1 Mose Kukũ Nɔnle10
Mose Lakple Aafũ Afiofa Lefosi Nwu
1Di obe nwu kamɛ SAATE nwu latɔkɔ mi alɛ, “Kyɛkyɛsɛ afuɔ nkyɛ nnyɔ fɛle akasale nwu nkpo okle fadiki, faakata fawa ɔkyɛ nii di kobokote nwu osi. Wola kowoso lɛlakaa kafɔɔ.2Kamakpana sɛlaa se niatika ni di nkyɛ kasale be faabibiɛ ni suoto ntika. Ni faayɔ nya fakpee di lɛlakaa nwu kamɛ.”3Nioso layɔ akesia sewowo lawola lɛlakaa nwu, ni lakyɛkyɛsɛ afuɔ nkyɛ nnyɔ ladiki fɛle nkasale nwu nɛ. Ninfɛ lakata lasifi kobokote nwu osi ku afuɔ nkyɛ nwu nnyɔ di nnɛɛ nii nɛ.4Ni di SAATE nwu lakpana sɛlaa se aakpana ni di obe nwu aatika di afuɔ nkyɛ nnyɔ be mmle suoto nɛ. Afiofa Lefosi nwu aatɔkɔ ye ni di kobokote nwu osi, aakyeko ni ɔtɔ kamɛ, di dii le biasi ni dikudi. Ninfɛ di SAATE nwu layɔ nya aatɛɛ nɛ.5Ninfɛ lasoo di kobokote nwu labayɔ afuɔ nkyɛ nwu lakpee di lɛlakaa le labla ni kamɛ, fɛ mmle di SAATE nwu latɔkɔ mi ni nɛ, asi ninfa kanunua.6(Ni di Israel batii ladie di Yaakan batii atubiɔ nwu, baasifi Mosera nɛ. Nfa di Aron lakpi baakookaa nwɔ nɛ, ninfɛ di obisuɔtɔbi nɔɔ Eleaser layila nwɔ kaanya fɛ oletatɛ-nɔɔfo nɛ.7Baadie ninfa baasifi Gudgoda, baafe baasifi Yotbat, kasɔ ka ku seklenyii ntu.8Di obe nwu nkpo kamɛ SAATE nwu ladiki Lewi batii kɔna aase lete alɛ batuka SAATE nwu kanya ninii lɛlakaa nwu, alɛ baayila di SAATE nwu anu mambla kasumu ɔkpɛ man-ta batii lɛtɔtrɔ di leyooto nɔɔ kamɛ, fɛ mmle bookple mambla ni miɛ.9Nkpo oso di Lewi batii nnaa lɛba ee atesaa di babilɛma kamɛ nɛ; SAATE nwu ninle ma atesaa, fɛ mmle di SAATE Yaa lee latɔkɔ ma nii.)10Lasiɛ di kobokote nwu osi ayi afosi-ana ku n-kyɛ afosi-ana, fɛ mmle labla ni lɛkasale, ni di SAATE nwu lakple aanu mi ɔlaa di obe nwu kamɛ kafɔɔ nɛ. Ditale nwɔ dibiesaa alɛ ɔɔwɔɔsa ye.11Ni di SAATE nwu latɔkɔ mi alɛ, “Tɔɔkyɛ faalaaleko batii nwu katũ di osuku lɛma, di mmle baabuo man-yɔ ni kasɔ ka laka ntam lata ni bate lɛma nlɛ kamata ma ni.”Lɛsaa Le Di Yaa Kɔkaalɛ Ankyeko Ni Ɔkyɛlɛfɔ
12Oo Israel, kanunua lɛsaa le di SAATE Yaa lɛfɔ kɔkaalɛ ankyeko ni ɔkyɛ lɛfɔ ninle alɛ, yɛkɛ SAATE Yaa lɛfɔ, faakyɛ di sisuku nɔɔ simuu suoto, faabɔmbɔ nwɔ, faasumu SAATE Yaa lɛfɔ ku otu lɛfɔ omuu ku ɔkla lɛfɔ omuu,13faale SAATE nwu afiofa ku sɛsaabla se kɔta fɔ ni miɛ, diɛta ni dibiene lɛfɔ nimu.14SAATE Yaa lɛfɔ lèle di osi nwu nle, bia osi wɔ niɛtaka katoo kulenke ni, di kasɔ ku lɛsaa biala nsi ka ni kaamɛ.15Kafɔɔ SAATE nwu layɔ lɛbɔmbɔ nɔɔ aata bawa lee ni aabɔmbɔ ma nɛ. Ni aadiki aye, banantii lɛma, bilenke nnle mmuu, fɛ mmle dite ni miɛ nɛ.16Nioso bikyɛlɛnsa situ lee, bitansimbla otokopĩ nwu diidii.17Diekye SAATE Yaa lee nwu ninle Yaa ata bayaa nwu, ku SAATE ata ni basaate nwu, Yaa wɔ niemuɔ nii, alenke nii, baayɛkɛ nwɔ ni kafɔɔ, anaanyu ni otii di anu, annanfũ ni kafɔɔ ditunu kamɛ asaa.18An-nyu bakuɛbi ku bakpisɔfɔ lɛlɛ, ambɔmbɔ kafɔɔ bafɔɔ, anta ma alesaa ku aklesaa.19Ayee bibɔmbɔ batii ba ninle ni bafɔɔ, diekye aye bamu bafɔɔ biale di Egipte kasɔ.20Yɛkɛ SAATE Yaa lɛfɔ, faasumu nwɔ. Mufũ nwɔ faklee kpinkpĩ, faaka ntam lɛfɔ di leyooto nɔɔ kamɛ.21Nnwɔɔ ninle katansa lɛfɔ nɛ; nnwɔɔ ninle Yaa lɛfɔ wɔ niabla ni akplɛsaa ku ayɛkɛsaa nwu nkpo niabla ni ɔkpɛ ata ye bianya ni ku anu lee amu nɛ.22Bawa lɛfɔ ba niasifi ni Egipte bamuu labla batii afosi-akuɛnsĩ, kafɔɔ kanunua SAATE Yaa lɛfɔ ntɔɔta fɔ fɛɛpɔ fɛ awɛntrɛbi di kolo.The Seed Company