1 Mose Kukũ Nɔnle12
Lɛba Ninwii Diɛta Ni Yaa Kasumukɔ
1Nnya afiofa ku sɛsaabla se dikpeni bielolaa bietikanko ni di kasɔ ka di SAATE nwu, bate lee Yaa kɔta ye alɛ biyɔ ni- di obe wɔ bisi ni di kasɔ nwu suoto.2Bilalaasa nnle be biofe ni otososa aba ya amuu maansumu ni bayaa lɛma, di abokote takale ku akpenkpe osi ku awoso biala niefukuti ni kalɔ klekle.3Bibibiɛ oleɔta akyikye lɛma nwu, biɛkpakpaa afiɔtii lɛma nwu, biefiɛ Asera sewoso lɛma nwu ku ɔtɔ; bilalaasa afiɔ bayaa lɛma nwu, biɛyɛɛsa ayooto lɛma di aba nwu.4Bitansumu SAATE Yaa lee di mmle mansumu ni ole ma kanya.5Kafɔɔ biwolaa lɛba le di SAATE Yaa lee kamadiki anta ye ni di ana lee nwu amuu kamɛ, alɛ Leyooto nɔɔ kate nimbla ni kasiɛkɔ nɔɔ. Lɛba nwu dikpeni minkyɛ nɛ.6Nfa bibawako ofiɛ asaaɔta lee ku seleɔta, akyuu fosile lee ku akyɛsaa finle, ku asaa ya biabuɛ biatɛ bilɛ bibata ni, ku situ-fãa lee kamɛ asaaɔta, ku banankyue ku bafoso lee abi lelofo kasale nɛ.7Lɛba nwu, di SAATE Yaa lee anu di aye ku ayo lee kamɛ batii kamale mannya suoto lɛyɔɔ di lɛsaa biala suoto bietika nnɛɛ lee nɛ. Diekye SAATE Yaa lee ntɔɔta ye lɛtɔtrɔ.8Bitambla fɛ mmle buɔɔbla ni ninfũ miɛ, fɛ mmle di otii biala kɔnya alɛ diesiɛko nii,9diekye biibuo ɔnyɛɛ katɛkɔ ku atesaa ya di SAATE Yaa lee kɔyɔ anta ye nii.10Kafɔɔ bibataalɛ Yordan Okle minaasiɛ di kasɔ ka di SAATE Yaa lee kɔyɔ anta ye ni fɛ atesaa, abata ye kafɔɔ minwɛ ɔnyɛɛ ɔtɛ di balo lee bamuu niɛmana ye beekyi ni suoto, di mmle bibasiɛ ni di atoko ɔkyɛ ole kamɛ.11Ni, di lɛba le di SAATE Yaa lee kamadiki anta ni fɛ Leyooto nɔɔ kasiɛkɔ yi- nfa bibayɔ lɛsaa biala lɛtɔkɔ ye ni minwako nɛ: ofiɛ asaaɔta ku seleɔta lee, akyuu fosile lee ku atasaa finle lee ku asaa ya amuu ninlɛ biabuɛ biatɛ bilɛ bibata ni SAATE nwu.12Binya suoto lɛyɔɔ di SAATE Yaa lee anu ninfa, aye bamu, babisuɔtɔbi lee, babisankobi lee, basuɔtɔ bakpɛmblatɛ ku basanko bakpɛmblatɛ lee ku Lewi batii ba niekye ni sekpoo lee, banaa ni kalekɔ ee atesaa lɛma amu.13Bilolaa binyu bilɛ biɛɛta ofiɛ asaaɔta lee di kakɔ lele ninlɛ ye nii.14Bita nya di lɛba le lete di SAATE nwu kamadiki anta ye ni di ana lee nwu kunwii kamɛ, nfa kafɔɔ biɛbla lɛsaa biala lɛtɔkɔ ye ni nɛ.15Kafɔɔ faafuo babɔkɛɛ lɛfɔ olo di okpoo lɛfɔ lele kamɛ, fanwee sina nwu fɛ mmle foomiɛ ni di lɛpɔ kanya, fɛ mmle dite ni fɛ kakpini ee kafɛ sina okle, di mmle kanya di SAATE Yaa lɛfɔ lɛta fɔ ni lɛtɔtrɔ. Otii wɔ nieklekle ni ku nwɔ ninanklekle ni, akyuu lɛma anyɔ kafuo sina nwu ole.16Kafɔɔ diɛkaatɛ biele ntɔ nwu; binyɛɛnɛ mi biwii kaasɔ fɛle ntu.17Tanle asaa ya mmle di okpoo lɛfɔ omu kamɛ, atitabi lɛfɔ dikyuu fosile, nta fɔle ku nnɔnyi