YOB14
Yob Lapɛ Ɔlaa Aata Yaa
1“Otii di ɔsanko lelofo nii yi,ayi asɛɛ ale nwɔ, eeyiipɔ kafɔɔ ku dibuo.2Antaka katoo fɛle atoto, ni an-yɔɔ, anwaalɛ anfe nɛ;fɛle kunyii ninwaalɛ kunfe nii, ansinwɛ.3Fabadiki anu lɛfɔ fantika di otii wɔ mmle okle suoto?Fabakpaa nwɔ fanwako anu lɛfɔ famakanko?4Owe nimafuo lɛsaa le niɛkpa ni odiki okyeko nle ninankpa ni kamɛ?Kuonwii nnaa!5Bɛɛtɛ otii kayi osiɛ ayi bɛɛtɛ;feebuɛ awɛntɛ nɔɔ lɛpɔ fɛɛtɛ,fɛɛtɛ kafɔɔ obe alɛ ɔlɔbafuo nwɔ ɔwaalɛ.6Nioso kyisa anu, faatɔɔ awɛ onwu anwuna,dilaase di obe wɔ abanya ni suoto lɛyɔɔ fɛle kpɛntɛ wɔ nieloo ni ɔkpɛ nɔɔ ɔbla.7“Akpakpa, osuku onyu nkpe kuta kowoso:Nse beebudi kũ bɛɛtɛ kaasɔ, kunkple kuntaa,kundie anu fɔle.8Sidu ninkũ mbe kaasɔ,leke kafɔɔ nkpi di kɔtɛ kamɛ,9kafɔɔ ntu kɛɛkɛɛ kamata ni nintaanindie sɛla fɛle kowoso fɔle.10Kafɔɔ otii nkpi manaatɛ nwɔ kaasɔ;an-nwuna ninwuna lɛyɛntɛle, nse asinnaa.11Fɛ mmle di ntu mmɛ ni di lekpo,ee okle kasɔ nsɔɔ kankoso ni yi,12nkpo di otii nklɛ ante anaasintaka nɛ;ninaase di obe wɔ di osi nsinnaa nii, batii dilɔbasɛnkɛee basɛnkɛsa ma di sɛkyɔsĩ lɛma kamɛ.13“Nse fɛ faawofasa mi di ɔkya kamɛ,fantitĩi mi ninaase di obe wɔ di ɔblɔ lɛfɔ lɛyɔɔ nii!Fantɛ mi kafɔɔ obealɛ faanyuma mi!14Nse otii lekpi, ankple ansiɛ nkpa?Di ayi nii amuu ɔkpɛ siene ɔbla kamɛ yi,kamasoko otii wɔ nimawa amakyɛlɛnsa mi nii.15Fabalɛɛ, kamatuna nta fɔ kafɔɔ;fabawolaa lɛsaa le di nnɛɛ lɛfɔ lɛbla nii.16Nwaako, ni fabaka akpaakyala nii,kafɔɔ flɔbasintɛ sikpile nii nsũ.17Babasɛɛ sɛlaa kpile nii mankpee di kotofo kamɛ;fabatĩi sikpile nii.18“Kafɔɔ fɛ mmle di kobokote n-yɛɛ, kunwisi nii,fɛ mmle kafɔɔ di difuɔnkpaa nkpa ni di kasiɛkɔ nini,19fɛ mmle di ntu afuɔ n-yɛɛ niidi atukɛ kafɔɔ nta kɔtɛ n-yɛɛ ni yi,nkpo fɛɛwɔɔsa otii osuku onyu nɛ.20Fanlenkee nwɔ obe lele, ankpi ansifi;fanta anu nɔɔ nkyi letembi, ni fantɔɔ ansifi nɛ.21Nse bɛɛta babi nɔɔ dibu yi, ɔlɔbatofo;nse beekpee ma sinunsɔ kafɔɔ, ɔlɔbanya.22Nnwɔɔ omu nɔɔ suoto sina lete dibuo annu,anwi kafɔɔ anta suoto nɔɔ lete.”The Seed Company