ESTER1
Baatakatɛ Ɔkasanko Wasti Di Lɛkakpomii Suoto
1Nnya nle niawa ni di Akasweros obe kamɛ. Akasweros nwu lale sɛka di nsɔ kɔlafa afosi-anyɔ-nkuɛnsĩ suoto, diayɔ ni di India dialaadu ni Kus: 2Di obe nwu kamɛ Ɔka Akasweros latoole sɛka di lɛkakpomii nɔɔ suoto di Susa katanikokɔ kamɛ,3ni di lɛlɛɛ tiɛfa di sɛka nɔɔ ole kamɛ, aatũ opunu aata batii finle nɔɔ bamuu ku banɔɔfotii nɛ. Persia Bakpɛtɛ batunletɛ ku Media, ɔka babi ku batii finle di nsɔ nwu suoto lawɛ ninfa.4Di ayi kɔlafa afosi-anɛ amu kamɛ aadiki sɛka kalekɔ nɔɔ lɛsaawɛ kplɛ kayi ku sɛlɛ ninya ku sɛka ole nɔɔ lɛkpa aatuo.5Obe wɔ di ayi ya mmle laloo nii, ɔka latũ opunu ayi akuɛnsĩ di lɛkayo nwu kɔba kamɛ aata batii bamuu, diayɔ ni di obisɔ dialaadu ni ɔnɔɔfo, mba niawɛ ni di Susa katanikokɔ nwu kamɛ.6Di kɔba nwu kamɛ baasaka abula fɛnɛnɛɛ fututu ku bluu ale, baaninii ku sikũ fututu ku nse niabla ni fɛ ɔsɛɛ baakakaasa di koto fututu nkɔnii di afuɔwɛkyɛ akpaka suoto. Baase koto sɛɛle ku koto fututu akpomii yɔɔle di kaflɔnkɔ ka baabla ni ku lɛsaa le bɔɔlɛɛ ni porfri, afuɔwɛkyɛ, alɔdi apoo ku afuɔ bamba ya niefũ ni kɔya.7Baatɔɔsɛ nta di koto sɛɛle sipũ kamɛ, obiala lakyi lete di owo ninwu, sɛka nwu nta kafɔɔ lapɔ, di mmle kanya di ɔka kadiki dibu antuo nii.8Di ɔka kanya didiki kanya yi, baata otii biala osuku alɛ anyi di mmle kanya oomiɛ nii. Diekye ɔka latɔkɔ nta basɛtɛ alɛ bata otii biala mbe oomiɛ nii.9Ɔkasanko Wasti kafɔɔ latũ opunu aata basanko ba niawɛ ni di Ɔka Akasweros lɛkayo kamɛ.10Di dii kuɛsinle suoto, di obe wɔ di Ɔka Akasweros nfɛ kosiɛ ni nta osie kanya yi, ni aadiki basuɔtɔ ba ataa baadiki ni bakuɛnsĩ ba nikonyu nwɔ nii- Mehuman, Bista, Harbona, Bigta, Abagta, Setar ku Karkas-11alɛ balaakpaa Ɔkasanko Wasti bawako nwɔ, di ɔsanko nwu atũkũ lɛkakoto nɔɔ, di mmle kanya aadiki ni sɛlɛ nɔɔ antuo ni batii nwu ku banɔɔfotii nwu, diekye aalɛ sekpeele baanyu nwɔ nii.12Kafɔɔ obe wɔ di bakpɛmblatɛ nwu lalaabuɛ ni ɔka kanya yi, Ɔkasanko Wasti lasĩ ɔkyɛ. Ninfɛ di ɔblɔ lafiɛ ɔka, aanya ɔblɔ osie kanya nɛ.13Di ɔsaabla kuale kuata ni ɔka alɛ aawolaa ni kamɛ di mba nin-ye ni kufiofa ku aka sɛlaa kamɛ nwaa oso yi, ni aakakatɛko banumbentɛ ba nianu ni obe nwu kamɛ ɔsaabla kasɔ nɛ,14mma kafɔɔ niakaako ɔka kpinkpĩ nɛ- Karsena, Setar, Admata, Tarsis, Meres, Marsena ku Memukan, Persia ku Media batii finle bakuɛnsĩ nwu niawɛ osuku nwaa di ɔka suoto, baale ni kafɔɔ banɔɔfo bamu di sɛka kalekɔ nwu nɛ.15Ni di Ɔka lakaalɛ alɛ, “Di kufiofa kanya, be dikaatɛ mambla Ɔkasanko Wasti? Ɔsanko nwu dienu Ɔka Akasweros kanya ka di mba ataa beediki ni lalaatɔkɔ nwɔ nii.”16Ninfɛ di Memukan ladiki kanya di ɔka ku batii finle nwu anu alɛ, “Ɔkasanko Wasti lɛbla okpile, diele di ɔka lete suoto, kafɔɔ ku banɔɔfotii ku batii nwu bamuu di Ɔka Akasweros kasɔ kamuu suoto.17Diekye ɔkasanko nwu kɔkpaa didiki kamabla ɔlaa kunte di basanko bamuu kamɛ, nioso babatoonyu basa lɛma nyakatãa mambuɛ alɛ, ‘Ɔka Akasweros ladiki kanya alɛ bakpaa Ɔkasanko Wasti bawako di anu nɔɔ, kafɔɔ atakyɛ.’18Miɛ dii le mmle Persia batii ku Media batii basanko banɔɔfotii ba nienu ni ɔkasanko kɔkpaa didikibi le mmle kamabla nkpo manta ɔka banɔɔfo bamuu. Ni lɛsaatambu ku nlɔ dilɔbaloo diidii.19“Nioso, nse dilɛ diɛta ɔka, ni akpee ɔka kufiofa, aata bakpana kukũ di Persia ku Media afiofa kamɛ, mmle manamafuo kũ ni ɔkyɛlɛnsa, alɛ Wasti dilɔbasinkple awa ni Ɔka Akasweros anu diidii. Ɔka kafɔɔ ayɔ sɛka nɔɔ kayilakɔ ata otii bamba wɔ ninlɛ aalenke nwɔ ni.20Ni nse beeyie ɔka kufiofa nwu lɛkya beefenko di kasɔ kplɛ nɔɔ kamuu suoto yi, ni basanko nwu bamuu, obisɔ ee ɔnɔɔfo kamabu basa lɛma.”21Suoto layɔɔ ɔka ku banɔɔfotii ku ɔlaa wɔ mmle, nioso ɔka labla fɛ mmle di Memukan labuɛ nii.22Ni di ɔka lakyesee akũ di sɛka kalekɔ aba amuu di kasɔ biala suoto di kɔkpana lɛma kumu ku batii biala di sele nɔɔ simu, aabuɛ di otii biala ɔkplalomii omu kamɛ alɛ osuɔtɔ biala ale kanyayilatɛ di leyo nɔɔ nimu batii suoto nɛ.The Seed Company