Nehemia13
Israel Batii Ɔblasa Di Bafɔɔ Suoto
1Di dii nwu nkpo, baaka Mose kukũ nwu osie kanya bata batii nwu lanu, ni baanya baakpana ninfa alɛ batanfũ Amoni otii ee Moab otii kuonwii baakpee di Yaa kasiisakɔ nwu kamɛ,2diekye batayɔ alesaa ku ntu balaakyakako Israel batii, kafɔɔ baata Bileam koto alɛ akpaani ma. (Kafɔɔ,Yaa loo lamunikĩisa lɛkpaani nwu aabla lɛtɔtrɔ.)3Obe wɔ di batii nwu lanu ni kufiofa ko mmle yi, baadiki batii ba bamuu niale ni bafɔɔ di Isarel batii kamɛ baase lete.Nehemia Lawako Kakyi
4Fiɛ baabla ni nle mmle yi, baayɔ oletatɛ Eliasib nwu baase di Yaa loo leyo asaa ntɛkɔ nwu kanya. Nnwɔɔ ku Tobia ntɛɛ lalɛ nwaa,5ni aayɔ leyo kplɛ ninwii di obe nwu baatɔɔtɛ ni asaaɔta atitabi ku olufui ku olekatakɔ awansaa, ku atitabi akyuu-fosile, nta fɔle ku nnɔnyi be bɛɛbla bɛɛta ni Lewi batii, sinu basantɛ ku n-yoko banyuntɛ, ku asaa ya mankũ manta ni olebatatɛ aatɔɔ nɛ.6Kafɔɔ di obe wɔ baatɔɔbla ni n-ya mmle nwu amuu yi, ntawɛ di Yerusalem, diekye di Babel ɔka Artasasta alɛɛ afosi-atiɛ lɛnyɔɔfa nɔɔ kamɛ lapɛlakple lasifi ɔkyɛ nɔɔ. Di obe owo sɛmaa lakaalɛ nwɔ osuku7lakple lasifi Yerusalem. Nfa latofo dikpilesaa le di Eliasib labla ni, aata ni Tobia leyo di Yaa leyo akpata nwu kamɛ nɛ.8Ɔblɔ lafiɛ mi osie kanya ni ladiki Tobia leyo kamɛ asaa amuu di leyo nwu lafuki layu nɛ.9Ni lata osuku nlɛ bakleklesa ayo nwu kamɛ, ninfɛ lakplesa Yaa leyo akpɛnsaa nwu lalaase, ku asaaɔta atitabi ku olufui nwu nɛ.10Lanu kafɔɔ nlɛ blɔɔyɔ nlekɔ be manta ni Lewi batii bata ma, nioso Lewi batii ku sinu basantɛ nwu nimbla ni kasumu ɔkpɛ ntookple beesifi afe lɛma.11Nioso lasĩ ɔlaa lata banɔɔfotii nwu ni lakaalɛ ma nlɛ, “Obe oso biediɛ Yaa leyo biɛtɛ nkpo?” Ninfɛ lalɛɛ Lewi batii ku sinu basantɛ nwu lasiisa, layɔ ma lase di mblakɔ lɛma nɛ.12Yuda batii bamuu layɔ atitabi akyuu fosile, nta fɔle ku nnɔnyi baawako di asaa ntɛkɔ nwu.13Ni layɔ oletatɛ Selemia, Sadok kũyetɛ nwu, ku Lewi otii onwii manlɛɛ ni Pedaia lase di asaa ntɛkɔ nwu kanya, ni labla Sakur obisuɔtɔbi Hanan, aale ni Matania obisuɔtɔbi, bakyakaakotɛ lɛma nɛ, diekye baanya alɛ basuɔtɔ ba mmle n-le onukwale. Mma baata alɛ batɔɔsɛ asaa batɔɔta babilɛma nɛ.14Oo Yaa nii, nyuma mi ta nle mmle oso, tan-yee kafɔɔ onukwale lɛsaa le labla lata ni Yaa nii leyo ku kasumu nini.15Di ayi nwu nkpo kamɛ lanya batii di Yuda latɔɔ-wa nta di Lɛnyɛɛtɛyi, baatɔɔwako atitabi, baatookpee atoo di babɔkɛɛ ba nintuka ni atoo suoto, diɛkyakaa ni di nta, awosobi, abue ku atoo ateate bamba amuu. Ni baatɔɔwako n-ya mmle amuu di Yerusalem di Lɛnyɛɛtɛyi suoto nɛ. Nioso lasĩ ɔlaa lata ma di asaa osunsũ di dii nwu suoto.16Batii ba niakye ni Tiro baasiɛ ni di Yerusalem latɔɔwako kɔkpaku