəim e bìǐnĩn: “Melkan yaazn di, een kosso jaalgeeg ö awl Nauurən:²¹Uus jaa é moogo, Bus awlane, èg Kamoil (baaw é Araam),²²èg Kaasad, èg Hasu, èg Feldac, èg Yadlaf, èg Batowel.”²³Batowel e koo Rifgə. Jag nee taa idig ozo nà Melkan kussí Nauurən awl é Ibrəimə.²⁴Od iini ná dhəm bela Rəuma‑e, e kosso jaalgeeg di: Thaba èg Jaim èg Taic èg Maaka.

Pioneer Bible Translators

https://app.library.bible/content/a230cccfbf4362be