Read Koreeg nà moog‑e 21

Koreeg nà moog‑e21

¹Məi Tel e tur Saran ar ná kursĩnǐ, Məi Tel e cəəd kor ná tiwsǐ è Saran‑e.²Saran e wars e koo jaa ná fuui Ibrəimən é gara məissǐ‑i é mun ná Tel kursí ĩn‑i.³Ibrəim e nag jaa ná kussə́nĩn é Saran‑e Esaag.⁴É gara jaa iini Esaag cəggsǐ naaga idig ozo‑e, Ibrəim e wirəndi ar ná Tel kursǐ ĩn‑i.⁵Ibrəim belǎn duugu 100 é gara jaa iinin Esaag kossánaé ĩn‑i.⁶Saran e bee: “Tel 'gəɲsa, jag kay nà fiŋəssə koren‑e ê gaɲ di.”⁷E bee taan: “Jag nà koraga Ibrəimən Saran ẽ jundu jaalge‑e taǎn a? Bare a kussĩn jaa é məidə iinin.”

⁸Jaan e faŋa ẽ biddí iigə. É naand ná Esaag bissə́nəí iig‑i Ibrəim e jis namees e mada.⁹Gəl Saran e tur jaan é Ajir ná Məsiri kussǐ Ibrəimən‑i e wagala jaa iinin Esaaga.¹⁰E kor Ibrəimən: “Gon od ná dhəm na tui è jaa iinini, de jaan é odo ná dhəm‑i ê bel buur man èg jaa əən Esaage wa.”¹¹Koran əssí Ibrəimə ë bon e ən əndəg é kora kor liiŋǐ dum é jaa iinin Isməil iiŋ‑i.¹²Gəl Tel e bii'ĩnə: “Ar ü kundu ẽ əddí é ən wa é kor é jaan èg od uun ná dhəm‑i wa. Fiŋənə kora Saran kursǐ ũn‑i, de ü məyədə e làdân é Esaag iiŋ.¹³Â ədə jaan é od ná dhəm‑i kaŋe jo di, é kora təzǐ jaa uun‑i.”

¹⁴Wag fissǐ‑i Ibrəim e war namees man èg əsəməɲ é feg e gəfiigə Ajirən. E gəgiigə ĩnə dë ŋalg e təliigə e waj èg jaane. Od e waj teed‑eelg e àda cam wəl‑uul dumuun é Biir‑Saba.¹⁵É gara feg ciissíigǐ əsəməɲ‑iilg‑i, e nag jaan tad é guldu man bəl.¹⁶Aneenda e waj e ab duguud dum doraga 100 é kora biissǐ: “A gar ã den jaan e tirə dä muu wa.” Ar ná əwsí ti‑i, e ada oné.¹⁷Tel e fiŋə ung é jaan. Fəər é Tela aweelga e tarb Ajirə e bii'ĩnə: “Ɲiinə əní Ajir? Ar kojon e bəí oon wa de Tel fiŋəssə ung é jaan ar ná nəzí ti‑i.¹⁸War jaan taw baa een dë aas de â ədin kaŋ maané.”¹⁹Aneenda Tel e gudí idigə e tur waa é fega. E pərdəgə əsəməɲə é feg, e gaf jaan e mad.²⁰Tel tallǎn è jaane, e faŋa. E an wəl‑uul é Faraan e ad jen ná ɲel wiləns‑i.²¹É mun ná ənə̌nǐ wəl‑uul é Faraan‑e maaz iinin e wərə̌ní ĩnə od é Məsir.

²²É mun na, Abiməlik èg Fekol moraan ná mada gon moraag inəgin‑i e bèe Ibrəimən: “Tel tallân èg doone é jisig kay nà u jisǐ.²³Bare billə̃n ö aas tad é Tel muu te ná û jisǐ pirəns ə̃nə wa‑e èg jaalgeeg ənəgi war èg ä məyəd ənəgi wa‑e. Jisan maŋ è gaam ná u ənǐ wəndii‑ni ar ná a jissǐ oon maŋ jo di'ii‑ni.”

²⁴Ibrəim e bee: “A bellda aas tad.”²⁵Aneenda Ibrəim e fel Abiməlikən é kor é biir ná dhəmg é Abiməlik məssíigi.²⁶Gəl Abiməlik e bee: “A ɲel jen ná jissə jis niin‑i wa. Oon u kursí ə̃nə wa, a fiŋəssə koren é naand ni jo.”²⁷Een ná Ibrəim bəzí əəriig èg toog‑e e gəfiigə Abiməlikən. Jag fuuig nà dhaag nee eg tif meed.

²⁸Gəl taan Ibrəim e karr əəriig nà ɲeeg‑e dhog idig dhaag moraa‑eelga.²⁹Abiməlik e tisə Ibrəim: “Jis ni rimdə̂n ɲii ná u kərrsí əəriig nà ɲeeg‑en dhog idig dhaag e manéeg‑e?”³⁰Ibrəim e pəd kor: “Guɲə əəriig nà idig dhaag nee dä aasa ẽ rimdə aana gəɲsə biir niin‑i.”³¹Enna wag naan tarsána Biir‑Saba‑e, é kora jag fuuig nà dhaag‑e billdǐigə isig tad tiwsǐigə meed‑e.³²É gara tiwsǐigə meed é Biir‑Saba‑e, Abiməlik èg Fekol moraan ná gon moraag inəgin‑i eg taa dum é aldan é Filistiigə.³³Ibrəim e tum guldu é asla é Biir‑Saba. É garadinə Ibrəim e fir é saag é Məi Tel, Tel ná e ləŋ pada.³⁴Ibrəim assé əndəg é aldan é Filistiigə.

Pioneer Bible Translators

https://app.library.bible/content/a230cccfbf4362be