1 Mose Kukũ Nɔnle11
Bɔmbɔ SAATE Nwu Faanu Nwɔ Ɔlaa
1Bɔmbɔ SAATE Yaa lɛfɔ faabla dibiesaa nɔɔ, kyɛ di sisuku nɔɔ, faale afiofa nɔɔ, faaklee sɛsaabla nɔɔ kafɔɔ obe lele.2Binyuma miɛ bilɛ diele babi lee nianya, baatofo kafɔɔ SAATE Yaa lee ditii-nanfi: sɛka kalekɔ nɔɔ, kɔnɛɛ nɔɔ kplɛ ku kɔnɛɛ nɔɔ lɛnanfi;3atuosaa ya ku asaa ya aabla ni di Egipte kamɛ, di Egipte ɔka Farao ku kale nɔɔ kamuu, akyuu lɛma nwu anyɔ suoto;4lɛsaa le di SAATE nwu labla ni Egipte batii bakpɛtɛ ku bapɔnkɔ ku bapɔnkɔ bakeke lɛma, di obe wɔ baatikanko ye ni, di mmle aata Lekpo Sɛɛle ntu labiɛ diakpete ma ni, ku mmle di SAATE nwu lawɔɔsa ma diɛbase ni bia miɛ.5Ditale babi lee nianya lɛsaa le aabla ni di ɔfaafuu nwu kamɛ dialase ni di obe wɔ biabuo ni lɛba le mmle,6ku lɛsaa le aabla ni Eliab, Ruben otii nwu babisuɔtɔbi Datan ku Abiram, di obe wɔ di kasɔ labɛ ni kanya di Israel batii bamuu ntɛɛ, kaa-mɛ ma ni ku ayo lɛma kamɛ batii, akpaayo lɛma ku asaa biala ya niawɛ ni nkpa, aale ma ni ale.7Kafɔɔ anu lee amu nianya asaa kplɛ ya mmle amuu di SAATE nwu labla nii.Lɛtɔtrɔ Di Kasɔ Ka Baabuɛ Baatɛ Ni Suoto
8Nioso bile afiofa ya amuu kɔyɔ nta ye ni miɛ, di mmle biawɛ ni osie minkyɛ minnaayɔ ni kasɔ ka biɔɔtaalɛ Yordan minaayɔ ni,9di mmle biasiɛ nkpa minklɛ ni di kasɔ ka di SAATE nwu laka ntam aata ni bawa lee ku banantii lɛma, kasɔ ka di nnyɛɛntu ku bablɔ kobiɛ ninfe nii.10Kasɔ nwu fababuo fanaayɔ ni diete fɛle Egipte kasɔ, di nfũ feekye nii, nfũ nse fɛɛpɛ asaa, fankpete nya ni ntu ku okyiini fɛ mmle mambla ni di kɔba asaa suoto.11Kafɔɔ kasɔ ka biɔtaalɛ Yordan minaayɔ ni yi, abokote ku sɛtaata kasɔ ka ninnyi ni kanto ntu be ninkye ni osi kale.12Kale kasɔ ka di SAATE Yaa lɛfɔ konyu nii; SAATE Yaa lɛfɔ anu ntika ka di suoto obe lele diɛyɔ ni di lɛlɛɛ kasɔ kakyekɔ diɛlaase ni di kayɛntɛkɔ.13Nioso nse nwaako biele afiofa ya kɔyɔ nta ye ni miɛ- biɛbɔmbɔ SAATE Yaa lee, biesumu nwɔ ku otu lee omuu ku ɔkla lee omuu yi-14ni kamata kanto nnɔɔ di kasɔ lee suoto di obe nɔɔ kanya, kɔkyɛɛ ku kabiene kanto, di mmle biawɛ ni alesaa ku nta fɔle ku nnɔnyi.15Kamata sɛfa nnyie di kasɔ nwu sinta babɔkɛɛ sele lɛfɔ, obe lele fabale fammiɛ.16Bilolaa binyu, nse diele nkpo babakyɔnkyɔ ye