Read Koreeg nà moog‑e 16

Koreeg nà moog‑e16

¹Bare Sara'e, od é Abrama, beldé jaalgeen biig ĩnə wa. E bel Məsiri man ná dhəm‑i belǎn Ajir.²Aneenda Sara'e biissǐ Abraman: “Məi Tel bijjí aan ã bel jaalgeen wa‑e. Way, u nəgə èg ɲen əən ná dhəmii‑ni. Gar ẽ bildə̃n jaalgeen biig.” Abram e guɲ kora korsê Sara'e‑ne.³Aneenda é gara Abram əssǐ é Kanaan duugu əsəgdi‑i, ë odene Sara'e e war ɲen iini ná Məsiri kəəmĩnǐ‑i Ajirə e gəfi jid iini ẽ əddin od ɲaane.⁴E nag èg Ajiri, Ajir e wars. É gara tursǐ ë ŋalga wərsǐ‑i e ada jisə Sara'e seen iini jam.

⁵Aneenda Sara'e e bee Abraman: “Oono bel kora ən â dawr̂né niin‑i. A gəwsũn ɲen əən ná dhəm‑i ẽ nagda èg doone. Bare é gara e tursǐ ë ŋalga wərsǐ‑i ada jisə̂nan jam. Bii Məi Tel ẽ turdu kor əənə èg oon‑e.”⁶Abram e bee: “Ɲen uun ná dhəm‑i een ná dusug. Jisĩn é jis ná u tur weeda ũn‑i.” Aneenda Sara'e e jis Ajir jajam ləŋ e gal tui diiŋə.

⁷Fəər é Məi Tela e gəmsəgə Ajir é waa eed man wəl‑uul, waa eed taǎn dumuun é teed ná way é Cuur‑i.⁸E bee: “Ajir, dhəm é Sara'en‑e, u liin da, u wəjə da?” Ajir e pəd kor: “A gəlǐ jam dä seen Sara'e iiŋə.”⁹Aneenda fəər é Məi Tel e bii'ĩnə: “Way taana dö seen iiŋ, u fiŋən kor iinin.¹⁰Â ədə jaalgeeg unugu e tàlg ləŋ e gàr ẽ birsəsə wa.¹¹Bare u gun jaa dö eelg, û bil jaa ná fuui. Û nəgin Isməil, de Məi Tel fiŋəssə uniig unugu.¹²Ê aa ar cool é leeleeg‑e: ê ŋəmən jaga kay, jaga kay ê ŋəməníigi di, ê biləsə məəliig èg awleegene kay.”¹³Ajir e nag Məi Tel ná korso èg deen‑e é saag: “Oon Tel ná Tursan‑en.” E kor taan e bee: “É yaya a tursu Məi Tel ná den aan‑e.”¹⁴Anaanda enna waa eeda tarsáné Waa ná Denoog Tursan‑e. Bur ləŋ bare, een é ceeg é wag ná bel Gaadic èg Barade.¹⁵Ajir e pool jaa ná fuui Abraman. Abram e nəgi Isməil.¹⁶Duug é Abram taǎn 86 é gara Ajir bildǐ ĩnə Isməil‑i.

Pioneer Bible Translators

https://app.library.bible/content/a230cccfbf4362be