Leia Koreeg nà moog‑e 11

Koreeg nà moog‑e11

¹Addeeg‑oolo kor taǎn taman ná jaga kurəsə̌níigǐ‑i.²É gara jaga wəjjiigǐ dumuun é gara tel bəə̂n‑i e gə̀msəgə baw man é Cenaar o e àb tu.³E kùrəs egee: “Lizzú ã dawda tuub o tuidə iiŋ é moo.” Eg kuu é tuub ná kùwə̌níigǐ é miid‑i, eg waraga laad ẽ celda é wag é ɲenda.⁴Aneenda eg bee: “Lizzú ag kuu ä ŋəlgən gaam ãg adda tu, ag kuu wee ná jaar, eel ẽ caggda wag aweelg. Aneenda gar ã àdda səyəg. Ar agâ sawrá addeeg‑ool wa.”

⁵Gəl Məi Tel e pallaga tad ẽ turdu gaama èg wee ná jaar jogo kuwə̌níigǐ‑i.⁶Məi Tel e bee: “Jag neen é kora təzíigǐ kaŋ taman‑e kurə̂níigǐ kor taman‑e. Bare e ada jisigə aneen‑e, jeem ná ɲam ẽ jiddíigǐ‑i na raa dë muugu wa.⁷Lizzú ã pallda tad ã mərrə ëg kələzigə gar jaam ẽ fiŋə'í kor é golo wa.”⁸Aneenda Məi Tel e səwrəndiigə addeeg‑ool kay, e bìj ná kuwə̌níigə gaam‑e.⁹Enna tarsána gaam Babel‑e é kora ti Məi Tel mərsǐ jag ë kələzigə addeeg‑ool kay‑e. É wag naana e səwrəndiigə addeeg‑ool kay.

¹⁰Nee rimdə̂n məyəd é Saama. É gara maagga kuyjiigǐ duugu dhaag‑e Saam e bel duugu 100, e koo Arfakacaad.¹¹É gara Saam kussǐ Arfakacaad‑e Saam e aa duugu 500, e bel jaalgeen biig taan nà fuuig‑i èg nà ɲeeg.¹²É gara Arfakacaad əssǐ duugu 35, e koo Caala.¹³É gara kussǐ Caala‑ne Arfakacaad e ad duugu 403, e bel jaalgeen biig taan nà fuuig‑i èg nà ɲeeg.¹⁴É gara Caala əssǐ duugu 30, e koo Aaber.¹⁵É gara kussǐ Aaber‑e Caala assé duugu 403, e bel jaalgeen biig taan nà fuuig‑i èg nà ɲeeg.¹⁶É gara Aaber əssǐ duugu 34, e koo Faalig.¹⁷É gara kussǐ Faalig‑i e aa duugu 430, e bel jaalgeen biig taan nà fuuig‑i èg nà ɲeeg.¹⁸É gara Faalig əssǐ duugu 30, e koo Rawo.¹⁹É gara Faaligə kussǐ Rawon‑e e aa duugu 209, e bel jaalgeen biig taan nà fuuig‑i èg nà ɲeeg.²⁰É gara Rawo əssǐ duugu 32, e koo Səruj.²¹É gara kussǐ Səruj‑i Rawo e aa duugu 207, e bel jaalgeen biig taan nà fuuig‑i èg nà ɲeeg.²²É gara Səruju əssǐ duugu 30, e koo Nauur.²³É gara kussǐ Nauur‑i, Sərujə e aa duugu 200, e bel jaalgeen taan nà fuuig‑i èg nà ɲeeg.²⁴É gara Nauurə əssǐ duugu 29, e koo Tara.²⁵É gara kussǐ Tara‑ne, Nauur e aa duugu 119, e bel jaalgeen taan nà fuuig‑i èg nà ɲeeg²⁶É gara Tara əssǐ duugu 70, e bel Abram, Nauur èg Araan.

²⁷Nee rimdə̂n jaalgeen é Taran. Taran e koo Abram, Nauurə èg Araan. Araan e koo Lut.²⁸É mun ná faan Taran e bur e an taw‑e, Araan e tir é Ur é Kaldanga, é alda ná kossána een‑e.²⁹Abrama èg Nauuri eg waraga wag èg dhaage. Od é Abrama belǎn Sara'e. Na é Nauuru e bel Melka, een taǎn ɲaa é Araan‑e, baaw é Melka èg Yeskan‑e èg dhaage.³⁰Bare Sara'en taǎn jiwiri, kossé jaalgeen biig wa.³¹Taran e war jaa iini Abrama èg məyəni Lutu jaan é Araana èg məyəni Sara'e, od é jaa iini Abrama. Eg waj èg mumul tu é Ur é Kaldanga e wàj dumuun é Kanaan. É gara cəggsíigǐ wag é Araan‑e, eg ab tu.³²Tara assé duugu 205, e tir é Araan.

Pioneer Bible Translators

https://app.library.bible/content/a230cccfbf4362be