ee banankyue ku bafoso lɛfɔ lelofo kasale, ee lɛsaa lele feebuɛ fɛɛtɛ falɛ fabata nii, ee otu-fãa lɛfɔ kamɛ asaaɔta ee akyɛsaa finle ɔta.18Kafɔɔ bile nya di SAATE Yaa lee anu, di lɛba le di SAATE Yaa lee kamadiki ni- aye bamu, babisuɔtɔbi lee ku babisankobi lee, basuɔtɔ bakpɛmblatɛ ku basanko bakpɛmblatɛ lee ku Lewi batii ba niekye ni sekpoo lee. Binya suoto lɛyɔɔ di SAATE Yaa lee anu di lɛsaa biala suoto di nnɛɛ lee letika ni.19Lolaa fanyu falɛ faale fadiɛ Lewi batii nwu, di obe wɔ fɛɛnya fasi ni di kasɔ lɛfɔ suoto.20Nse SAATE Yaa lɛfɔ lɛblɛfɛsa kasɔ lɛfɔ fɛ mmle aabuɛ aatɛ aata fɔ nii, di sina nkle fɔ ɔkɔnsɔ, feebuɛ falɛ, “Komiɛ sina sewo owee,” yi, ni faafuo sĩ owee fɛ mmle foomiɛ ni di lɛpɔ kanya.21Nse lɛba le di SAATE Yaa lee lediki alɛ Leyooto nɔɔ dite ni lesii ye okyo yi, ni biafuo banankyue ku bafoso ba di SAATE nwu lɛta ye ni olo di sekpoo lee simu kamɛ, minwee sina nwu fɛ mmle kanya biomiɛ ni di lɛpɔ kanya, fɛ mmle latɔkɔ ye nii.22Biwee sĩ fɛ mmle biawee ni kakpini ee kafɛ. Batii ba nieklekle ni ku mba ninanklekle ni, akyuu lɛma anyɔ kafuo sĩ owee.23Kafɔɔ lolaa fanyu falɛ faale bɔkɛɛ nwu ntɔ, diekye ntɔ nwu ninle nkpa nɛ, nioso tanle nkpa nwu ku sina.24Tanle ntɔ nwu; nyɛɛnɛ mi fawii kaasɔ fɛle ntu.25Tanle mi, di mmle dialɛ ninta ni afɔ ku babi lɛfɔ ba sɛɛmaa lɛfɔ, diekye fabatɔɔbla lɛsaa le ninlɛ ni di SAATE nwu anu.26Kafɔɔ yɔ akleklesaa lɛfɔ nwu ku lɛsaa lele feebuɛ fɛɛtɛ falɛ fabata ni, faakyɛ lɛba le di SAATE nwu kamadiki antɛ ni.27Yɔ sina ku ntɔ, akyuu nwu anyɔ fata ofiɛ asaaɔta lɛfɔ di SAATE Yaa lɛfɔ oleɔta akyikye suoto. Nyɛɛnɛ oleɔta ntɔ nwu fakpete di SAATE Yaa lɛfɔ oleɔta akyikye suoto, kafɔɔ faafuo sina nwu owee.28Lolaa fanyu, faakyɔɔ kotoko di sɛlaa se simuu kɔta fɔ ni, ta mmle dibalɛ ninta ni afɔ ku babi lɛfɔ ba di sɛmaa lɛfɔ, diekye fababla lɛsaa le ninlɛ, diesiɛko ni di SAATE Yaa lɛfɔ anu.Ɔlaa Osĩ Ɔta Di Afiɔ Osumu Suoto
29SAATE Yaa lɛfɔ kamawɔɔsa nnle be nfɛ foofe ni odieko, fantososa ma ni di anu lɛfɔ. Kafɔɔ nse fatootososa ma feediki, nfɛ fasi di kasɔ lɛma nwu suoto,30ni nse batɔɔwɔɔsa ma di anu lɛfɔ beeloo yi, lolaa fanyu falɛ dikyĩ diemufũ fɔ, alɛ foowolaa bayaa lɛma nwu kamɛ fambuɛ falɛ, “Lɛ kanya di nnle be mmle nsumu bayaa lɛma nwu? Awoo bubabla nkpo.”31Diɛkaatɛ feesumu SAATE Yaa lɛfɔ di osuku lɛma kanya, diekye di bayaa lɛma kasumu kamɛ yi, mambla ayududusaa ateate amuu ya di SAATE nwu lekyidi nii. Bia manfiɛ babisuɔtɔbi ku babisankobi lɛma di ɔtɔ kamɛ manta bayaa lɛma oleɔta.32Binyu bilɛ biɛbla di sɛlaa se simuu lɛtɔkɔ ye ni; bitankyakaa lɛsaalɛsaa ee biadiki lɛsaalɛsaa kaamɛ.The Seed Company