Read Koreeg nà moog‑e 15

Koreeg nà moog‑e15

¹É gara jisig nee kuyjíigǐ‑i, Məi Tel e bee Abraman caalg‑iilg: “Ar u bədí uuŋ kojo wa, aan â paa'o, jisə əən ũnu madan əndəg.”²Abram e bee: “Seen Məi Tel, jee ɲiinə u gəfə̃nǐ â tir‑i war a bel jaalge? Jen ná â war kaaŋa əən‑i jen ná bel Aleyazar ná lee é wag ná bel Dimask.”³Abrama jo re e bee: “U gəwsə̃n jaa man wa, gəl dhəm əən ná a fəŋənsə teyag‑e eena â war kaaŋa əən‑i.”

⁴Məi Tel e bii'ĩnə: “Wa. Dhəm uun â war jeg unugu wa. Jaa ná â war jeg unug‑i â ladân duuŋ.”⁵Tel e bag Abrama dumuun tuu e bii'ĩnə: “Awro wag dumuun aweelg, ber pajogo, o garsâ ũ birsiig‑i. Məyəd unugu ê aa ana.”

⁶Abrama e guɲ kor é Məi Tela, Tel e bii'ĩnə: “U təll jerad.”⁷E bii'ĩnə jo di: “Aan Məi Tela ná wərǐ oon tuu é Ur é Kaldang‑e ã gəfũn aldan ni ũ bili oonde.”⁸Gəl Abram e bee: “Aya Məi Tel, â tur isi asam ná â belené‑e?”

⁹Məi Tel e bii'ĩnə: “Bəgə̃n too, miə ná ɲee, è əər ná fuui, nà bel duugu ozo, û bəgə̃n gəmur èg kuduuriig.”¹⁰Abram e wərí ĩnə jega nee kay e lədí iilgə garga dhaag e təlí ë muugu nà ləssǐ dum é mumul. Kulugu jo wildí iilgə wa‑e.¹¹Gaaleeg nà naam wag‑e e pàlla tad é jeg nà tirsǐ iiŋg, gəl Abram e guniigə tui.

¹²É gara tel ɲam ẽ wəldǐ‑i, Abram e gagê naage əndəg, wag e ad é dui ná taa kojo əndəg e kumur iiŋ tad.¹³Aneenda Məi Tel e bii'ĩnə: “Ɲela maŋ ná ü məyədə ê əzíigǐ wəngi é gaam iyəni wa‑e, ê əzíigǐ dhəmgi e jisá'éega jajam é duugu nà 400.¹⁴Gəl â mir kaŋ ná kəəmsiigə dhəmg‑i. Wag ê koyjé ê làdân ê bèl kaaŋa əndəg.¹⁵Oon, û ən duugu e talg cucu û tir ê durun èg dö məyəd‑i.¹⁶Jaalgeen nà ê adaga é duugu nà 400 ü məyədə ê mə̀rə̂n te, é kora əniid é Amuuriigə cəggsǐ wag kay wa‑e.”

¹⁷É gara tel wəldǐ wag əssǐ é dui‑i, dal é moon e dhuun moon e baa é jega nà lassána iilg‑i.¹⁸É naanda naadinə Məi Tel e tif meed èg Abrame, e bee: “Alda niin a gafân ö məyədən, û bəgə̂ní é ruud ná Məsir‑i ləŋ é deel maŋ Forata,¹⁹aldan é Giiniigə, è Gansiigi, è Gadamuniigi,²⁰è Issiigi, è Firissiigi, è Rafayiigi,²¹è Amuuriigi, è Kanaange, è Jerjaaciigi, èg Yabuusiigi.”

Pioneer Bible Translators

https://app.library.bible/content/a230cccfbf4362be