ku asunsũsaa ateate amuu babatoosunsũ nya di Yerusalem di Lɛnyɛɛtɛyi suoto baatɔɔta Yuda batii.17Lasĩ ɔlaa lata Yuda banɔɔfotii-nɔɔfo nwu ni lakaalɛ ma nlɛ, “Obe ninle disiensiesaa le mmle biɔbla ni- minkpɔnɔfɔsa ni Lɛnyɛɛtɛyi nwu?18Bawa lee labla asaa ya mmle okle, nni oso di Yaa loo lata ɔlaa kpile wɔ mmle omuu lawa di suoto loo ku okpoo kplɛ wɔ mmle nɛ. Nfɛ biokpee ɔblɔ yakayaka minkyakaa di Israel batii suoto di Lɛnyɛɛtɛyi nwu ɔkpɔnɔfɔsa kamɛ.”19Lakpee kufiofa nlɛ nse kɔtɔɔfɔ kunyii lekpete di Yerusalem n-yoko fiɛ di Lɛnyɛɛtɛyi lewo yi, baasɛɛ akloo nwu, batansɛkɛtɛ kafɔɔ dilaase di obe wɔ di Lɛnyɛɛtɛyi nwu ntoofe ni. Layɔ ami omu batii nii lase di n-yoko nwu kanya di mmle manamafuo ni atoo kuanwii ɔwako ni di Lɛnyɛɛtɛyi nwu suoto.20Ninwii ee sɛnyɔ di asaa basunsũtɛ ku mba ninsunsũ ni asaa ateate amuu nte di Yerusalem okpoo sɛmaa.21Kafɔɔ lasĩ ɔlaa lata ma lakaalɛ nlɛ, “Obe oso di oyoyiɛ ɔlɔɔkɔ biete ku kakyɛ nwu? Nse biekple biabla nle mmle yi, kamamufũ ye.” Diayɔ ni di dii nwu diasifi nii, batasinwa di Lɛnyɛɛtɛyi suoto.22Ninfɛ latɔkɔ Lewi batii nwu nlɛ bakleklesa suoto lɛma baasifi balaanyu n-yoko nwu di mmle di Lɛnyɛɛtɛyi nwu kate ni klekle.Oo Yaa nii, nyuma mi di nle mmle kafɔɔ, faanyɛɛ nyaami di lɛbɔmbɔ kplɛ lɛfɔ kanya.23Diɛkyakaa ni yi, di obe nwu kamɛ lanya Yuda basuɔtɔ ba niayɔ ni basanko baakyeko ni Asdod, Amon ku Moab.24Babi lɛma ɔfã latoobuɛ Asdod sele ee batii bamba nwu onwii lɛma sele, batatofo mmle kafɔɔ baabuɛ ni Yuda sele.25Lasĩ ɔlaa lata ma, ni lakpaani ma nɛ. Lapɛ basuɔtɔ nwu bawo ni lasisifi sinwini lɛma nɛ. Lata ma baaka ntam di Yaa leyooto kamɛ labuɛ nlɛ: “Bitasin-yɔ babisankobi lee bita babisuɔtɔbi lɛma baayɔ, ee biayɔ babisankobi lɛma bita babisuɔtɔbi lee baayɔ ee biayɔ ma biata suoto lee.26Diele kɔyɔ fɛ n-ya mmle okle oso di Israel ɔka Solomon labla okpile? Ɔka kuonwii ditawɛ fɛ nnwɔɔ di nnle kpinwu kamɛ. Yaa nɔɔ labɔmbɔ nwɔ, ni di Yaa lase nwɔ sɛka di Israel omuu nɛ, kafɔɔ bia nnwɔɔ, bafɔɔ basanko niakpaa nwɔ baakpee di okpile kamɛ.27Dikaatɛ alɛ buanu nunua alɛ aye kafɔɔ biɔbla asiensie kpile ya mmle amuu, di onukwale ɔtanle ɔta Yaa loo ku bafɔɔ basanko ɔyɔ?”28Oletatɛ-nɔɔfo Eliasib obisuɔtɔbi Yoiada obisuɔtɔbi nɔɔ onwii niale Sanbalat, Horon otii nwu ɔlɔ nɛ. Ni latososɔɔ di ɔkyɛ nii nɛ.29Oo Yaa nii, nyuma ma, diekye baakpɔnɔfɔsa olebatatɛ ɔkpɛ kablakɔ ku olebatatɛ kanya ninii ku Lewi batii nwu.30Nioso lakleklesa olebatatɛ ku Lewi batii nwu di lɛsaa biala niale ni bafɔɔ lɛsaa, ni lata ma sɛkpɛ nɛ, obiala di kablakɔ nɔɔ.31Latɛ kafɔɔ mmle baakũ ni ntɔɔni di obe wɔ lata ni kanya, diata ni alesaa kasale kafɔɔ.
Oo Yaa nii, nyuma mi, faale mi sibualɛ.
The Seed Company