Přečtěte si Koreeg nà moog‑e 1

Koreeg nà moog‑e1

¹É gara moog‑e, Tel talda aweelga èg addeeg.²Addeega taǎn fuul war taǎn jeem wa, duidə e kumur feg‑uulg nà gaal dumuun tad feg‑iilg, Kuuz é Tela e leen feg‑uulg.

³Tel e bee: “Poongo bii ada tu.” Poongo e ad.⁴Tel e tur asam ná poongo wiəgiigí‑i, e doos e ped poongo è duidi.⁵Tel e nag poongo “telee,” e nag duidə “kaay.” E ad jiig è bimsəg é naanda ná moog‑e.

⁶Tel e bee: “Bii fuul ã adda é ceeg ã ladda feg‑iilgə.”⁷Aneenda Tel e jis fuulu ẽ lad feg nà fan tad‑e è nà fan tawe‑ne. Gəl e ad.⁸Wag ná tall fuul dumuun taw‑e Tel e nəgi “aweelg.” E taa jiig è bimsəg é naanda ná ədiigə dhaag‑e.

⁹Tel e bee: “Bii feg nà aweelg fan tad‑e ã malda é wag taman, bii wag ná am‑e ã goddo iiŋ tu.” Gəl e ad.¹⁰Tel e nag wag ná am‑e “addeeg,” ná taa feg‑e e nəgi “deeleeg.” Anaanda gəl Tel e tur asam ná wiidí‑i.

¹¹Anaanda Tel e bee: “Bii addeeg nii ã koddo galag èg foydaag nà laza é maaŋg iyəgi èg guldug nà kon ɲalgeeg nà diiŋg‑i asam ná təə'íigǐ dë beegee‑ne.” Gəl e ad.¹²Enna addeega kussí galag èg foydaag nà laza é maaŋg iyəgi èg guldug nà kon ɲalgeeg ar ná təə'íigǐ dë beegee‑ne. Guldug ɲalgen e taa idig. Tel e tur asam ná wiidí‑i.¹³E taa jiig èg bimsəg é naanda ná ədiigə ozo‑e.

¹⁴Tel e bee: “Bii poong ẽ adda aweelg é wag ná taa fuul‑i, ã ladda kaayn èg teleene, bii ẽ adda ŋayge eg rimdə mung èg naag èg duug.¹⁵Bii ẽ bàgda aweelga ẽ gàwda poong dumuun addeeg.” Gəl e ad.¹⁶Tel e jis pooŋg dhaag nà maŋg‑e aweelg, ná goon əndəg‑i ẽ bagda é telee, yaan ná goon é yaag‑e ẽ bagda é kaay. E jis pajogo jo re.¹⁷Tel e gəgiigə aweelg ẽ bagda ẽ ifə wag dumuun addeeg,¹⁸ẽ goddo teleen è kaayne ẽ pedda poongo iilgə è duidi, Tel e tur asam ná wiidí‑i.¹⁹E taa jiig èg bimsəg é naanda ná ədiigə yəəsə‑i.

²⁰Tel e bee: “Bii jega nà talg denoog‑e ã pàrda feg‑iilg, bii miigə ã pə̀rdə taw aweelg.”²¹Tel e doos e tal jeg nà maŋg àn feg‑iilg‑i, èg jeg nà àn feg‑iilg‑i kərdəŋ asam ná təə'íigǐ dëg beegee‑ne, è miigi asam ná təə'íigǐ dëg beegee‑ne. Tel e tur asam ná wiidí‑i.²²Tel e əildí iiŋgə e kurĩgən: “Kuddu əddə og talg, 'pərdə feg‑iilg, bii miigə ẽ àdda eg talg addeega.”²³E taa jiig è bimsəg é naanda ná ədiigə asaman‑e.

²⁴Tel e bee: “Bii jeg nà denoog‑e ã ladda addeeg asam ná təə'íigǐ dë beegee‑ne: lewdag é maag, èg jeg nà bàlda tad addeeg‑ool‑e, èg lewdag é leeleeg asam ná təə'íigǐ dë beegee‑ne.” Gəl e ad.²⁵Tel e tal lewdag é leela èg nà é maag‑e ar nà təə'íigǐ dë beegee‑ne èg jeg nà bàlda tad‑e asam ná təə'íigǐ dë beegee‑ne. Tel e tur asam ná wiidí‑i.

²⁶Tel e bee: “Lizzu ã jiddə jen duin ar ɲee əyən‑i ar ná ag taa'ee‑ne. Bii ã goddo məŋid é gəwldəəgə nà deel‑eelg‑e èg miig é aweelg, lewdag é maag èg lewdag é leel‑e kərdəŋ, èg jega nà balda addeeg‑ool‑e kay.”²⁷Tel e tal jen duin ar ná təə'í‑i,ar ná Tel təə'í‑i e təli,ná fuui èg ná ŋay e təliigə.

²⁸Anaanda Tel e əildí iiŋgə e kurĩgən: “Kuddu əddə og talg, 'pərdə addeega, a gafân ũgun məŋid ná addeeg‑ool‑e. Guddu gəwldəəg nà deel‑eelg‑e èg miig é aweelga èg jega nà balda tad addeeg‑ool‑e kay.”²⁹Tel e bee: “Fiŋə aan te, a gafân ũgun galag èg foydaag addeeg‑ool kərdəŋ, è guldug ã koddo ũgun ɲalgeeg èg foydaag diiŋg, ã adda ũgun nameesa.³⁰Lewdag kay addeeg‑oolo, èg miig é aweelga, èg jeg nà balda tad addeeg‑ool, èg jeg nà denoog‑e kərdəŋ, a gafân ĩgən jeg nà ɲaarg‑e kay nameesa.” Gəl e ad.

³¹Tel e tur jeg nà təldǐ kay‑e asam ná wiəgíigi əndəg‑i. E taa jiig èg bimsəg é naanda ná ədiigə thəldig‑i.

Pioneer Bible Translators

https://app.library.bible/content/a230cccfbf4362be