YOB29
Yob Lɛkakatɛ Yɛntɛle
1Yob lakple aayɔ ɔlaa nɔɔ aatɛ alɛ:2“Nse alɛ nwɛ awɛntɛ ya nintɔɔbafe ni okle,fɛ ayi ya di Yaa lanyu mi nii,3obe wɔ di kandiɛ nɔɔ lakpa aakpete ni di disi nii,di lɛkpa nɔɔ kafɔɔ lakyɛ ni di ditunu kamɛ!4Oo, di obe wɔ siawɛ mi ni osie,di Yaa sisiɛwo kpinkpĩ lata ni leyo nii lɛtɔtrɔ,5di obe wɔ di Nnwɔ Ninlenke ni lakple aasiɛkoe nii,di babi nii lamana mi baakyi nii,6di obe wɔ di nfenkɔ nii layii ni ku nnyɛɛtu pinle,ni di difuɔnkpaa nwu lanyɛɛnɛ nnɔnyi fɛ sekle diatɛɛ nɛ.7“Nse ledie lɛkyɛ okpoo kplɛ lɛkpaka,lɛlaasiɛ di lekpomii nii di bawo kalɛɛkɔ yi,8bakosopo nwu nnyɛɛ, mankpukuti manyila di ɔlɔɔkɔbanɔɔfo kafɔɔ ntaka man-yila di nkpaa lɛma;9ɔka batii ndiɛ ɔkakatɛ,man-yɔ nnɛɛ lɛma mantĩi nnya lɛma;10batii finle sɛlɔ nlo kanana,sɛkplalomii lɛma kafɔɔ n-ka di nnya takatoo lɛma.11Olele nienu ɔlaa wɔ lebuɛ ni nkakatɛ nwaa di suoto nii,mba kafɔɔ ninnyɛɛ nii ntansɛɛ,12diekye ndiki bapiitɛ ba ninkaalɛ ni lɛkyakaako,ku kuɛbi wɔ ninaa ni kuonwii abakyakaako nwɔ nii.13Otii wɔ niatookpi ni latɛɛ lɛtɔtrɔ;lata kpisɔfɔ otu lasa sinu.14Lekpee ɔsaabla tinini fɛ akpeele nii;lɛka biene niale akpeele wua nii ku disi niniisaa nii.15Lale anu lata anubabiɛtɛ,nkpaa kafɔɔ lata mba di nkpaa lakpiɛkpiɛ ni.16Lale kote lata mba diefĩ nii;lamufũ ɔfɔɔ ɔlaa labuɛ latɔɔ.17Lafefee batii kpile nwu annyɛɛ,laklee mba baamufũ ni ladiki di annyɛɛ lɛma.18“Lanyu nlɛ, ‘Kamakpi di leyo nii nimu,ayi nii mpɔ fɛ ɔtɛnsia.19Sidu nii kamadu ntu,kakyɛ kamuu oblokyi kafɔɔ nitika di sɛla nii suoto.20Dibu nii kamate lɛfɔle di kamɛ nii,kɔtaa kamale kɔfɔle di kɔnɛɛ nii obe lele.’21“Batii nkyɔɔ mi atoko mantoonyu osuku,manlo kanana mansoko kɔkà nii.22Nse lɛkakatɛ leloo, mansinkakatɛ;sɛlaa nii mbuo di atoko lɛma buɛɛ.23Man-nyu mi osuku fɛ mmle mansoko ni kanto,mambɛ nnya manfũ sɛlaa nii fɛ kabiene kanto.24Nse lemumuna sɛma lɛta ma yi, ninwɛ osie fiɛ manfũ mannu;anu nii lɛkpa nwu lafũ kɔya aata ma.25Ami nimmiɛ osuku nta ma, nsiɛ fɛ tunletɛ lɛma;lasiɛ di bakpɛtɛ nɔɔ kamɛ fɛ ɔka;late fɛle otii wɔ ninkpee ni kaku bawitɛ kɔnɛɛ kaafutu.The Seed Company