GALATIFOƐ6
1Aliemaa mɔ, sɛ ebie di mvomsoɛ kora né ye nye awa ye nwo so a, ɛmɔ bɔ ɛmɔ nwo akwokwa ne, ɛmɔbɔ mmɔden bɛle ye besie yé, nakoso honhom bɔ odwo yeɛ ɛmɔfa bɛyɛ sɔ ɔ. Na ɛmɔnea ɛmɔ nwo yé, ofikyɛ annea a né basɔ ɛmɔ koso banea.2Ná ɛmɔhɔ so bɛboka-boka ɛmɔ nwo, sɛ ɛmɔyɛ sɔ a, né ɛmɔdi Kristo mmeraa naso.3Sɛ ebie adwene yɛ ye kyɛ odi mu, nakoso ɔtte huu a, né ɔlaka-laka ye nwo.4Yeti, ɛmɔma ebiala nea kyɛbɔ ye bɔbɔ ye adwuma te ɔ, ɛhene yeɛ ɔkɔmaa okonya nikye bie kɔfa kɔhoɔhoa ye nwo, ná ɔtte kyɛ ɔfa ye nwo toto ebie nwo.5Ofikyɛ, ebiala kɔsoa ye bɔbɔ ye adesoa.6Afei koso, ebiala bɔ bɛfa edwirɛ ne bɛ kyirekyire ye ne, odikyɛ ɔne bɔ okyirekyire ye ne nya nningyein pa nu kyɛfa.7Nnɛmɔ maa bɛlaka-laka ɛmɔ, Nyameɛ de, bɛngoro ye nwo, ofikyɛ bɔ sona dua ne, ɛhene ala yeɛ ɔkɔpɛ ɔ.8Bɔ odua ye anwoɔnaen nu ne, ofi anwoɔnaen nu kɔpɛ bɔ waporɔ; nakoso bɔ odua ye honhom nu ne, ofi honhom nu kɔpɛ daa ngoa.9Yeti, nnɛmɔ maa yɛpa aba wɔ pa bɔ yɛyɛ nanu, ofikyɛ sɛ yamba aba a, mmerɛ bɔ ɔsɛ nu ne, yekonya ye nwo akatua.10Yeti, mmerɛ biala bɔ yekonya ye nwo atee ne, ɛmɔma yɛyɛ mmenia mukoraati pa, ɛnga-nga bɛ bɔ yɛne bɛ bɔ abusua wɔ gyidie nanu ne.11Ɛmɔnea, me bɔbɔ me sa yeɛ mafa mahworɔ edwirɛ he mbiri-mbiri maberɛ ɛmɔ ne.12Bɛ bɔ bɛpena kyɛ benya mmenia nyunu anuonyam ne, bɛ yeɛ bɛhyɛ ɛmɔ kyɛ ɛmɔpɛ ɛmɔ toa ne, na bɛyɛ sɔ kyɛbɔ ɔkɔyɛ a, bɛngɔ tane bɛ nye wɔ Kristo asɛnnua nanwo.13Bɛ bɔ bapɛ bɛ toa ne po, benni mmeraa naso, nakoso, bɛpena kyɛ ɛmɔpɛ ɛmɔ toa, na bafa ɛmɔ nipadua ne bahoɔhoa bɛ nwo.14Na me de, membena kyɛ mehoɔhoa me nwo, sana y'Awurade Yesu Kristo asɛnnua nanwo. Yenu yeɛ babɔ wiase ne asɛnnua nu bama me, na me koso, babɔ me asɛnnua nu bama ewiase ne.15Yeti, sɛ ebie apɛ ye toa oo, ɔpɛlle oo, ɔnga hwee. Bɔ ohia yeɛ ole kyɛ yɛkɔyɛ abɔdeɛ foforɛ.16Bɛ bɔ bɛkɔfa sɔ akwankyerɛ he bɛkɔbɔ bɛ bra ne, asomdwie ne anwunvoin ha bɛ, ɔha Nyameɛ Israel ne.17Ofi ɛnɛ bɔ ɔkɔ ne, nnɛmaa ebiala ha me kõ, ofikyɛ bahyɛ me nzorɛ kyɛ nde Yesu akoaa.18Aliemaa mɔ, y'Awurade Yesu Kristo adom bóka ɛmɔ so, mmerɛ bɔ ɛmɔda suban pa ali ne.
Amen.
Amen.
Lexihub