Nehemia12
Olebatatɛ Ku Lewi Batii Ayooto
1Mba mmle niale olebatatɛ ku Lewi batii ba niakye sɛlanle kamɛ baawa ni ku Sealtiel obisuɔtɔbi Serubabel ku Yesua nɛ: Seraia, Yeremia, Esra,2Amaria, Maluk, Hatus,3Sekania, Rehum, Meremot,4Ido, Ginetoi, Abiya,5Miamin, Moadia, Bilga,6Semaia, Yoarib, Yedaia,7Salu, Amok, Hilkia ku Yedaia.Mba mmle niale olebatatɛ nwu batunletɛ ku bakpɛmblatɛ wo lɛma di Yesua obe kamɛ nɛ.8Lewi batii nwu niale Yesua, Binui, Kadmiel, Serebia, Yuda ku Matania, nnwɔɔ manko bakpɛmblatɛ wo nɔɔ niayila di sɛfa ɔpɛ sinu kanya nɛ.9Bakbukia ku Uni, bakpɛmblatɛ wo lɛma n-yila mankyɔɔ ma anu di kasumu ɔkpɛ ɔbla kamɛ.10Yesua niale Yoakim ote, Yoakim niale Eliasib ote, Eliasib niale Yoiada ote,11Yoiada niale Yonatan ote, Yonatan kafɔɔ niale Yadua ote nɛ.12Di Yehoiakim obe kamɛ yi, mba mmle niale banɔɔfo di olebatatɛ ayo kamɛ nɛ: di Seraia leyo kamɛ, Meraia; di Yeremia leyo, Hanania;13di Esra leyo, Mesulam; di Amaria leyo, Yehohanan;14di Maluk leyo, Yonatan; di Sekania leyo, Yosef;15di Harim leyo, Adna; di Meremot leyo, Helkai;16di Ido leyo, Sakaria; di Gineton leyo, Mesulam;17di Abigya leyo, Sikri; di Miniamin ku Moadia leyo, Piltai;18di Bilga leyo, Samua; di Semaia leyo, Yehonatan;19di Yoarib leyo, Matenai; di Yedaia leyo, Usi;20di Salu leyo, Kalai; di Amok leyo, Eber;21di Hilkia leyo, Hasabia; di Yedaia leyo, Netanel.22Lewi batii ayo kamɛ banɔɔfo ayooto di Eliasib, Yoiada, Yohanan ku Yadua obe kamɛ, manko olebatatɛ ale baakpana di obe wɔ di Dario, Persia otii nwu latoole ni sɛka.23Baakpana ayo kamɛ banɔɔfo ba di Lewi banantii kamɛ ayooto dialaadu Eliasib obisuɔtɔbi Yohanan obe kamɛ baakpee di sekofolaa kukũ kamɛ.
Olekatakɔ Kamɛ Sɛkpɛ Ɔsɛ Ɔta Batii
24Lewi batii batunletɛ niale Hasabia, Serebia ku Kadmiel obisuɔtɔbi Yesua, ku bakpɛmblatɛ wo lɛma, mma nin-yila mankyɔɔ ma anu mantɔɔta katansa ku sɛfa ɔpɛ, kakyɛ̀ kanwii ntuna kanta kakyɛ nyɔɔfa, fɛ mmle di Dawid Yaa otii nwu latuo alɛ batɔɔbla ni kanya.25Matania, Bakbukia, Obadia, Mesulam, Talmon ku Akub niale n-yoko banyuntɛ baatoonyu ni asaa ntɛkɔ n-yoko nɛ.26Baabla ɔkpɛ di Yesua obisuɔtɔbi Yehoiakim, aale ni Yosadak obisuɔtɔbi obe kamɛ, ku Nehemia abaa kanyayilatɛ nwu ku Esra, oletatɛ ku kũyetɛ nwu obe kamɛ.Nehemia Ladiki Okpoo Kplɛ Nwu Oyoyiɛ Kayi
27Di Yerusalem oyoyiɛ nwu kayi-odiki kamɛ yi, baadiki Lewi batii nwu baakyeko nfũ baasiɛ ni baakpaa ma baawako Yerusalem alɛ babale kayi-odiki dii nwu di suoto lɛyɔɔ ku sɛfa ɔpɛ sinu ku abi, bakyitaa ku basanku ba sɛlɔ nikodie ni sinu nɛ.28Baasiisa kafɔɔ sinu basantɛ baakyeko nsɔ be niamana Yerusalem siakyi nii- baakyeko ma Netofa batii sekpooenyii,29baakyeko ma Bet Gilgal ku Geba obo nwu ku Asmawet, diekye sinu basantɛ nwu labudi sekpooenyii baakyisa Yerusalem baata suoto lɛma.30Obe wɔ di olebatatɛ ku Lewi batii nwu lakleklesa suoto lɛma baaloo ni baabla ni klekle di ɔsaabla kanyi yi, ni baakleklesa