YOB13
Yob Lakple Aatoodiki Kanya
1“Anu nii ntɔɔnya n-ya mmle amuu,atoko nii ntoonu, eenu nya kasɔ kafɔɔ.2Nle biye ni, ami kafɔɔ n-ye;diele obisɔ nle nta ye.3Kafɔɔ komiɛ nlɛ nkakatɛko Nnwɔ Ninlenke niininnanfiko Yaa ɔlaa nii.4Kafɔɔ aye, biɛyɔ sɛlaa ku afunu bietika mi di suoto;bamuu lee balaatɛ afa bablatɛ bile!5Nse fɛle bitabasi minlo kanana!Aye bitababe anu.6Binu ɔlaa nii nfɛ;binu anyasibi nii ɔlaa.7Bibakakatɛ di Yaa disi amumu kanya?Lɛkyɔnkyɔ kanya bibakakatɛ di disi nɔɔ?8Biomiɛ bilɛ bitunako nwɔ?Biɔnanfi ɔlaa minta Yaa?9Dibalɛ, nse ɛɛsɔ ye eenyu?Bibafuo nwɔ ɔkyɔnkyɔ fɛ mmle biakyɔnkyɔ ni batii?10Nwaako abasĩ ɔlaa anta yense bietuna di lewofa kamɛ.11Lɛklɛɛ nɔɔ dilɔbayɛkɛsa ye?Ɔyɛkɛ di suoto nɔɔ dilɔbakpee ye difu?12Sɛnɔɔfolaa lee nwu nle ntɔ̀ akpa;suoto lee ɔkpɛ-ofũ nle kɔtɛ.13“Bilo kanana biɛtɛɛ nkakatɛ;biɛta nle nimawa ni di suoto nii diwa.14Obe oso kayɔ suoto nii nkpee di ɔlaaalɛ kayɔ nkpa nii nklee ninnɛɛ nii?15Kuntɛ eelo mi, kamatika nwɔ disi kafɔɔ;nwaako, kamakpɛ nnaadu anu nɔɔ.16Nwaa, nle mmle kamale didiki nii,diekye otii wɔ ninan-ye ni Yaa dilɔbawa anu nɔɔ!17Bilolaa sɛlaa nii binu nwaa;bita atoko lee anu nnwɔ kobuɛ ni.18Nunua ntoololaa ɔlaa nii,n-ye nlɛ kamale lɛbɛ.19Otii owo kafuo ɔlaa ɔyɔ di suoto nii?Nse nkpo kute, ni kamalo kanana ninkpi.20“Oo Yaa, tɛɛ asaa anyɔ ya mmle osuku,ni namawofa fɔ:21Kplesa kɔnɛɛ lɛfɔ kuɔkyɛ lookyo di suoto nii,faadiɛ mi difu okpee ku lɛyɛkɛ lɛfɔ nwu.22Ni lɛɛ mi, kamatuna,ee faatɛɛ nkakatɛ, di afɔ faatuna.23Ɔtanlolaa ɔbla ku sikpile nii, sɛsɛ ntɔɔbla?Tuo mi dikpilesaa nii ku okpile nii.24Obe oso feewofasa anu lɛfɔfoonyu mi falɛ lo lɛfɔ?25Fabayɛkɛsa lɛfata le di kɔfɛɛfɔ kɔfɛ ni?Fabatikanko sɛsɔ kosole?26Kafɔɔ fɛɛkpana asaa kpile di suoto nii fɛɛtɛ,ni fɛɛta diobuo mi ku sekosopo nii kamɛ sikpile nɛ.27Feekpee sɛkpɛnkyɛ di nkpaa nii;fɛɛtɛ anu foonyu nkpaa susuku nii simuu,fɔɔtɛ nnafunkpaa nii nsũ.28“Nioso otii n-sɔɔ fɛle lɛsaa buule,fɛle dibula le di bakunsũ lɛya nii.The Seed Company