YESAYA30
Yuda Batii Kanya Ninii Ku Egipte Ditafũ Kɔya
1SAATE nwu lebuɛ alɛ,“Biyɔɔsa babi batokopĩtɛ,mba nimbla ni asibu ya ninanle mi ni ale,bionii kanya, kafɔɔ ninankye ni Ninwuna nii kamɛ,biotika okpile di okpile suoto;2biesoo minkyɛ ni Egipteminantɛɛ ni letofo;bilɛ biɔlaamiɛ ni lɛkyakaako di Farao kanyu kalɔ,di Egipte kunyii kalɔ diɛta ni katanikokɔ.3Kafɔɔ Farao kanyu kalɔ male ye sinunsɔ,Egipte kunyii kalɔ matɛ ye sɛmɛntu.4Kuntɛ banɔɔfotii nkpe ma di Soandi batɔkyɛntɛ lɛma kafɔɔ ntoobuo Hanes yi,5babakpee obiala lɛma sinunsɔdiekye di batii nwu ninfũ ni kɔya bata ma ni oso,batata ma ni lɛkyakaako ee badie ni kɔya bata ma nii,kafɔɔ sinunsɔ ku sɛmɛntu ɔtɛ baafũ nii.”6Ɔlaa di babɔkɛɛ ba ninkpe ni di Nkpaalɔ kasɔ:Diefe ni di dibuo ku nimiina kasɔ suoto,di bakyata-suɔtɔ ku bakyata-sankodi akotia ku asaanwu ya ninflɛlɛtɛ ni nkpe nii,nfa di banɔɔfotii n-yɔ lɛsaawɛ lɛma mantika di babɔkɛɛ ba nintuka ni atoo mmaa,asaa finle lɛma di kapu bapɔnkɔ mmaa,mankyɛnko kale nwu ninanfũ ni kɔya,7Egipte wɔ di lɛkyakaako nɔɔ diele ni lɛsalɛsaa.Nkpo oso nlɛɛ nwɔ nlɛkɔsaanwu yɛkɛle kplɛ ko ninanfuo ni lɛsalɛsaa ɔbla.8Tɔɔkyɛ nfɛ, faalaakpana nwu di lɛkpanafuɔ suoto fata ma,tɛ nwu nsũ di kukũ kamɛ,fata ayi ya nikɔwa nidibale kamaa diyilasaa le ninaa ni kaloo.9Batii ba mmle nle batokopĩtɛ, kakyɔnkyɔ babi,babi ba ninootuna alɛ banu ni SAATE nwu asaa otuo.10Bɔɔtɔkɔ asaa banyatɛ alɛ,“Bitansinya odiki otuo!”Bɔɔtɔkɔ kafɔɔ Yaa ɔlaa babuɛtɛtɛ alɛ,“Bitasintɔkɔ wo odiki otuo wɔ ninte ni nkpo!Bitɔkɔ wo sɛnya mɛnɛfɛlaa,sɛlaa ku afunu sɛlaa obuɛ ɔtɛ.11Bidie di osuku wɔ mmle,bikpukuti di kafenkɔ ka mmle,biediɛ wo kafɔɔ kubuɛ okpeeku Israel Klekletɛ nwu!”12Nkpo oso, nnya ɔlaa wɔ di Israel Klekletɛ nwu kobuɛ n alɛ:“Ta biesĩ ni ɔlaa wɔ mmle oso,bietika ni onyinka disibietika ni kakyɔnkyɔ anu,13okpile wɔ mmle kamakple yefɛle oyoyie takale wɔ niɛbɛ ni kɔka kuɔkyɔɔ ni dikyĩalɛ kuobiɛ ni nkyenkye, di difua kamɛ.14Kubabibiɛ kɔkyɛɛkɔkyɛɛ fɛle dibukii,kubapupuu di nyaami ɔnya kuonwii dilɔbawɛ niialɛ di kɔkyɛɛ nwu kamɛ, blɔbawɛ kukanwiibaayɔ mandiki ni atɔkɔnii di akyikye kamɛee baayɔ mandu ni ntu di dibiɔ kamɛ.”15Nnya ɔlaa wɔ di Saate Kplɛ nwu, Israel Klekletɛ nwu kobuɛ ni alɛ:“Di dikyi ku onyɛɛ ɔtɛ ninle ye ni didiki,osiɛ kloklo ku anu otika di suoto nii ninle ye ni osiekafɔɔ bienu kuninwii.16Biabuɛ bilɛ, ‘Kpaoo, bubasiɛ di bapɔnkɔ suoto muntoso.’Nkpo oso bibatoso!Biabuɛ bilɛ, ‘Bubasiɛ di bapɔnkɔ ba ninkpe ni sɛwa suoto munsifi.’Nkpo oso batikankotɛ lee kamapɛsɛwa!17Kakpe kamatosodi otii onwii lɛyɛkɛ okpee kamɛ;di batii banɔɔ lɛyɛkɛ okpee kamɛbamuu lee bibatoso minsifi,ninaase di obe wɔ biebu nifɛle flankaa owoso di kobokote osi,fɛle flankaa di lekpenkpe suoto.”Yaa Kamawii Batii Nɔɔ Lɛyɔɔ