minmunikĩi minaasumu bayaa bamba, minwakasɔ minta ma.17Ni ɔblɔ kamafiɛ SAATE nwu di suoto lee, ni abasɛɛ osi ninta alɛ kanto dilɔbanɔɔ ata kasɔ kalɛ alesaa, ni bibakpi wla mindie di kasɔ biene ka di SAATE nwu kɔyɔ nta ye ni suoto.18Biyɔ sɛlaa nii se mmle bikpee di situ ku asi lee kamɛ; bipɛ sĩ akpa di nnɛɛtũ lee, bienii sĩ di ntũ lee fɛ nsũ lɛtɛsaa.19Bituo nya babi lee, bietoobuɛ sĩ nse bikpe leeyo, nse bikyɛ di osuku, nse bite ku obe wɔ biɛtaka ni.20Bikpana nya di ayo lee n-yoko sewoso suoto ku akloo lee suoto,21di mmle di ayi lee ku babi lee ayi kamapɔ ni di kasɔ ka di SAATE nwu laka ntam alɛ abata ni bawa lee, mmle biasiɛ ni fɛ mmle okle di osi lɛtaka katoo kalenke ni kasɔ.22Nse bielolaa afiofa ya mmle amuu kɔyɔ nta ye nlɛ bitikanko ni bieklee nwaa yi- biɛbɔmbɔ SAATE Yaa lee, biɛkyɛ di sisuku nɔɔ simuu suoto, biemufũ nwɔ bieklee kpinkpĩ yi-23ni SAATE nwu kamatososa nnle be mmle mmuu di anu lee, min-yɔ nnle be nimpɔ, bakpe ni osie balenke ye ni nsɔ.24Lɛba biala di kɔkpaa lee lɛnafu kamale ye kale: Kasɔ kamadie di ɔfaafuu kanaadu Lebanon, kandie di Eufrate Okle kanaadu kufĩ kamɛɛkɔ lɛkpo.25Otii kuonwii dilɔbafuo oyila di suoto lee. Fɛ mmle di SAATE Yaa lee labuɛ aatɛ aata ye ni kamayɔ suoto lee difu ku lɛyɛkɛ ankpee di kasɔ kamuu suoto, di kakɔ biala biɛkyɛ.26Binyu, kɔyɔ lɛtɔtrɔ ku lɛkpaani ntɛ ye di anu miɛ-27nse biele SAATE Yaa lee afiofa nwu kɔyɔ nta ye ni miɛ, ni bibawɛ lɛtɔtrɔ;28kafɔɔ nse biesĩ SAATE Yaa lee afiofa ole, biediɛ ɔkyɛ di osuku wɔ lɛtɔkɔ ye ni miɛ suoto, biɛkyɛ bitikanko bayaa bamba ba bitatofo nii, ni lɛkpaani dile dita ye.29Nse SAATE Yaa lɛfɔ ntɔɔkpaa fɔ ɛɛwako kasɔ ka fababuo fanaayɔ ni yi, faayie lɛtɔtrɔ lɛkya di Gerisim Kobokote osi, faabuɛ lɛkpaani ɔlaa kafɔɔ di Ebal Kobokote osi.30Fɛ mmle biye nii, abokote ya mmle nkpe di Yordan sɛmaa, di kufĩ kamɛɛkɔ osuku lɛkyɛ, diofe ni kufĩ kamɛɛkɔ, dikaako ni More awoso kplɛ nwu, di Kanaan batii ba ninsi ni di Araba kasɔ suoto di Gilgal ntɛɛ nwu.31Nfɛ biɔwa Yordan Okle ɔtaalɛ mimbuo minaayɔ kasɔ ka di SAATE Yaa lee kɔta ye nii. Nse bitɔɔlayɔ ka, nfɛ bisi ninfa,32bilolaa binyu bilɛ biele afiofa ku sɛsaabla se simuu kɔyɔ ntɛ ni di anu lee miɛ.The Seed Company