Re Tabtôan5
1Sasahrôan anlo aê i m'be dun na mabi Adam êr an nga dodo ma pon. Lon bông ane Bwatkôlkôl mwakoe antôn êr, aê i môômnê êr ne êr sol nunun.2Ran bông ane Bwatkôlkôl mwakoe admwan me êsên aê i m'konnê rakô aê ekanê rakô epe atôntôn.3Adam seknê nuulsangul na dam su aê nuul betêl aê epasu watloji admwan su ne i m'papanê i aê esol nunun nga jijinga, aê ekanê sên epe Set.4Aê pon bông ane Adam pasu Set, aê i mo seknê nuulsangul na dam belêêtêl, aê lon wamran anre aê i mo pasu wanjun admwan êr ga me wanjun êsên êr ga môn.5Aê Adam seknê nuulsangul na dam beliapat aê nuul betêl aê enga mat.6Set seknê nuulsangul na dam su aê m'belim aê epasu Inos.7Aê pon ane Set pasu Inos aê i mo seknê nuulsangul na dam belêêtêl aê m'belêôru, aê lon wamran anre aê i mo pasu wanjun admwan êr ga me wanjun êsên êr ga môn.8Aê Set seknê nuulsangul na dam beliapat aê nuulsu aê m'beru aê enga mat.9Inos seknê nuul dam beliapat aê epasu Kenan.10Aê pon ane Inos pasu Kenan aê i mo seknê nuulsangul na dam belêêtêl aê nuulsu aê m'belim, aê lon wamran anre aê i mo pasu wanjun admwan êr ga me wanjun êsên êr ga môn.11Aê Inos seknê nuulsangul na dam beliapat aê m'belim aê enga mat.12Kenan seknê nuul dam m'belêôru aê epasu Mahalalel.13Aê pon ane Kenan pasu Mahalalel aê i mo seknê nuulsangul na dam belêêtêl aê nuul beêt, aê lon wamran anre aê i mo pasu wanjun admwan êr ga me wanjun êsên êr ga môn.14Aê Kenan seknê nuulsangul na dam beliapat aê nuulsu aê enga mat.15Mahalalel seknê nuul dam m'belêêsu aê m'belim aê epasu Jaret.16Aê pon ane Mahalalel pasu Jaret aê i mo seknê nuulsangul na dam belêêtêl aê nuul betêl, aê lon wamran anre aê i mo pasu wanjun admwan êr ga me wanjun êsên êr ga môn.17Aê Mahalalel seknê nuulsangul na dam m'belêêtêl aê nuul beliapat aê m'belim aê enga mat.18Jaret seknê nuulsangul na dam su aê nuul belêêsu aê m'beru aê epasu Inok.19Aê pon ane Jaret pasu Inok, aê i mo seknê nuulsangul na dam m'belêêtêl, aê lon wamran anre aê i mo pasu wanjun admwan êr ga me wanjun êsên êr ga môn.20Aê Jaret seknê nuulsangul na dam beliapat aê nuul belêêsu aê m'beru aê enga mat.21Inok seknê nuul dam m'belêêsu aê m'belim aê epasu Metusela.22Aê pon ane Inok pasu Metusela aê Inok sala me Bwatkôlkôl nê nuulsangul na dam betêl, aê lon wamran anre aê i mo pasu wanjun admwan êr ga me wanjun êsên êr ga môn.23Aê Inok seknê nuulsangul na dam betêl aê nuul belêêsu aê m'belim ran ratan.24Inok sala tehree me Bwatkôlkôl nga ba, aê Bwatkôlkôl mwalê i, aê atôntôn êr taalsê i ronga.25Metusela m'seknê nuulsangul na dam su aê nuul belêêtêl aê m'belêôru aê epasu Lamek.26Aê pon ane Metusela m'pasu Lamek aê i mo seknê nuulsangul na dam m'belêôru aê nuul belêêtêl aê m'beru, aê lon wamran anre aê i mo pasu wanjun admwan êr ga me wanjun êsên êr ga môn.27Aê Metusela m'seknê nuulsangul na dam beliapat aê nuul belêêsu aê liapat aê enga mat.28Lamek seknê nuulsangul na dam su aê nuul belêêtêl aê m'beru aê epasu wanjun admwan su.29I mwalngi sên aê i m'be, “Noa.” I mwalngi sên papanre olin ane i m'pea, “I anlo aê i met'kamnomno kêt lon nakêt pwakonan na ômwan êr ane tan ane Warsangul kakanê m'sunê.”30Aê pon ane Lamek pasu Noa aê i mo seknê nuulsangul na dam belim aê nuul beliapat aê lim, aê lon wamran anre aê i mo pasu wanjun admwan êr ga me wanjun êsên êr ga môn.31Aê Lamek seknê nuulsangul na dam belêôru aê nuul belêôru aê m'belêôru aê enga mat.32Noa m'seknê nuulsangul na dam belim aê epasu Seem aê Ham aê Japet.
Pioneer Bible Translators