YOB27
Yob Lakple Aadiki Kanya
1Yob lakple aakakatɛ alɛ:2“Nwaako di Yaa nkpe ni nkpa, nnwɔ niesĩ mi ni lɛbɛ ɔta,Nnwɔ Ninlenke ni, niɛta diobuo ni ɔklà nii osie kanya,3fɛ mmle lɛnya nkpe ni nkpa di kamɛ nii,Yaa owiidi nwu di anwunfie nii kamɛ yi,4anyasibi nii dilɔbabuɛ akpilesaa,ɔkplalomii nii kafɔɔ dilɔbakakata kakyɔnkyɔ sɛlaa.5Namafũ nkpee diidii nlɛ oleye nkpe;namasĩ nle ninle mi ni kayilakɔ, diɛlaase di obe wɔ lekpi nii.6Kamaklee ɔsaabla tinini nii nwu, namadiɛ nwu kafɔɔ diidii;otu nii dilɔbalo mi lɛpɔɔ, di obe wɔ lɛnya nkpe ni nkpa.7“Ta balo nii bate fɛle batii kpile okle,bakyiditɛ nii kafɔɔ fɛle mba ninambla ni asaa di osuku kanya!8Diekye ɔmɛnsuku onyu ninkpe mba ninan-ye ni Yaa nse beebudi nwɔ beeyu,nse Yaa lediki ninwuna nɔɔ?9Yaa nnu nwɔ lɛfaa,nse nimiina lawa di suoto nɔɔ?10Abawɛ suoto lɛyɔɔ di Nnwɔ Ninlenke ni kamɛ?Abalɛɛ Yaa di obe biala kamɛ?11“Kamatuo ye Yaa osie nwu;namayɔ Nnwɔ Ninlenke ni sisuku nkookaa ye.12Bamuu lee bitɔɔnya nle mmle aye bamu.Obe oso nfɛ di lɛkakatɛ le mmle ninaa ni kasɔ?Sofa Lakple Aadiki Kanya
13“Nnya nle di Yaa lɛta ɛɛta ni batii kpile,atesaa ya di amumublatɛ nfũ ankyeko ni Nnwɔ Ninlenke ni ɔkyɛ:14Akpakpa di babi nɔɔ mpɔ yi, ole ma ninle kapamii nɛ;banantii nɔɔ dilɔbawɛ alesaa kpinwu bale diidii.15Ɔfiɛ kpile nimapɛ mba niebu basi nwɔ ni nkpa, mankpi,bakpisɔfɔ lɛma dilɔbawi bata ma.16Nu eesiisa koto fututu fɛle kudù,eetitika abula baawo kafɔɔ fɛle kɔtɛ yi,17asaa ya ɛɛtɛ nii, batininitɛ nimaklee nya,mba kamɛ kafɔɔ niɛkpa ni kamasɛ koto fututu nɔɔ.18Leyo le eetofo ni nte fɛle lɛkɔkɔtĩ,dite ni fɛle lɛkpaayo le di asaa banyuntɛ lɛpɛ nii.19Lɛlɛ kanya ante, kafɔɔ ɔlɔbasimbla nkpo;nse eetikiti anu nɔɔ, amuu ntoosifi.20Lɛyɛkɛ nfua nimpɛ nwɔ fɛle ntu be nieyii nii;kakitikɔ kafɔɔ nfɛ nwɔ ku kakyɛ ansifiko.21Kufĩ katunkɔ kɔfɛɛfɔ ntuka nwɔ, ni ansifi nɛ;anfiɛ nwɔ andiki di kasiɛkɔ nɔɔ.22Kuntaka nwɔ di suoto di nyaami ɔnya nnaa nii,di mmle ootoso ni di osie nɔɔ kamɛ anfe ni sitũ tinini.23Kɔfɛɛfɔ nwɔ mpɛ anɛɛkya di lɛsaatambu kanya,kuntɔɔ nwɔ kundieko di kasiɛkɔ nɔɔ.The Seed Company