18Kafɔɔ SAATE nwu komiɛ alɛ ale ye sibualɛ;ni aatɔɔtaka alɛ ɔɔnya ye nyaami nɛ.Diekye Saate nwu ninle Yaa wɔ nimbla ni asaa tinini.Suoto siyɔɔ batii ba bamuu ninsoko nwɔ ni!19Oo Sion, batii ba ninsi ni di Yerusalem, bilɔbasinwi kaku. Abale ye sibualɛ nse biewi biɛkaalɛ nwɔ lɛkyakaako! Ninfa ninfa eenu, abatuna ye.20Kuntɛ SAATE nwu lɛta ye dibuo fɛ alesaa, nimiina kafɔɔ fɛ ntu yi, basaatuotɛ lee dilɔbasinwofasa ye; bibanya ma ku anu lee amu.21Kuntɛ biemunikĩi biefe di oletanɛɛkyɛ ee ɔmɛntukyɛ yi, atoko lee kamanu sɛlɔ di sɛmaa lee simbuɛ alɛ, “Nnya osuku nwu; bikyɛ nwu di suoto.”22Ni bibakpɔnɔnfɔsa afiɔ lee ya biefifia ni koto fututu ku afatii lee ya beetĩi ni ku koto sɛɛle; bibafuki nya min-yu fɛle kayi ofe sikplakpi mintɔkɔ nya kafɔɔ bilɛ, “Bitɔɔkyɛ!”23Abata kanto kafɔɔ nnɔɔ ankpete di alesaa kubi ko biɛpɛ ni koofe, ku alesaa ya nindie ankye ni kasɔ nwu kamɛ kamalɛ ampɔ kafɔɔ. Di dii nwu nkpo, banankyue lee kamawee sɛfa di sɛfa kaweekɔ blɛfɛɛ.24Banankyue-suɔtɔ ku babɔkɛɛ ba nintuka ni atoo ninkpɛ ni kasɔ kamale alesaa biene ya bɛɛyɔ sofi ku lɛsaa le man-yɔ mansasafɔ ni kasɔ.25Di dii le babalo ni batii kpinwu, di ayo takale nwu ntoobiɛ ni yi, seklenyii ntu kamabiɛ sinfe di kobokote takale biala suoto ku lekpenkpe takale biala suoto.26Kɔwɛntɛ kamapu fɛle kufĩ, kufĩ lɛkpa kafɔɔ kamakple nintaka katoo di sikuɛnsĩ kamɛ, fɛle ayi akuɛnsĩ amu lɛkpa, nse SAATE nwu ntoonii batii nɔɔ aba ya beefĩfĩni ni, eelo kafɔɔ nkɔ be eetika ma nii.27Nyu, SAATE nwu Leyooto lekye fanfa diɔwa,ku ɔblɔ yakayaka ku alokonkyɛ kplɛ kɔyɔ;nnyasibi nɔɔ leyii ku ɔblɔ,ɔkplalomii nɔɔ kafɔɔ nle ɔtɔ wɔ nikɔfiɛ nii.28Ninwuna nɔɔ nte fɛle ntu kplɛ nikobiɛ ninwa,diɛtaka diedu ni simu lɛkaatɛɛ.Antũkunsa nnle di kawɔɔ kalenke kamɛ;di batii nwu nnya eetũ nisifutuwɛ dibakpaa ma man-yu nii.29Bibasa sinu kafɔɔfɛ di dii klekle ole kakyɛ;situ lee kamanya suoto lɛyɔɔfɛ nse batii kɔfɛ kukyukyue bɔɔkata manfeSAATE nwu kobokote osi,di Israel Difuɔnkpaa nwu nfũ.30SAATE nwu kamata batii nnu nimuɔ nɔɔ nwu sɛlɔanta ma kafɔɔ mannya kɔnɛɛ nɔɔ kosoo kunwa ni kasɔku ɔblɔ kpakataa ku ɔtɔ wɔ nikɔfiɛ nii,ku kanto dikpududuu, sɛplalaa ku atubakanii.31SAATE nwu sɛlɔ kamabibiɛ Asiria batii;ku ɔka kayofo nɔɔ abayɔ ampɛ ma antɛ kaasɔ.32Lɛpɛ biala di SAATE nwu lɛyɔ eetika ma di suotoku letokonanfi kawesee nɔɔ yi,dibale akasa sinu ku basanku ɔsa,di obe wɔ ɔɔkpɛko ma ni di kakpɛ kamɛ ku kɔnɛɛ nɔɔ aklɔɛklɔɛ.33Beelolaa Tofet bɛɛtɛ kofokofoko;beelolaa lɛba nwu bɛɛtɛ bɛɛta ɔka.Bɛɛbla ɔtɔ nɔɔ dibiɔ diekyofo, diɛblɛfɛ kafɔɔ,ku ɔtɔ ku ntɔɔni kpinwu;SAATE nwu ninwuna,ninte ni fɛle ama okle wɔ ninfiɛ ni,nimakpee nwɔ ɔtɔ.The Seed Company