Re Tabtôan16
1Seerae ane êsên na Ebram taapasu wanju Ebram tesu. Ape êsên na ômwan su na Seerae na ôt Ijip m'du, ne sên be Heega.2Pon ane Ebram sek Keenan nê nuul dam su, aê Seerae m'pe banê i epea, “Warsangul m'dugro nê olin bisusan, aê nê m'pe banêk epe rundelo aê o tea aê eba sek me nak êsên na ômwan, tagasê i en tenga ba pasu watloji su ane nê met'lepon.” Aê Ebram tong banê dal ane Seerae m'pe. Aê Seerae m'ka nan êsên na ômwan ta Ijip, aê eba sunê i banê nan admwan olin ane i metabe nan êsên.4Ebram pwat me Heega aê i m'kôp. Wamran ane i mwaklê epe i m'kôp aê i m'le tnô Seerae, nan êsên an du bonê i.5Seerae m'pe banê Ebram epea, “O m'seknê sekan an taaknoknon banê nê, re wamran ane nê m'sunê nak êsên na ômwan banê êk. Olin ane re wamran ane i mwaklê epe i m'kôp aê i m'le tnô nê. Lo kakô, aê Warsangul tepepe, epe sê re kakô ene nan sekan taaknoknon.”6Aê Ebram pe banê Seerae epea, “O t'le ba! Nam êsên na ômwan aê rundelo aê i m'sek lon kêlênram, sa ne o mwadmê epe o met'ômnê, aê o t'ômnê re i.” Aê Seerae m'tang bêrê Heega nga aê i m'pii jingi i.7Aê Absôbsôr Kon su na Warsangul jikrênê Heega re mta wa su an gêpgêp maôt re ôt an mwabwilbwil, re sal en banê ôt Sur.8Aê i m'pea, “Heega! Êsên na ômwan na Seerae. ?O mamra bê? ?Aê o metea bê?” Aê Heega m'pea, “Nê m'pii mtatnê êsên an du bonê nê.”9Aê Absôbsôr Kon na Warsangul pea, “Lolom temlumlum aê o t'mo môl ba bwêlê nam êsên an du bonê êk, aê elngi êk balon kêlênran.”10Aê Absôbsôr Kon na Warsangul pea, “Nê metemwê ne wanjum êr met'gatgat aê i taetengrê an tebwili êr.”11Aê Absôbsôr Kon na Warsangul pe banê Heega epea, “O telsê! Rundelo aê o m'kôp aê o met'pasu watloji admwan su aê o met'kanê sên aê i metebe Ismael, olin ane Warsangul mwalsê nam rongo sangaan.12I metebe antôn ane nan sekan met'papanê dongki dubôr, i met'bwal bênê antôn êr bonga aê antôn êr bonga met'bwal bênê i, aê i me selan êr met'sek aê ebwal re êr.”13Heega m'sunê iês su banê Warsangul an sahrô banê i epea, “O m'be Bwatkôlkôl an mwalsê nê!” Aê i m'pea, “Rundelo aê nê mwalsê i an mwalsê nê.”14Tanre ngane êr kanê wa anre ne sêtê m'be, “Wa na i an sek aê elsê nê.” I m'du lon tobol na ôt Kades me ôt Beret.15Aê Heega m'pasu wanju Ebram aê i m'be admwan. Ebram kanê sê wanjun admwan ene Heega m'pasu ere epe “Ismael.”16Ebram aê an dam be nuul belêêtêl aê m'belêêsu, re wamran ane Heega m'pasu wanjun admwan anbe Ismael.
Pioneer Bible Translators