Re Tabtôan6
1Atôntôn êr tabtôn ane emi gatgat balêp aê watloji êsên êr môn aê êr gatgat ne do ran ratan.2Aê wanju Bwatkôlkôl anbe admwan êr mwalsê wanju antôn êr anbe êsên dalat êr ne êr betôôtôô balêp, aê gasu m'po mi kakui ane lon be aê ekanê i.3Aê Warsangul pea, “Nak nunua taet'du basô lo atôntôn êr ronga, aê ran anre môn aê i m'po be tarbea an met'po mat tê. Aê dam ane i met'seknê aê i metebe nuulsangul na dam su aê nuul beru nga.”4Lon wamran anre aê wanju Bwatkôlkôl anbe admwan êr ba me wanju atôntôn êr anbe êsên dalat êr, aê êr pasu watloji êr an mibe bwarii ta nga mômô êr ane sêr roo ran ôt, ne m'kanê êr epe Napil êr. Êr sek lon bông êr anre aê pon anre môn ran ratan.5Warsangul mwalsê ane sekan an sanga na atôntôn êr ran ratan, aê i m'betlap balêp. Êr ngadkes aê lolor, aê nar dodotan aê lor po be angane êr met'po seknê sekan an sanga nga, lon bông êr bonga.6Warsangul mwarngo m'sanga aê edodmôlmôl epe olin sa ne i môômnê atôntôn êr ran ratan, ne i nga sunê keratan balon lolon.7Aê Warsangul pea, “Nê me'tang bini atôntôn êr ane nê mwakoe êr jingin ratan aê êr met'nok: langlang na bwê êr, aê soksok êr an mwakrakra aê egalgal ran tan, aê soksok êr an gaga na lo masêa aê nê met'lamsi êr bonga aê êr met'nok. Nê m'dodmôlmôl epe olin sa ne nê môômnê êr.”8Ape Warsangul mwarngo m'betôô re Noa.9Anlo aê i m'be dun na Noa. Noa aê i m'be antôn ane nan sekan mwaknoknon, aê i taangrê ne tesu t'pepe i lon nan wamran. Noa aê i m'sala me Bwatkôlkôl.10Noa m'pasu wanjun admwan betêl. Sêr be Seem, aê Ham, aê Japet.11Aê rundelo aê ratan sanga balêp goro mta Bwatkôlkôl, aê epwernê bwalbwalan.12Bwatkôlkôl mwalsê epe ratan aê i mi sanga balêp. Atôntôn êr bonga aê gasu m'po seknê sekan an sanga re sal ane lon po be ran ratan.13Aê Bwatkôlkôl pe banê Noa epea, “Rundelo aê nê metemwê ne atôntôn êr bonga met'nok, olin ane ratan aê i m'pwernê bwalbwalan. Aê olin nar sekan êr an sanga elo, aê nê me'tang binibni êr aê emwê ne ratan met'sanga.14O met'ômnê nam bulbul tesu re bôtôa ane sêtê m'be kauri. Aê matlotê êr metedu. O met'ômnê bulbul natê aê elosê ôlpas an mamlêk aê emtêl aê eblublut, lon lotê aê re tarbetê an ôô.15Sal ane o met'ômnê bonê aê i lo, beraan natê aê i metebe nuulsangul na ongan su aê nuul betêl, aê meleean natê aê i metebe nuul ongan m'beru aê m'beru, aê du keketan natê aê i metebe nuul ongan su aê m'betêl.16O met'ômnê im na bulbul aê o taet'bonbon goro sê im natê ne i taagat bamre, mwa o metelngi wabu masêa tesu tkan ne i metebe u ongan su, olin ane lang rii metengrê ane ebalon. O met'ômnê dudutê tetêl an met'langta rar, dudutê an lon lotê, aê dudutê an lon tobol aê dudutê an babamre, aê eômnê bulpatêê natê re sêtê.17Toore ngatê aê nê met'sunê wahle an meteblô ma ran ratan, aê i met'longlongmê tarbea êr aê soksok êr bonga an mwabngos ne mir, ne sek ran ratan aê êr met'matmat.18Nê metedu ran na dal ene nê m'pe banê êk epe nê met'sek bilji gimi aê elepo gimi. Rundelo aê o metea aê eba ka wanjum admwan êr, aê nam êsên, aê êsên êr na wanjum êr aê ebalon bulbul mer.19Aê jingin soksok êr bonga ane miran du lor aê o metehgo m'beberu bil, admwan êr natê aê êsên êr natê balon bulbul, olin ane êr metamir nga mem aê êr taet'matmat.20Lo soksok êr an gaga aê m'beberu jingi langlang natê su, aê lo langlang na bwê êr aê m'beberu jingi langlang natê su, aê soksok êr bonga an mwakrakra aê egalgal lon tan aê i nga re môn; êr met'ma aê eba mem ran bulbul olin ane êr metamir nga.21O metehgo langlang na anin êr bonga aê esak guju êr ma bwêlêm aê eling gogonê olin ane êr metabe agmi aê ar anin.”22Noa môômnê soksok êr ngadkes m'papanê ane Bwatkôlkôl pat pwirisnê banê i.
Pioneer Bible Translators