1 Mose Kukũ Nɔnle9
Israel Batii Otokopĩ
1Oo Israel, nu. Nfɛ fɔɔwa Yordan ɔtaalɛ kanunua fansifi fanaayɔ nnle be nimpɔ bakpe ni osie balenke fɔ ni ku sekpoo kplɛ se beetofo siyoyiɛ takale siesifi ni kolo.2Batii nwu nkpe osie, bɛɛkaana kafɔɔ- Anak batii! Faye ma, fatoonu beebuɛ kafɔɔ alɛ: “Owe nimafuo oyila di Anak batii suoto?”3Kafɔɔ fũ fakpee miɛ falɛ SAATE Yaa lɛfɔ ninle nnwɔ nimaleko fɔ ni katũ fantaalɛ ni, fɛle ɔtɔ bembe nɛ. Abawɔɔsa ma; anlenkee ma di anu lɛfɔ. Fantososa ma fandiki klekle fɛ mmle di SAATE nwu labuɛ aatɛ aata fɔ nii.4Nse SAATE Yaa lɛfɔ ntootososa ma di anu lɛfɔ sɛmaa yi, tambuɛ di otu lɛfɔ kamɛ falɛ, “SAATE nwu niɛwakoe nfũ alɛ n-wa nimayɔ kasɔ ka mmle ta ɔsaabla tinini nii oso.” Oowo, nnle be mmle amumu oso di SAATE nwu kɔwa ma ɔbatososa di anu lɛfɔ nɛ.5Diele ɔsaabla tinini lɛfɔ ee otu lɛfɔ kamɛ lɛkpa ni oso foofe kasɔ lɛma nwu ɔyɔ; kafɔɔ nnle be mmle amumu lɛma ole oso di SAATE Yaa lɛfɔ kamatososa ma andiki di anu lɛfɔ, alɛ aata ntam be aaka aata ni bate lɛfɔ, Abraham, Isak ku Yakob kawa ni kaanya.6Nu kasɔ falɛ, ni diele ɔsaabla tinini lɛfɔ oso di SAATE Yaa lɛfɔ kɔyɔ kasɔ biene ka mmle anta fɔ alɛ kabla fɔ kale, diekye batokopĩtɛ batii bile.Koto Sɛɛle Lɛnankyuebi
7Nyuma nle mmle, diidii tan-yee kafɔɔ mmle faakpee ni SAATE Yaa lɛfɔ ɔblɔ di ɔfaafuu kamɛ. Diayɔ ni di dii le biadie ni di Egipte kasɔ dialaase ni di obe wɔ biabuo ni nfũ, biataka biayila di SAATE nwu suoto.8Di Horeb, biata SAATE nwu ɔblɔ lataka yakayaka, diata ɔblɔ lafiɛ nwɔ alɛ see ɔɔwɔɔsa ye.9Obe wɔ lakata lakyɛ ni kobokote osi lalaafũ ni akpanasaa afuɔ nwu, kanya ninii afuɔ ya di SAATE nwu labla ni ku aye, lasiɛ di kobokote nwu nkpo ayi afosi-ana ku n-kyɛ afosi-ana; ntale alesaa, ntanyi ntu kafɔɔ.10SAATE nwu latɛɛ afuɔ nkyɛ nnyɔ di Yaa lɛnɛɛbi lakpana nii. Afiofa ya amuu di SAATE nwu latɔkɔ ye ni di kobokote osi di ɔtɔ kamɛ, di dii le biasi ni dikudi.11Di ayi afosi-ana ku n-kyɛ afosi-ana nwu kayɛntɛkɔ, SAATE nwu latɛɛ afuɔ nkyɛ nnyɔ, kanya ninii afuɔ nwu.12Ninfɛ di SAATE nwu latɔkɔ mi alɛ, “Soo ninfũ fasifi wla, diekye batii lɛfɔ ba faakpaa faadieko ni di Egipte ntɔɔlalaa. Batookyi wla di kufiofa ko lɛta ma nii, ni batɔɔbla abɔɔsaa afiɔ bɛɛta suoto lɛma nɛ.”13Ni di SAATE nwu latɔkɔ mi alɛ, “Ntɔɔnya batii ba mmle, nwaako batokopĩtɛ bale!14Diɛ mi, ninwɔɔsa ma, nindiki leyooto lɛma di