Koreeg nà moog‑e20
1Ibrəim e məŋə dum é gaam Nagab e ab é ceeg é Gaadic è Cuur. E ab é yaag é Jarar.2É garadinə Ibrəim e bee jogon odene Saran: “yaazz əənə.” Aneenda Abiməlik məlig é Jarar e cug ẽ bəgdəní Saran.3Gəl Tel e adaga Abiməlik iiŋ caalg‑iilg é kaay man e bii'ĩnə: “Û tir é kor ẽ od ná u bəgsǐ. Od na taa é jid.”4Abiməlik nəgsí èg deene wa, enna bissǐ: “Seen, û jədə kaŋ ná ber‑en a?5Eena kursə̃n Saran ë yaazzne waw? Saran eena korso: ‘Jen ni ä awle’ waw? Koren a jissə é kor man wa, ä aas ber.”6Aneenda Tel e kurĩnə caalg‑iilg: “Aw, a ɲel u jissə jis ni é bon ber. Enna a bijjǐ oon ũ jis əniid man dä muu wa‑e. Enna a bijjǐ oon ũ kəjí diiŋ wa‑e.7Bare pədə od é jen ĩnə, de jen naan caga naa firũn ũ dii wag. Gəl u pəəssî'i wa‑e, u ɲildə oon èg jag unugi ugû tir.”8Wag fissí Abiməlik e ko é dhəmg inəgin kay, e kurĩgən é jisigə kay‑e nà assé. É gara fiŋəssíigǐ kor‑e e bàgê kojoneega.9Aneenda Abiməlik e tarb Ibrəim e bii'ĩnə: “Ɲiin u jissə ə̃gən taa aneen‑e? Ɲiin a jissũn ənii ləŋ u wərə̂n ruid ná mada ni ə̃nə èg gaam əən‑i? U jissə̃n jisig biig nà taa ẽ jiddə́nə wa‑e.”10Abiməlik e tisə Ibrəimə: “Ɲiin jissú jis niin‑i?”11Ibrəim e pəd kor: “A korǎn, é see te jag feen Tela wa. A feyǎn ã tirdána é kor é od əən.12É see ä yaazzn, ɲaa dä baawn ag leen é maazn taman wa, a warsé od‑e.13É gara Tel kursǐ ə̃nə ã bijjǐ maaga nà dä baawn‑e, a bii'ĩn: ‘ag lejjâ gar man‑e û kur aan ö awla. Niin u rimdə asam ná u rəgsí èg daane.’ ”14Aneenda Abiməlik e baga əəriig èg tog, dhəmg nà fuuig èg nà ɲeeg, e gəfiigə Ibrəimən, e pəd ĩnə od iinin Saran.15Abiməlik e bii'ĩnə: “Alda əənən ni dü muu. Aw é wag man ná u ɲəm ũ əbí ö bon rəgsí.”16E bee Saran: “A gawso ö awlan kursugə lolomga 1000 ẽ rimdə ná u birí é jisə ná ən assé duuŋ é jag‑muug‑i de oon u bir ö ŋalg kay.”17Aneenda Ibrəim e fir Telan, Tel e bənd Abiməlik èg od iinini èg dhəmg nà ɲeegee‑ne gar ẽ belda jaalgeeg taan18é kora Məi Tel əssǐ ozoog nà maa Abiməlik‑i kay jiwirgǐ é kor é od é Ibrəim Sara.
Pioneer Bible Translators