batii nwu, n-yoko ku oyoyiɛ nwu nɛ.31Lata Yuda batii batunletɛ lakata baakyɛ di oyoyiɛ nwu osi. Lata kafɔɔ sinu basantɛ akudi kplɛ anyɔ nlɛ bapɛ sɛfa. Dikudi ninwii lakyɛ di oyoyiɛ nwu osi di oletanɛɛkyɛ, diofe ni Lefleku Kayoko lɛkyɛ.32Hosaia ku Yuda batii batunletɛ kakyɛ̀ kanwii latikanko ma,33diakyakaa di Asaria, Esra, Mesulam,34Yuda, Benyamin, Semaia, Yeremia,35ku olebatatɛ bawo ba niatɔɔfɛ ni akyukyoo, ku Yonatan obisuɔtɔbi Sakaria, aale ni Semaia obisuɔtɔbi, aale ni Matania obisuɔtɔbi, aale ni Mikaia obisuɔtɔbi, aale ni Sakur obisuɔtɔbi, nnwɔɔ kafɔɔ aale ni Asaf obisuɔtɔbi,36ku bakpɛmblatɛ wo nɔɔ- Semaia, Asarel, Milalai, Gilalai, Maai, Netanel, Yuda ku Hanani- ku sinu asansaa fɛ mmle di Dawid Yaa otii nwu latuo ni kanya. Esra kũyetɛ nwu nialeko dikudi nwu katũ.37Baakyɛ sitũ baakyɛ di Ntu Kataakɔ Kayoko nwu tinini baakata Dawid Okpoo kplɛ nkatakɔ baasifi oyoyiɛ nwu osi, ni baafe baawaalɛ Dawid leyo baalaadu Ntu Kayoko nwu di kufĩ katunkɔ nɛ.38Sinu basantɛ dikudi nyɔɔfa lakyɛ di ɔmɛntukyɛ lɛkyɛ. Latikanko ma di oyoyiɛ nwu osi, diakyakaa di batii nwu ɔfã nyɔɔfa- buafe di Leyo Takale Leblobloyo nwu bualaadu Oyoyiɛ Blɛfɛɛ nwu suoto,39buafe di Efraim Kayoko, Yesana Kayoko, Kakpaku Kayoko, Hananel Leyo Takale ku Kɔlafa Leyo Takale nwu, bualaadu bia Bafoso Kayoko. Ni baalaayila di Banyuntɛ Kayoko nɛ.40Sinu basantɛ nwu niatɔɔpɛ ni sɛfa akyuu lɛma anyɔ nwu lalayila di nyilakɔ lɛma di Yaa leyo kamɛ; nkpo di ami kafɔɔ nɛ, diakyakaa ni di banɔɔfotii nwu ɔfã nɛ,41diakyakaa ni di olebatatɛ nwu- Eliakim, Maaseia, Miniamin, Mikaia, Elioenai, Sakaria ku Hanania baaklee ni akyukyoo lɛma-42ku Maaseia, Semaia, Eleasar, Usi, Yehohanan, Malkiya, Elam ku Eser kafɔɔ nɛ. Sinu basantɛ nwu lasa sinu di Yisrahia ninyu kalɔ.43Ni baata seleɔta kplɛ di dii nwu kale, baatɔɔpɔ̀ diekye Yaa lata ma suoto lɛyɔɔ kplɛ. Basanko ku babisɔ kafɔɔ lapɔ̀. Baatoonu suoto lɛyɔɔ kudu nwu di Yerusalem di kakyonkɔ fanfa.Asaa Okũ Diɛta Ni Kasumu Ɔkpɛ Di Olekatakɔ
44Di obe nwu kamɛ, baadiki basuɔtɔ alɛ bayila kaanya bata asaa ntɛkɔ nwu asaa okũ suoto, alesaa kasale ku akyuu-fosile ofũ. Aakye ni afe ya niɛmana ni sekpoo nwu siekyi ni kawako ni di asaa ntɛkɔ di nlekɔ be ninkaatɛ ni di Kufiofa kanya manta ni olebatatɛ ku Lewi batii. Diekye olebatatɛ ku Lewi batii ba niatɔɔbla ni ɔkpɛ labuo Yuda batii anu.45Baabla Yaa lɛma ɔkpɛ ku okleklesa ɔsaabla nwu, fɛ mmle di sinu basantɛ ku n-yoko banyuntɛ labla nii, di mmle di Dawid ku obisuɔtɔbi nɔɔ Solomon labuɛ baatɛ ni kanya.46Diekye saa yi, di Dawid ku Asaf obe kamɛ, baawɛ kanyabayilatɛ baata sinu basantɛ ku katansa sinu ku sɛfa ɔpɛ kafɔɔ baata Yaa.47Nioso di Serubabel ku Nehemia obe kamɛ yi, Israel batii bamuu lakũ dii biala nlekɔ asaa baata sinu basantɛ ku n-yoko banyuntɛ. Mma kafɔɔ mandiki kalekɔ mantɛ lete manta Lewi batii, Lewi batii kafɔɔ ndiki kalekɔ manta Aron banantii.The Seed Company