kasɔ ka mmle suoto. Kamayɔ fɔ mbla kale siene, fankpɛ nwaa fanlenkee ma.”15Nioso lamunikĩi lasoo kobokote nwu lasifi, di obe wɔ kuatoofiɛ ni ku ɔtɔ bembe. Di kanya ninii afuɔ nkyɛ nwu nnyɔ lasiɛ mi ni ninnɛɛ.16Lanyu nii, lanya nlɛ bitɔɔbla okpile di SAATE Yaa lee suoto; bitɔɔbla abɔɔsaa afiɔ di lɛnankyuebi letembi kanya biɛta suoto lee. Bitookyi wla di kufiofa ko di SAATE nwu latɔkɔ ye nii.17Nioso layɔ afuɔ nkyɛ nwu nnyɔ ninnɛɛ nii lafuki layu, aabibiɛ kɔkyɛɛkɔkyɛɛ di anu lee.18Ni lakple lafuusa anu kaasɔ di SAATE nwu anu ayi afosi-ana ku n-kyɛ afosi-ana nɛ; ntale alesaa, ntanyi ntu kafɔɔ, ta sikpile se simuu biabla ni oso, biabla ni nle niale ni okpile di SAATE nwu anu, diata ɔblɔ lafiɛ nwɔ nii.19Layɛkɛ SAATE nwu ɔblɔ ku lɛyakayaka ninwu, diekye aanya ɔblɔ osie kanya dikaatɛ alɛ see aawɔɔsa ye nii. Kafɔɔ SAATE nwu lakple aakyɔɔ mi atoko.20Ni di SAATE nwu lanya ɔblɔ osie kanya aakpeeko Aron, alɛ ɔɔwɔɔsɔɔ nii, kafɔɔ di obe nwu kamɛ lapɛ ɔlaa lata Aron kafɔɔ.21Ni layɔ kafɔɔ okpile lɛsaa lee nwu, lɛnankyuebi le biabla ni lakpee di ɔtɔ lafiɛ nɛ. Ninfɛ lakuɔ ni diabla mpu muɛmuɛ fɛ ɔtɛnfuu, ni lanyɛɛnɛ ɔtɛnfuu nwu lakpete di okle wɔ niabiɛ kuakye ni kobokote nwu kamɛ nɛ.22Biakpee SAATE nwu ɔblɔ kafɔɔ di Tabera, di Masa ku Kibrot Hatawa.23Ni di obe wɔ di SAATE nwu lakpee ye ni kɔtɔ aakyeko ni Kades Barnea yi, aatɔkɔ ye alɛ, “Bitɔɔkyɛ osi nwu biɛlaayɔ kasɔ ka ntɔɔta ye ni.” Kafɔɔ biataka biayila di SAATE Yaa lee kufiofa nwu suoto. Bitafũ nwɔ bianu ee bianu nwɔ ɔlaa.24Biɔtaka minyila di SAATE nwu suoto, bia di obe wɔ kamɛ latofo ye nii.25Lafuusa anu kaasɔ di SAATE nwu anu ayi nwu afosi-ana ku n-kyɛ afosi-ana, diekye SAATE nwu labuɛ alɛ abawɔɔsa ye.26Ni lapɛ ɔlaa lata SAATE nwu labuɛ nlɛ, “Oo SAATE Kplɛ, tanwɔɔsa batii lɛfɔ, atesaa lɛfɔ amu ya faayɔ osie kplɛ lɛfɔ faadiki ni, faakpaa ma faadieko ni di Egipte ku kɔnɛɛ lɛfɔ kplɛ.27Nyuma bakpɛmblatɛ lɛfɔ, Abraham, Isak ku Yakob. Kpaa sinumpoo fatĩi batii ba mmle atokopĩsaa, amumu lɛma ku sikpile lɛma.28Nse diele nkpo, kale ka faakpaa wo faakyeko ni batii kamabuɛ alɛ, ‘Ta SAATE nwu diefuo ma ni ɔkpaa osifiko ni kasɔ ka aabuɛ aatɛ aata ma ni oso, ni ta eekyidi ma ni oso, aakpaa ma aadieko aabalo di ɔfaafuu kamɛ nɛ.’29Kafɔɔ batii lɛfɔ bale, atesaa lɛfɔ ya faayɔ osie kplɛ lɛfɔ ku kɔnɛɛ lɛfɔ lɛnanfi faadieko ni bale.”The Seed Company